Lmuut el Mo Ungil a Duch er Kid el Ngar er a Omesiunged​​—Mluches a Record er Tirke el Semeriar

“Bo mkerekikl er kau, ma tekoi el molisechakl.” (1 Ti. 4:​16) Tia el mlukrael el uleklatk er a apostol el Paulus el mo er a Timothy a meketeklii el kmo, a dirk blo doldingel a obliil me a lechub e kede meketeketang el mesiou, e ngkired el melasem el olengeriakl. Me a beches el suobel el dai er ngii a kmo “Lmuut el Mo Ungil a Duch er Kid el Ngar er a Omesiunged” a mo tuobed er a Omesiunged el Kirel a Renged el mo ngosukid el olengeriakl. A derta el suobel a mo mesaod er a klou a ultutelel el duch e meskid a bebil el ulekrael er a rolel a bo doruul er ngii. Ngar er a chelsel a buil, e a rokui el chad a lolisiich er tir el mo kerekikl er seikid el ileakl el duch. E a uriul er a ulebengelel a buil, e ngmo er ngii a suobel er a Miting el Kirel a Berkel a Klumech el meskid a techall el mo ouchais er a rolel e kede melisiich er a rokui el chad el mo kerekikl er tia el ileakl el duch. Chelecha el buil e kede muchelechel el mo meluches a record er tirke el semeriar.

A Uchul me Ngklou a Ultutelel: A bo doltaut er a urered, e ngkired el meruul a lmuut el betok er a di domerk er a klumech. Ngkired el lmuut el mo oldingel er tirke el mle semeriar e olisechakl er tir, el melubs er a ralm aike el tane er a klemerang el dullalem. (Mt. 28:​19, 20; 1 Ko. 3:​6-9) Tia belkul a kmo kede lmuut el mo osiik er ngike el chad, e mengedecheduch el kirel aike el tekoi el lesemeriar er ngii, el oltirakl er sel mle cheldechedechad er a uchei. Me a leuaisei, e sel debetik er a chad el semeriar, e ngklou a ultutelel a doluches a tekoi el kirel ngika el chad.