Ngkired el Lmuut el Mo Oldingel er Tirke el Semeriar
1. Ngera el tekoi a kired el melubs er ngii me bo lemukeroul?
1 Ngkmal kired el melubs er a tane el delalem er a sers me bo el sebechel el mukeroul. Me ngdi osisiu el tekoi el kirel a tane er a klemerang el delalem er a rengrir a rechad el ngar er a territory er kid. (1 Ko. 3:6) Ngkmal kired el melemolem el mo oldingel er tir e melubs er tiaikid el okesiu el tane el ousbech er a Tekingel a Dios el Biblia a lsekum e ngsoad a leduubech, e lemukeroul a klemedengei er ngii er a Tekingel a Dios.
2. Kede mekerang e sebeched el ngosuir a chad el mo semeriar el kirel a tekoi el bo dosaod er ngii sel deluut el mo oldingel er ngii?
2 Moker a Ker: Sel molasem el meruul er a presentation er kau, e ngungil el mketmeklii a ker el sebechem el oker er ngii me bo el sebechem el lmuut el mong e monger er ngii. Moker er ngii el kerim er sel taem el lemerekong a cheldechedechemiu, e moterekeklii a taem el mluut el mong. A rebetok a mla metik er ngii el lungil a lengiltii a ta er a tekoi el ngar er a Biblia Olisechakl el babier el sebechir el ousbech er ngii el omuchel a omesubel a Biblia.
3. Ngera el tekoi a kirem el lmuches er a uriul er a omongedecheduch er a chad el mle semeriar?
3 Moluches a Rekord er Kau: Sel taem el morael er a blil a chad, e moluches er a rekord er kau. Mlechesii a ngklel a chad me a basio el lekiei er ngii. Ngdirrek el ungil el mlechesii sel sils me a taem el mulengedecheduch er ngii, me a tekoi el mulsaod, me a babier el bilsang. Nguluuchais el kmo ngchedal a ngera el klechelid? Ngngar er ngii a ongalek er ngii? Ngngera el tekoi a lesemeriar me a lechub e ngbekikl er ngii? Chouaika el tekoi a kmal sebechel el ngosukau el mo ungil el mengedecheduch er ngii er a uriul. Ngdirrek el ungil el mlechesii sel taem el mkilengei el lmuut el mong me a dirrek el nger er sel ker el kirem el mo onger er ngii.
4. Ngera uchul me ngkired el melemolem el blak a rengud el oldingel er tirke el mle semeriar?
4 Molemolem el Blak a Rengum: A Satan a kmal diak el meterob el melasem el melai “a ikel tekoi el ulebriid ra rengrir” a rechad. (Mk. 4:14, 15) Me a leuaisei, e lak bo lemechitechut a rengum a lsekum e ngmeringel er kau el metik er a chad el mle semeriar er a uchei. Ngdiak el soam el luchesii a babier el mo er ngii me a lechub e di mlechesii a kedeb el babilengem e mnguu el loia er a cheungel a chesimer? A ta el odos el mesiou el mui el taem a ulemuchel el mesuub el obengkel a ta el redil er a medal a tuangel er a blil, engdi a uriul e ngmlo diak el sebechel el metik er ngii, me nglilechesii a babilengel el mo er ngii el redil. Me sel taem er a lebo er ngii a techellel el mesang er a blil, e ngii el redil a uluuchais er ngika el odos el kmo ngkmal rirtechii a rengul tia el omerellel el ulechotii a klemeriarreng el mo er ngii. Me ngdi ua blekerdelel a ralm er a klemerang el melubs er a tane, kid me ngdirrek el sebeched el mo melechesuar a deurreng sel domes er a rechad el duubech e mukeroul el mo meklou el chad er a tekingel a Dios, e dirrek el “mourodech el dersokedei, ma dersokolem, ma derdart.”—Mk. 4:20.