A Ongkerongel—A Babier el Kltmokl el Mo Omeksemeriar a Rengrir a Rekakerous el Chad
1. Ngmekerang a blak a rengul e mellomes a rengul el mesiou a loukerebai er a apostol el Paulus?
1 A blak a rengul e mellomes a rengul el mesiou a ousbech aika el babilenged el mo remutech a rengrir a rechad el kakerous a blekerdelel a klengar er tir me a klaumerang er tir, el di ua apostol el Paulus el mle kltmokl el melodech er a rolel a lomerk er a ungil el chais me bo el sebechel “mlo uar bek el chad.” (1 Ko. 9:22, 23) Me sei a uchul me ngungil a bo el sebeched el melebedebek aike el tekoi el ngar er a chelsel aika el babilenged me bo el sebeched el medengei el kmo ngungil el mo er a reua techa el chad.
2. Ngera uchul me ngkired el ungil el omtab a tekoi sel dorous aika el makesin?
2 Sel dekerekikl el omtab e dungil el orrenges e ngsebechel el ngosukid el mo “uar bek el chad el bedul ar bek el chad.” (1 Ko. 9:22) A lsekum e ngngar er ngii a techellem el omtab er a rechad er a uchei er a omongedecheduch er tir, e ngulterekokl el sebechem el mo medengei aike el tekoi el lesemeriar er ngii me a dirrek el blekerdelel a klengar er ngii er seikid el taem. Me sel morous er a makesin, e ngsebechem el melisiich er ngii el mo olecholt a uldesuel. Moker er ngii a melemalt el ker e mongiil er a nger er ngii. Bo mungil el rongesii. Sel chemolt el klemeriarreng er kau a sebechel el melisiich er a chad el mo beot er ngii el mengedecheduch. Me a nger er ngii a locha sebechel el ochotii a tekoi el lesemeriar er ngii. E tia el omeruul a di mo ultuil er a tekoi el momtab e orrenges, me bo el sebechem el ungil el mesaod er a suobel el lesemeriar er ngii a chad.
3. Ngerang a moktek er aike el suobel el ngar er a ikrel me a chelsel a A Ongkerongel?
3 A klemeriarreng er a chad el kirel aike el suobel el mocholt er a ikrel a babier a ochotii el kmo ngngar er ngii a telkib el omengull er ngii el mo er a Dios me a dirrek el Bades. Ngulterekokl el ngar er ngii a telkib el klemedengei er ngii er a Biblia e ngdi ngdiak lodengelii a melemalt el osisecheklel. Ngdi uai tirke el chad el Paulus a ulemekedong er tir el kmo te “meluu ra Dios.” (Rel. 13:14-16) Aike el suobel el ngar er a A Ongkerongel a uleketmokl el kirir a Resioning er a Jehovah. A Paulus a mle medengei el kmo tirke el mo menguiu a babilengel a ungil el medengei a Bades e dirrek el ulterekokl a klemedengei er tir el kirel a klemerang. (1 Ko. 1:1, 2) Me ngdi osisiu, a suobel el meketmokl a dirrek el mo er tirke el mei er a miting el tir a dirrek el medengei a tekoi me a belkul a tekoi el losaod a Resioning er a chelsel a ongdibel er tir.
4. Ngera uchul me ngkired el mo ungil el medengei aike el makesin el dorous sel doldingel a obliil?
4 Mrellii a turrekong er kau el mo ungil medengei aike el bek el makesin. E seikid e ngmo sebechem el ungil el mesaod aike el tekoi el ngar er a chelsel el mo er a rechad el obetik er tir.