‘A Uldesuel a Rengul [a Dios] Le Meruul’
1. Ngerang a dai er a ileakl el ta el sils el ongdibel er a 2012 el rak er a omesiou, e ngera uchul me ngklou a ultutelel el bo dosaod er tia el tekoi?
1 Kid a ulebeob el uleltirakl er a soal a Jehovah. (Och. 4:11) Sei a uchul me ngdiak el sebeched el churrengelii a moktek er a klengar er kid a lsekum e ngdiak dosuub, e doruul a soal a Dios. Tiang a diak el beot el tekoi, e le ngkired el oltngakl er sel blekerdeled el soad “el meruul a soal a tech ma rengud” me a dirrek “a ikel sorir ar Chisentail.” (Efe. 2:3; 1 Pe. 4:3; 2 Pe. 2:10) Me a lak a ngelsuil a Dios, e ngsbeched el “mudechem er [a Diabelong me kede] ngara ikel soal.” (2 Ti. 2:26) Me sel prokuram er a ileakl el ta el sils el ongdibel er kid er a 2012 el rak er a omesiou, a mo ngosukid el oltirakl er sel ongedei el ongit er a kerebai el nglunguchel a Jesus el kmo, “a uldesuel a rengum le meruul.”—Mt. 6:9, 10.
2. Ngera el ker a mo monger er a chelsel a prokuram el mo er ngii?
2 Aike el Ker el Mo Monger: Me sel morrenges er a prokuram, e mosiik a nger er aika el ker: Ngera el tekoi a osisiu a klungel a ultutelel ngii me a dorrenges er a tekingel a Dios? Kede mekerang e mo omtab el kmo ngera soal a Dios el kired? Ngera me ngkired el kongei el ngosuterir a rebek el chad? Ngmekerang e sebeched el metik er a kot el ungil el rolel a klengar? Kemiu a remekekerei el chad, ngerang a kiriu el ochotii el mo er a Jehovah? Ngera el omeksaul a mo er ngii a doruul er a soal a Dios? E ngera uchul me ngorechudel el kired el melisiich er a rebebil?
3. Kede mekerang e ngmai a klungioled er a prokuram er a ileakl el ta el sils el ongdibel?
3 Molasem el mechir a temel aike el prokuram e bo leblak a rengum el orrenges. Ngulterekokl el mo er ngii a omtechei er a Bethel me a lechub e ngngike el odam el oldingel a ongdibel el mo oltobed a cheldecheduch. Ngungil a bo dongedecheduch er ngii me a bechil, a lsekum e ngbechiil, er a uchei me a uriul er a prokuram. Me sel bo mrei, e lak bo mua a chad el di ‘remenges e obes,’ e bai mdak el ongalek e momelekl a tekoi el msiluub e mosaod er a rolel e ngsebechiu el oureor el oltirakl er a soal a Dios.—Jak. 1:25.
4. Ngera uchul me ngklou a ultutelel el doruul er a soal a Dios el mo kot er a klengar er kid?
4 Ngdi kmedung e tirke el di melisiich a sorir me tirke el diak el kengei el mo oltirakl a soal a Jehovah a mo nguemed. (1 Jn. 2:17) Kede oba omereng el saul e le Jehovah a mla kutmokl aika el tekoi er a kot el ungil el blsechel el ngosukid el meruul a soal Dios el mo kot er a klengar er kid!