Audio Recording—Rolel a Dousbech
1. Ngera ta er a tekoi el sebeched el ngmai a klungioled er ngii el uldimukl er aike el babilenged?
1 Te betok el chad a dmeu a rengrir el mo er a jw.org e menguiu a klemera el tekoi. (Oli. 12:10) Engdi, ngmla ta el mousbech aike el audio recording? Tiang a rulleterir a rechad el mo beot er tir a orrenges a betok el tekoi el ngar er a website er kid. Ngmekerang aika el audio recording e mo uchul a klungioled?
2. Ngmekera dousbech er a audio recording el kirel a omesubed el di kid el tang me a dirrek el omesubel a telungalek er kid?
2 Kirel a Omesubed el Di Kid el Tang me a Dirrek el Omesubel a Telungalek er Kid: A dorrenges a audio recording er a Biblia, magazine, me a lechub e ngkuk ta er a babier sel dengar er a omerael me a lechub e kede meruul a tekoi er a bek el sils a sebechel ngosukid el mo ungil el ousbech a temed. (Efe. 5:15, 16) Ngdirrek el sebeched el remuul a kuk bebil er a rolel a doruul a omengull el telungalek er kid el oeak sel domes er a babilenged e dorrenges aike el mla meketmokl el omengiuel aika el babier. Me a dousbech a audio recording sel dosuub el di kid el tang a kmal sebechel el mo ngosukid a lsekum e ngsoad el mo ungil a omengiued me a lechub e kede mesuub er a ta er a omelekoi.
3. Te rua techa mo ngmai a klungiolir sel doldingel a obliil el ousbech a audio recording?
3 Kirel a Omesiunged: A rechad el ngar er a basio el domerk a klumech er ngii el kmal mechesang me ngdiak a temir el menguiu a babilenged a locha mo sorir el orrenges a audio recording. Me a lechub e kede mo metik er a rebebil el melekoi a ngodech el omelekoi me te di sorir el orrenges er a klumech er a Renged el ngar er a ‘tekoi er a rekebelurir.’ (Rel. 2:6-8) Ngar er a bebil er a beluu, e a oderengesel a tekoi a ta er a kot el klou a ultutelel el tedebechel a siukang er tir. El ua tiang, ngsiukang er a rechad er a Hmong el ouchais er a reksi er tir el mo er a remekekerei el chad, e a rebetok er tir a diak lobes a tekoi el lerirenges. Me a dirrek el ngar er a beluu er a Africa e ngsiukang er a rebetok er tir el lorrenges a medung er a ngor el cheldecheduch.
4. Ngera el ker a sebeched el di kid el oker er kid sel dolengeseu er a rechad el doldingel el tir?
4 Ngar er a basio el domerk er a klumech er ngii, e a omomdasu e ngar er ngii a lerellii a dorelii a audio recording el ngar er a omelekingel a chad er a blai? Ngsebechel a chad el ngmai a klungiolel er a audio publication a lsekum e kede odureklii el mo er ngii el ngar er a e-mail? Ngsebeched el download er a babier el sebeched el di orrenges er ngii el mo er a CD e nguu el msa chad er a blai el semeriar, el uldimukl aike el mla motobed el babier? A bek el electronic book, brochure, magazine, me a lechub e ng tract el debsa chad er a blai sel doldingel a sebeched el lemuches er a blil a temed. A audio recording a mileketmokl me bo el sebeched el ousbech er ngii sel dosuub el di kid el tang e dirrek el mo melalem a tane er a klemerang er a Renged.—1 Ko. 3:6.