Ke Mla Olecholt er a Rolel a Omesubel a Biblia Sel Omkot el Mengedecheduch er a Chad?

Sel dolekoi el kirel a omesubel a Biblia, e a rebebil er a rechad er a blai a melekoi el kmo te diak el semeriar me a lechub e ngngar er ngii a omesubel a Biblia er a ikelesia er tir. Te di sebechir el omekesiu er tiang er a rolel a omesubel a Biblia el bla lengar er ngii, a uchul e ngdiak lodengei el kmo tia el tekoi a mera el sebechel el omekllomes a rengud e meskid a deurreng. Me lak di mosaod er ngii, e bai mchoit a sesei el bung el ochotii a rolel a omesubel a Biblia sel omkot el mengedecheduch er a chad. El ua tiang: Lak di mouchais el kmo ke meduch el meruul a kall me ke mong e lmuut el mei el oba ta er a rruul el kall; bai mereched el mesterir a telkib er ngii me lechermii er sel taem! Tiakid a rolel e ngsebechem el meruul er tiang er a chelsel a di kesai el bung, el mlengai er a ulekrael el ngar er a 6 el llel a September 2005 el Omesiunged el kirel a Renged:

“Omomdasu e a ta er a klebesei e ngsebechel el mo tmaut aika el tekoi? [Monguiu er a Isaia 33:​24, e mongiil er a nger er ngii.] Ngsoak el ochotii er kau a kmal ungil el tekoi el medung el kirel tiang.” Modersii er a chad er a blai a Doruul el babier, e mochotii er ngii a parakurab 5 er a Ongeim el Suobel. Mchiuii a ker el ngar er a uchelel a suobel, e molekoi er ngii el chad me lolasem el osiik er a nger sel omonguiu er ngii el parakurab. Obo merek e mluut el oker er a ker, e morrenges er ngii a longer. Mdak el choieuii a ta er a bades. Moker er a ta er a ker el bo monger er ngii sel omluut el mo oldingel er ngii, e moterekeklii a taem el sebechem el mong. A omuaisei e ke mla mechelii a omesubel a Biblia!