Rolel a Dousbech er a Bltikerreng er a Dios el Babier Sel Dosuub a Biblia el Obengterir a Rechad
1. Ngerang a moktek er a Bltikerreng er a Dios el babier?
1 Ngmera el mlo dmeu a rengud er sera denguu tia el beches el babier el Molemolem el Ngar er a Bltikerreng er a Dios! Tia el babier a mileketmokl el mo ngosukid el mo medengelii a Jehovah e mo betik a rengud er a llechul el kirel a melemalt el omeruul, e diak bo dousbech er ngii el olisechakl aike el uchetemel a osisecheklel a Biblia. Me ngdiak bo dorous er tia el babier sel bo doldingel a obliil.
2. Ngmekerang a bo dousbech er tia el babier, el obengkel techang?
2 Tia el babier a ongeru el babier el bo losuub er ngii tirke el mesuub er a Biblia er a uriul er a bla lerekir sel Biblia Olisechakl el babier. Engdi a omesodel aike el suobel el ngar er a appendix a di mo ultuil er kau el olisechakl. Lak mobes el kmo a rechad a kakerous a rolel a lolengeriakl er a omesubir me a otutel a klemerang er a klengar er tir. Me a derta el omesuub a kirel el oltirakl er sel blekerdelel ngike el mesuub el mo omtab a suobel sel losuub er ngii. Me ngkmal ungil a bo lebleketakl er a rengul aike el tekoi el losuub. Oumesingd el taem, e tia el babier a diak el kired el ousbech er ngii el omuchel a omesubel a Biblia el obengterir a rechad, el tir a mla mesuub a betok el babier er a ngar a mong engdi ngdiak lemei er a miting er a ongdibel e dirrek el rolel a klengar er tir a ochotii el kmo ngdiak el sorir el melodech a blekerdelir el mo oltirakl a klemerang er a Biblia el bla lesuub.
3. Ngkired el mekerang a lsekum a chad el dosuub el obengkel a mo metecholb er a uchei er a lesubii a Biblia Olisechakl me a Bltikerreng er a Dios el babier?
3 A lsekum a chad el mesuub a mo metecholb er a uchei er a bla lesuub aike el teblo el babier, e a omesuub a kirel el melemolem el dimerekmo bo lemerek a omesubel a Bltikerreng er a Dios el babier. Me alta e ngika el mesuub a mla metecholb, engdi ngsebechem el omechur a temem el mesuub el obengkel, me a return visit, me sel omesuub el dirrek. Me a publisher el obengkem el mong e olengeseu er kau el olisechakl a dirrek el sebechel el omechur a temel er tia el omesuub.
4. Ngmekerang a bo dousbech er a Bltikerreng er a Dios el babier el olengeseu er tirke el publisher el dikea lomerk er a klumech?
4 A lsekum a ta er a chedal a Chelechad er a Rudam el Oungerachel er a Berkel a Klumech a olengit er kau el mo mesuub a Biblia el obengkel a chad el dikea lomerk er a klumech, e nglocha mo olengit er kau me bo mosuub aike el bliongel er a Bltikerreng er a Dios el babier el kirem el ousbech el mo olisechakl er ngika el chad. A choua isel omesuub a sebechel el meketmokl er a chelsel a di kedeb el taem. Tiang a mera el ungil el babier el dobang, el mileketmokl el mo ngosukid el melemolem el “ngar a bltikerreng er a Dios”!—Jude 21.