Rengeasek—Moleketek er a Ungil el Omekedecheraol er a Klengar er a Ngar er a Medemiu el Klebesei
1. Ngera uchul me a rengeasek el Kristiano a kirir el mekurulii a mesisiich el klaumerang er tir?
1 Ngera sel kot el klou a ultutelel el tekoi el ngar er a uldesuem? Ngera ke blechoel el melatk er ngii? Kau ke blechoel el di melatk er a tekoi er chelecha el taem, me a lechub e ke melatk er a telbilel a Dios el kirel a ngar er a medad el taem? (Mt. 6:24, 31-33; Lk. 8:14) A mesisiich el klaumerang a usbechall me bo el sebeched el meruul a tekoi el oltirakl a telbilel a Dios, e tiang a sebechel el meues er a kerebil a Abraham me a Moses. (Heb. 11:8-10, 24-26) Ngmekerang e sebechem el mekurulii a chouaisei el klaumerang e moleketek er a “ungil lomekedecheraol” er a klengar er a ngar er a medam el klebesei?—1 Ti. 6:19.
2. Ngera el tekoi a sebeched el suubii er a kerebil a King el Josia?
2 Mosiik er a Jehovah: Ngkmal ungil el tekoi a lsekum e ngulterekokl a temel a omesiungem el obengterir a rechad er a blim. Engdi lak momdasu el kmo ngdi tiaikid a mo uchul a mesisiich el klaumerang er kau e merekong. A lsekum e ngsoam el mo “metik er a klemedengei er a Dios,” e ngkirem el mo blak a rengum el osiik er a Jehovah. (Osi. 2:3-5; 1 Kr. 28:9) A ngeasek el King el Josia a mirruul er tia el tekoi. Alta ngmlukeroul er a delengchokl el dimlak lolisiich a tekingel a Dios, engdi “ng ulemuchel el [osiik]” er a Dios er a demal el David er sera ledirk el 15 a rekil.—2 Kr. 34:3.
3. Te mekerang a rengeasek el Kristiano er chelechang a losiik er a Jehovah?
3 Ke mekerang a omosiik er a Jehovah? Ngoeak sel mkerekikl el merriter a tekoi el moumerang e “bo msal medengei” el kmo tiaikid a klemerang. (Rom 12:2) El uaitiang, kau ngsebechem el smodii a lolekoi er ngii a Biblia el kirel a usbechel a rasech me a lechub e ke ochotii el kmo a Rengedel a Dios a ulemuchel el mengedereder er a eanged er a rak er a 1914? A lsoam el mo meleketek er a ungil el omekedecheraol er a klengar er kau er a ngar er a medam el klebesei, e ngkirem el mo ungil el medengelii a “klemerang.”—1 Ti. 2:3, 4.
4. Ngoeak a ngera el rolel e ngsebechir a redirkak el metecholb el chad el mla mo oldingel a obliil el ochotii a ngelsecheklel a omesiungir el mo er a Dios?
4 A omerellel a Josia el ulsiik er a Dios a mlo uchul a ungil el tekoi. A uchei er a lebo el 20 a rekil, e ngmle bekeu el kikidii a beluu er a klsuul el omengull. (2 Kr. 34:3-7) Me nguaisei, a ngelsecheklem er a tekingel a Dios a sebechel el mo mocholt er a omerellem. (1 Ti. 4:15) A lsekum e kau a dirkak metecholb el chad el mla mo oldingel a obliil, e molasem el meleketek er a duch er kau el omerk er a klumech. Lak di molemolem el merous a makesin e lemerekong. Mrellii a turrekong er kau el mo ousbech er a Biblia el mesaod a tekoi el mo er a rechad, e momekeroul er a klemeriarreng er tirke el semeriar el obetik er tir. (Rom 12:7) Tiang a ngosukau el mo mukeroul el mo klou el chad er a tekingel a Dios e mo toketekii a ungil el omekedecheraol er a klengar er kau er a ngar er a medam el klebesei.