Kerrir a Rechad

◼ A Resioning er a Jehovah ngdi subed a lorous er a delongelir a cheldecheduch el bla el rekord me a lechub e ngellechukl er a babier?

Kid a kmal lolisiich er kid a cheldecheduch el kirel a Biblia. (Rel. 15:32) Me seikid a uchul, e a tekoi el derirenges el kmal millisiich er kid a ulterekokl el soad el dirrek el mesterir a rebebil el dimlak el ngar er a miting er isei el taem. E a domes aika el betok el kakerous el mesil el mla mo er ngii, e a cheldecheduch a sebechel el mengai e merous el mo er a rebetok el chad er a chelsel a kmal di kedeb el taem. A rebebil a mengudel a chouaisei el cheldecheduch el bla el rekord, el uldimukl er ngii a cheldecheduch el mlotobed er a kmal betok el rak er a mla me mong, e oeak a ungil el uldasu e te mesterir a rebebil aika el cheldecheduch me te orrenges me a lechub e te remuul a kloklir a resechelirir er ngii e mesterir. A rebebil a mla remuul a Web site e locha ika el cheldecheduch er ngii el sebechel a ngii di el chad el download a lsorir.

Ngdiak a ultok el kirel a cheldecheduch el derekord el di kired me a lechub e ngkirir a rechad er a telungalek er kid. Me a dirrek a remechuodel a sebechir el rekord a cheldecheduch er a miting el kirir a rechad er a ongdibel er tir el chitechut me ngdiak el sebechir el mo er a miting. Engdi, ngngar er ngii a ungil el uchul me ngdiak dekaiseseuul er a delongeled a cheldecheduch el bla derekord me a lechub e kede milluches.

A cheldecheduch er a miting a blechoel el motobed el loltirakl a blekeradel el ngar er ngii er a derta el ongdibel, me ngsebeched el beot el mo ngodech er a rengud a tekoi el losaod er a chelsel a cheldecheduch el bla el rekord er ngii, e le ngdiak dodengelii a mera el blekerdelel a ongdibel el lemleketmokl sel cheldecheduch el kirel. Ngdirrek el meringel er kid el mo medengei el kmo ngtechang a milengedecheduch e mle oingerang, me ngmo diak el sebeched el oba ulterekokl el reng el kmo a tekoi el dorrenges a dirk tekoi el oltirakl a beches el omesaod e melemalt. (Lk. 1:1-4) Me a lmuut el tang, a dorous er a delongeled a cheldecheduch el llechukl er a babier me a lechub e kede mle rekord e ngsebechir a rebebil el measem el mo kongei el melai me a lechub e te mo omesterir a chetengakl me a klebkall a rebebil.​—1 Ko. 3:5-7

A reblak a rengrir e mellomes a rengrir el mesiou a meringel el oureor el oltobed a kall er a klereng el ungil a ‘ildisel’ er a ungil el “blsechel.” (Lk. 12:42) Aikang a uldimukl er ngii a oketmeklel a cheldecheduch el mo motobed er a derta el ongdibel er a Resioning er a Jehovah me a cheldecheduch el bla el rekord el sebeched el download er sel jw.org el Web site er a cheldebecheled. Ngsebeched el oba ulterekokl el reng el kmo a blak a rengul e mellomes a rengul el mesiou me a Chelechad er a Ruungerachel a melemolem el lomeskid aike el dousbech me bo el sebeched el mo moterekokl a klaumerang er kid el mo mesisiich.​—Rel. 16:4, 5.