A Tekingel a Dios a Ngar er Ngii a Klisichel
1. Ngerang a dai er sel ileakl el ta el sils el ongdibel er kid er a 2014 el rak er a omesiou?
1 A Biblia a diak el uai a ngii di el ngerang el loruul a rediak el mecherrungel el chad, e le ngar er ngii a klisichel el ngmodech a uldesued me a omerelled el mo oltirakl er a soal a Jehovah. Ngua ngerang a klisichel a Tekingel a Dios? Kede mekerang e mo sebeched el ungil el ousbech er sel klisiich er a klengar er kid? E mekerang e mo sebeched el mo meduch el ousbech er ngii el ngosuterir a rebebil? Ngulterekokl a rengud el kmo kid el rokui a mo ngmai a klungioled sel dorrenges aika el tekoi el mo soadel er sel ileakl el ta el sils el ongdibel er kid el mileketmokl el kirel a 2014 el rak er a omesiou. A dai er ngii a kmo “A Tekingel a Dios a Ngar er Ngii a Klisichel” el mlengai er a Hebru 4:12.
2. Ngkired el omtab a nger el kirel a ngera el ker?
2 Momtab a Nger er Aika el Ker: Sel morrenges er a prokuram, e momtab a nger er aika el ker el llechukl er iou.
• Ngera uchul me ngkired el oumerang er a Tekingel a Jehovah? (Psa. 29:4)
• Kede mekerang e mo medengelii a klisichel a Tekingel a Dios er a chelsel a klengar er kid? (Psa. 34:8)
• Ke mekerang e mo sebechem el ousbech er sel klisiich el ngar er a Tekingel a Dios el ngar er a omesiungem? (2 Ti. 3:16, 17)
• Kede mekerang e mo sebeched el oleiub er kid me lak demekesuseu er a chelebeldil tia el beluulechad er a Satan? (1 Jn. 5:19)
• Ke mekerang kau el ngeasek el chad e smisichii a klaumerang er kau? (Jer. 17:7)
• Kede mekerang e mo mesisiich alta e kede mechitechut? (2 Ko. 12:10)
• Ngera kede ousbech el mo melemolem el melodech a klengar er kid, alta e ngmle mekngit a omerelled me a uldesued el kemanget el taem? (Efe. 4:23)
3. Uldimukl er a dorrenges er tia el prokuram, e ngera bebil er a klungiaol el bo dengai er tia el ileakl el ta el sils el ongdibel?
3 Ngkmal mo uchul a klungioled sel bo dorrenges e domtab aika el meklou a ultutelel el tekoi! Me a lmuut el tang, tia el ileakl el ta el sils el ongdibel el di ua sel eru el sils el ongdibel me sel ileakl el eru el sils el ongdibel, a meskid a techelled el mo medengelterir e dirrek el oldeu a rengud el obengterir a rudam me a rudos er kid el mla er a bebil er a ongdibel el mei. (Psa. 133:1-3; 2 Ko. 6:11-13) Mada bo mousbech a taem el mengedecheduch er a resechelim e bo modengelterir a rebeches el chad. Me a lsekum ngike el me oldingel er kemiu a odam el oungerachel aike el eru el sils el ongdibel me a lechub e ngta er a odam el mla er a Bethel a mo oltobed er a cheldecheduch, e mousbech er tia el techall el mo outkeu er ngii me a bechil. Nguaisei el kmal betok a ungil el uchul e kede omes el bedul tia el ileakl el ta el sils el ongdibel er kid!
[Aike el Ker er a Suobel]