Mongreos er a Techellem el Mesiou
1. Ngua ngera osengir a rebetok el kirel tia el urered er a berkel a klumech?
1 A rebetok el chad el ngar er tia el beluulechad er a Satan a omes er a urered er a berkel a klumech el “klebelung.” (1 Ko. 1:18-21) Me a lsekum e ngdiak dekerekikl, e ngsebechel tia el uldasu el mengitechut er kid e rullid el mo mesaul a rengud el mesiou. (Osi. 24:10; Isa. 5:20) Ngera aike el tekoi el uchul me ngkired el mengreos er tia el techelled el ta er a Resioning er a Jehovah?—Isa. 43:10.
2. Ngera uchul me a ureor er a berkel a klumech a okedongall el chedaol el ureor?
2 A Chedaol el Ureor: A apostol el Paulus a milsaod er tia el ureor er a berkel a klumech el ua chedaol el ureor el ulemekesiu er ngii er a “chomesiou ra klepriist,” el ngii a melekoi el kirel a omesiunged el mo er a Dios. (Rom 15:15, 16) Ngoeak a ngera el rolel e tia el omesiunged a chedaol el ureor? Sel domerk er a klumech e kede “choureor el kldemel” ngike el “Chedaol” el Jehovah, el mo uchul a omengebkall el kirel a ngklel. (1 Ko. 3:9; 1 Pe. 1:15) A Jehovah a omes er tia el omesiunged el ua “tenget er chodanges,” me ngkmal klou a ultutelel el telengtengil a omengull er kid el mo er ngii.—Heb. 13:15.
3. Ngera rullii a ureor er a berkel a klumech er a ungil el chais el mo ileakl el techall?
3 A berkel a klumech er a ungil el chais a kot el klou e chetengakl el ureor el di kesai el chad a ngar er ngii a techellir el meruul er ngii. Oleko tia el ureor a mloterekokl er a rechanghel, e te ulterekokl el kmal dmeu a rengrir el churrengelii ngii el ureor. (1 Pe. 1:12) Me nguaisei, engdi a Jehovah a mla melilt er kid el diak demecherrungel el chad “el ngara blil el chutem,” el mo meruul er tia el ileakl el ureor!—2 Ko. 4:7.
4. Kede mekerang e ochotii el kmo kede mengreos er tia el techelled el mesiou?
4 Ngklou a Ultutelel: Kede mengreos er tia el techelled el mesiou a uchul, me kede omes er a urered er a berkel a klumech el ta er aike el meklou a ultutelel el tekoi er a chelsel a klengar er kid. (Fil. 1:10) Me kede oterekokl a temed er a bek el sandei el meruul er ngii. A chad er a chelitakl el ngii a mengreos er a techellel el ousekool er a chelsel a ta er aike el merael a chisel el orchestra, a ulterekokl el blechoel el mengetmokl er ngii el kirel a taem el bo lousekool, e dirrek el omekeroul er a duch er ngii el lmuut el mo ungil. Me ngdi osisiu, kede mengetmokl er kid er a uchei er a bo doldingel me bo el sebeched el “melemalt loleisech a tekoi ra klemerang,” e domekeroul er a duch er kid el lmuut el mo meduch el “olisechakl.”—2 Ti. 2:15; 4:2.
5. Te rua techang a dmeu a rengrir el kirel a omesiunged?
5 Lak bechei a mekngit el uldesuir a rechad me longitechut er kau. Lak mobes el kmo te dirk ngar er ngii a rechad el ngar er a basio el domerk a klumech er ngii el kmal oba omereng el saul el kirel a odingel er kid. Me nguaisei, engdi kid a diak dosiik a kengei er a rechad. A kot el klou a ultutelel el tekoi, a sel uldesuel a Jehovah el kired, e ngii a omes er a blakerreng er kid el meruul er tia el ureor el kmal mekreos.—Isa. 52:7.