A Tekingel a Dios a Kired el Obang el Olisechakl
1. Ngerang a dai er a eru el sils el ongdibel er kid er a 2014 el rak er a omesiou, e ngera el ker a mo monger el okiu tia el prokuram?
1 A Jehovah el Ngike el Olisechakl er kid a kot el ungil el sensei er a eanged me a chutem. (Isa. 30:20, 21) Engdi ngmekerang a Jehovah a lolisechakl er kid? Ngmla meskid a mlukrael el Tekingel el Biblia el ngii a kot el ngaruchei er a rokui el babier. Me ngmekerang a osisecheklel a Dios e mo uchul a klungiolel a bedenged, uldesued, rengud me a klaumerang er kid? A nger er tia el ker a bo dosaod er ngii er a prokuram er a eru el sils el ongdibel er kid er a 2014 el rak er a omesiou. A dai er a prokuram a kmo, “A Tekingel a Dios a Kired el Obang el Olisechakl” el mlengai er a 2 Timothy 3:16.
2. A meklou a ultutelel el tekoi er tia el prokuram a mo bleketakl el okiu a nger er a ngera el ker?
2 Momtab Aika el Meklou a Ultutelel el Tekoi: A meklou a ultutelel el tekoi er tia el prokuram a mo bleketakl el okiu a nger er aika el ker:
• A osisecheklel a Dios ngerang rullii er a klengar er kid? (Isa. 48:17, 18)
• A lsekum kede melasem el melodech a blekerdelel a klengar er kid me bo el sebeched el mesiou er a Jehovah el mui el taem, e ngsebechel el mo ulterekokl a rengud el kirel a ngerang? (Mal. 3:10)
• Ngkired el mekerang sel bo dechelebangel a “ngodech el blekerdelel osisechakl”? (Heb. 13:9)
• Ngmekerang a doltirakl er a rolel a Jesus a “lolisechakl”? (Mt. 7:28, 29)
• Ngera uchul me ngkirir tirke el olisechakl er a chelsel a ongdibel el di tir el osisecheklterir? (Rom 2:21)
• A Tekingel a Dios ngmo uchul a ngera el klungiaol? (2 Ti. 3:16)
• Ngera ngrullii er a rechad a omerellel a Jehovah el melmesim aika el renged? (Hag. 2:6, 7)
• A Jehovah ngulterekokl a rengul er a ngera el kired? (Efe. 5:1)
• Ngera uchul me ngkired el meringel el oureor me dolemolem el ngar er a osisecheklel a Jehovah? (Lk. 13:24)
3. Ngera uchul me ngklou a ultutelel el debong e dekerekikl el orrenges er tia el prokuram el mileketmokl er a ungil blsechel?
3 A Paulus a milsaod el kirel aike el meringel el taem el mo er ngii er a uriul el sils el ngar er a uchelel a 2 Timothy er a 3 el bliongel er a uchei er a loluches aike el tekoi el mo dai er tia el prokuram er kid. Ngmilluches el kmo: “E a re mekngit el chad ma re chad el omerk a diak le meral osisechakl, a mekngit e merael mengal mo mekngit; te mengeblad er a re chad e di tir el mecheblad.” (2 Ti. 3:13) Ngkmal klou a ultutelel a bo dekerekikl el orrenges e doltaut a osisecheklel a Dios me lak demecheblad er a rechad! Me a leuaisei, e detib a rengud el mong e bo dekerekikl el orrenges er tia el prokuram el mileketmokl er a ungil blsechel.