Teruich me a Eru el Uchul e Kede Omerk er a Klumech

Ngera uchul me kede omerk e olisechakl er a ungil chais? Kid kede meruul er ngii el mo olengeseu er a remelemalt a rengrir el chad el mo er a rael el mo er a klengar? (Mt. 7:​14) Tiaikid a kot el uchul el llechukl er iou, engdi tiang a diak el sel kot el klou a ultutelel. A omomdasu, e ngngera er aika el 12 el uchul e kede omerk er a klumech a kot el klou a ultutelel?

1. Ngolengeseu el olsobel a klengar er a rechad.​​—Jn. 17:⁠3.

2. Ngomeklatk er a remekngit el chad.​—Ese. 3:​18, 19.

3. Ngolengeseu el oltaut a ulaoch er a Biblia.​​—Mt. 24:⁠14.

4. Ngolechotel a llemeltel a Dios. Ngdiak a chad el sebechel el melekoi el kmo a Jehovah a dimlak el besterir a remekngit el chad a techall el mo obult er a kngterir er a uchei er a lolekngemed er tir.​​—Rel. 17:​30, 31; 1 Ti. 2:​3, 4.

5. Ngosukid el mo oltaut er a ngerecheled el olengeseu er tirke el mlochar er a rsechel a Jesus me lebo er ngii a deleuill er tir el obengkel a Dios.​​—Rom 1:​14, 15.

6. Ngmo uchul e ngdiak dechelsechusem er a rsechir a rechad.​​—Rel. 20:​26, 27.

7. Ngtekoi el kired el meruul er ngii el kirel a osebeled.​​—Ese. 3:​19; Rom 10:​9, 10.

8. Ngolechotel a bltikerreng el kirir a retonari er kid.​​—Mt. 22:⁠39.

9. Ngolechotel a blekongesenges el mo er a Jehovah me a Ngelekel.​​—Mt. 28:​19, 20.

10. Ngtelengtengil a omengull er kid.​​—Heb. 13:⁠15.

11. Ngolechotel a bltkil a rengud el mo er a Dios.​—1 Jn. 5:⁠3.

12. Ngolengeseu el mengedaol er a ngklel a Jehovah.​​—Isa. 43:​10-​12; Mt. 6:⁠9.

Nguaisei, engdi ngdiak el di el ikaikid a uchul e kede mo omerk er a klumech. El uai tiang, a berkel a klumech a melisiich er a klaumerang er kid e meskid a ileakl el techall el mo kldemel a Dios er a ureor. (1 Ko. 3:⁠9) Engdi sel kot el klou a ultutelel el uchul me kede omerk er a klumech a mengedaol er a ngklel a Jehovah. Me alta e a rechad a orrenges me a lechub e ngdiak, engdi tia el ureor er a berkel a klumech a olengeseu el mengedaol er a ngklel a Jehovah e msang a nger el mo er ngike el oltuub er ngii. (Osi. 27:​11) Me ngngar er ngii a betok el ungil el uchul me kede melemolem el olisechakl e omerk er a ungil chais.​​—Rel. 5:​42.