‘Le Mechedaol a Ngklel a Dios’
1. Ngerang a dai er tia el eru el sils el ongdibel er a 2012 el rak er a omesiou, e tia ngmengai a uchetemel er ker?
1 Ngkmal klou el techall el sebeched el mo obang tia el ngklel a Chimong el Kedidai el Jehovah el Dios! A Dios a ngileltii el mo meskid tia el ngakl, e ileakl er sera rak er a 1931, e a rechad a mlo medengelkid el okiu a ngakl el Resioning er a Jehovah. (Isa. 43:10) Ngika el di ta el Ngelekel a Dios el Jesus, a milengebkall er a ngklel a Dios er a kot el ngarbab el rolel, er sera lolisechakl er a redisaiplo er ngii el mo meluluuch. (Mt. 6:9) Aika el tekingel a Jesus a meskid a uchetemel tia el eru el sils el klou el ongdibel er kid er a 2012 el rak er a omesiou. A dai er ngii a kmo “Le Mechedaol a Ngklel a Dios.”
2. Kede semeriar el mengiil el mo orrenges er a ngera el tekoi?
2 Aike el Tekoi el Bo Dorrenges: Sel cheldecheduch er a Sebadong el dai er ngii a kmo “Momerk er a Ngklel a Dios sel Mosiou el Mui el Taem” a mo smodii sel uchul me a mui el taem el omesiou a kot el ungil el rolel a klengar. Kede dirrek el mo orrenges a uldekdak el cheldecheduch el dai er ngii a kmo “Bom Kerekikl Me lak Motubii a Ngklel a Jehovah,” el ngii a mo ngosukid el oibngid er a eua el rolel a bedikl. Me a ker el, Ngera mo ngosukid el omerk el oba blakerreng er sel taem el rechad a diak el semeriar? me a Ngera mo ngosukid el churrengelii a omesiunged? a mo monger er a cheldecheduch el dai er ngii a kmo “A Uchul Me a Ngklel a Dios a Kirel el Mechedaol.” A rebeches el mei er a chelsel a ongdibel a dirrek el mo oba klou el omereng el saul el kirel a cheldecheduch el mo er a buai el kmo “A Jehovah a Mo Chemedolii a Ngklel er a Temel a Armageddon.”
3. Kede obang a ngera el ileakl el techall, e mekerang e mo sebechel tia el prokuram el ngosukid?
3 Ngkmal di kmedung e a Jehovah a mo meruul a tekoi el mo chemedolii a ngklel. (Ese. 36:23) Me chelechang el mo lmuut er seikid el taem, e kede oba ileakl el techall el mo mengebkall er a ngklel a Jehovah. Ngkmal ulterekokl a rengud el kmo tia el eru el sils el ongdibel a mo ngosukid el churrengelii a klou el ngerecheled el ouchais er a ngklel a Dios.