A Kot el Klou a Ultutelel el Tekoi er a Klengar er Kid
1. Ngmilekerang a Jesus er a lolecholt el kmo a omesiungel a kmal mle klou a ultutelel el mo er ngii?
1 A Jesus a ulemes er a omesiungel el kmo ngkmal klou a ultutelel. Ngkmal mle blak a rengul el merael er a kemanget el omerael er a chelsel a beluu er a Palestine el omerk er a klumech el mo er a rebetok el chad. Ngulemekbeot er a klengar er ngii me bo el sebechel el mengoit er a klou el temel me a klisichel er a omesiungel. (Mt. 8:20) A seked er a lolasem el mengelebus er ngii me bo el sebechel el omekungil er a resmecher, e ngdilu el kmo: “Ngkirek el mo omerk ra ungil klumech ra rengedel a Dios era ikel kuk bebil ra mats; itiai a uchul ma kmlodurch.”—Lk. 4:43.
2. Ngera uchul me a omesiou a kmal mle klou a ultutelel er a Jesus?
2 Ngera uchul me a omesiou a kmal mle klou a ultutelel er a Jesus? A klou a ultutelel el tekoi el lullatk er ngii a mle omengedolel a ngklel a Jehovah. (Mt. 6:9) Ngmle betik a rengul er a Demal el ngar er a eanged e kmal mle soal el oltaut er a moktek er ngii e olengesenges a bek el llechul. (Jn. 14:31) Ngdirrek el kmal ulemekerreu er a rechad e mle soal el olengeseu er tir.—Mt. 9:36, 37.
3. Kede mekerang e ochotii el kmo ngultaut a osenged er a omesiunged?
3 Moukerabai er a Jesus: Ngsebechel el mo meringel er kid el oba osengel a Jesus el kirel a omesiunged e le tia el beluulechad a ousbech er a klou el temed e dirrek el omeskid a betok el tekoi el mengesang er kid. (Mt. 24:37-39; Lk. 21:34) Me a leuaisei, e ngkired el mo kerekikl er aike el kot el meklou a ultutelel el tekoi, e remuul a temed me bo el sebeched el mengetmokl er kid el mo blechoel el teloi er a ureor er a berkel a klumech. (Fil. 1:10) Kede melasem el melemolem er a beot el rolel a klengar e diak desal lousbech er tia el beluulechad.—1 Ko. 7:31.
4. Ngera uchul me ngklou a ultutelel a delemelemii a melemalt el osenged er aike el meklou a ultutelel el tekoi er a klengar er kid er chelechang?
4 Sel lekosekodel a taem, e a mellomes a rengul el chad a meruul aike el meklou a ultutelel el tekoi el kot. El ua tiang, a lsekum e ngmo medengei el kmo a mesisiich el eolt a meremang, e ngmo mengoit a temel me a klisichel el mengetmokl el kirel a ulekerreuil a telungalek er ngii e dirrek el mo mesubed er a retonari er ngii. Aike el diak a ultutelel el tekoi a mo medechel. A taem el medechel er a uchei er a lemei a mesisiich el eolt er a Armageddon a kmal kmedang. (Sef. 1:14-16; 1 Ko. 7:29) Ngkired el mo kerekikl er kid me a osisechekled, a dengar er a chelsel me a lechub e ng ikrel a ongdibel, me bo el sebeched el osebelid kid me tirke el orrenges er kid. (1 Ti. 4:16) Nguaisei, a osebeled a ultuil er kid el omes er a omesiunged el kmo ngkot el klou a ultutelel el tekoi!