Momekerreu er a Uldesuem
1. Ngerang a dai er a eru el sils el ongdibel er a 2013 el rak er a omesiou, e ngerang a moktek er tia el prokuram?
1 A Jesus a ullisechakl er a redisaiplo er ngii el mo betik a rengrir er a Jehovah el oba rengrir me a klengar er tir me a uldesuir el rokir. (Mt. 22:37, 38) A ileakl el eru el sils el ongdibel er chelecha el rak me aike el eru el sils el ongdibel me a ileakl el ta el sils el ongdibel a mla meketmokl el mo olengeseu er kid el melisiich er a rengud me a uldesued. A dai er a ileakl el eru el sils el ongdibel a kmo “Bo Mkerekikl er a Uldesuem!” A dai er a prokuram er a ileakl el ta el sils el ongdibel er a 2013 el rak er a omesiou a kmo “Bo Mkerekikl er a Ukltkem.” E a dai er aike el eru el sils el ongdibel el omuchel er a ongingil el buil a kmo “Momekerreu er a Uldesuem,” el milengai er a Matteus 22:37. Me tia el prokuram a mileketmokl el mo olengeseu er a derta er kid el mo kerekikl me aike el domdasu bo lodeuir a rengul a Jehovah.
2. Ngkired el osiik a nger er a ngera el ker er a temel a prokuram?
2 Ngerang a Mo Soadel: Sel dorrenges er a prokuram er a eru el sils el ongdibel, e ngkired el osiik a nger er aika el ker el mesaod a meklou a ultutelel el tekoi:
• Kede mekerang e mo diak dolab a di uldesuir a rechad?
• Kede mekerang e meketakl a tekoi er a uldesuir a rediak el loumerang?
• Ngera el rolel a uldasu a soad el obang?
• Ngera el klungiaol a dengai a bo dungil melebedebek a tekoi?
• Kede mekerang e mecherei a Jehovah me lolodech a uldesued?
• Te mekerang a rebechiil el sechal, rebechiil el redil, ruungalek me a rengalek e mo uchul a deurreng er a chelsel a telungalek?
• Kede mekerang e mo kltmokl el kirel a sils er a Jehovah?
• Ngera belkul a dolisiich a uldesued el kirel a ureor?
• Ngera el klungiaol a mo er tirke el oltaut aike el tekoi el losuub?
3. Ngera uchul me ngklou a ultutelel a debo er aike el eru el sils er tia el ongdibel e dekerekikl el orrenges e doltaut aike el dosuub?
3 A Satan a melasem el mengitechut e dirrek el melemall a uldesued. (2 Ko. 11:3) Sei a uchul me ngkired el omekerreu e omtebechel a uldesued. Ngdirrek el kired el melemolem el olecholt er a uldesuel a Kristus e omtok a ongetikaik er tia el chebirukel el beluulechad. (1 Ko. 2:16) Me a leuaisei, e ngkired el mengetmokl a temed me bo el sebeched el mo er aike el eru el sils er tia el ongdibel e mo kerekikl el orrenges. A doltaut aike el meklou a ultutelel el tekoi el mo soadel a mo ngosukid el mo blak a rengud er a omesiunged el kirel a Renged.—1 Pe. 1:13.