A Jehovah a Olisechakl er Kid el Kirel Tia el Ureor
1. Ngera el tekoi a dirrek el loruul er ngii a Jehovah er sel taem el loterekokl a ngerachel el mo er a rechad?
1 A Jehovah sel loterekokl a ngerechelir a rechad, e ngdirrek el mesterir a ngeso el mo meruul aika el ngerachel el mla moterekokl er tir. El uaitiang, sera ledu er a Noah me bo loruul er a arhe, el ngii a tekoi el dirkak a ta el loruul er ngii, e ngdirrek el ulechotii a rolel a bo loruul er ngii. (Gen. 6:14-16) Sel taem er a loldurech er a Moses el mo mengedecheduch er a remechuodel el chad er a Israel me a Farao, e a Jehovah a dirrek el millisiich er ngii er a ledu el kmo: “Ak mo ngosukau el mengedecheduch, e mo dmu er kau cho bo molekoi.” (Exo. 4:12) Me a Jehovah a dirrek el meskid a ulekrael el dousbech el meruul er tia el ureor er a berkel a ungil el chais el bla loterekeklii er kid. Me ngolisechakl er kid el okiu a Skuul el kirel a Urerel a Dios me a Miting el kirel a Berkel a Klumech. Ngmekerang e sebeched el ngmai a klungioled er tia el osisechakl?
2. Kede mekerang e ngmai a klungioled er a Skuul el kirel a Urerel a Dios?
2 Skuul el kirel a Urerel a Dios: Mosuub e mketmeklau er a uchei el kirel aike el bek el miting. Me a dirrek el sel momes er a rebebil el oltobed er a cheldechedecherir e ngsebechem el lmuut el mekurulii a rolel a omolisechakl. (Osi. 27:17) A kot el ungil el rolel e ngmo sebeched el ngmai a klungioled, a sel deteloi er tia el skuul. Me kau ke mla mo ngalek er a skuul? Sel omnguu a cheldechedecham e bo mungil el kutmeklau e molasem el oltaut aike el ulekrael el bo mngai. Me sel omoldingel a obliil, e mousbech aike el tekoi el bla msuub.
3. Ngera sebechel el ngosukid el mo ngmai a klungioled er a Miting el kirel a Berkel a Klumech?
3 Miting el kirel a Berkel a Klumech: Ngsebechel el mo beot er kid el melatk aike el tekoi el meketmokl er tia el miting, sel dosuub aika el suobel er a uchei e deketmokl a nger er kid. A lsekum e kede remuul a nger er kid el mo mekedeb, e ngmo sebechir a rebetok el dirrek el onger. Bo mkerekikl el omtab aike el tuobed el olechotel a tekoi, e mousbech aike el tekoi el momdasu e ngsebechel el rullii a omesiungem el lmuut el mo ungil. Mketmokl aike el meklou a ultutelel el suobel el ngar er a Omesiunged el kirel a Renged el sebechem el lmuut el mo ousbech er a uriul.
4. Ngera uchul me ngkired el mo ungil el ousbech aike el osisechakl el dengai er aika el eru el miting?
4 Tia el ngerachel el mla moterekokl er kid el ngii a berkel a ungil chais er a beluulechad el rokir a kmal klou el tekoi, el di uai aike el ngerachel el mloterekokl er a Noah me a Moses. (Mt. 24:14) Ngsebeched el olengeriakl er tia el urered a lsekum e kede ultuil er a Jehovah, el Ngike el Kot el Ngarbab el Sensei, e dirrek el mo ungil el ousbech aike el osisechakl el lomeskid.—Isa. 30:20.