Lmuut el Mo Ungil a Duch er Kid el Ngar er a Omesiunged—Olisechakl er a Rebeches el Chad

A Uchul Me Ngklou a Ultutelel: A rebeches el disaiplo er a Jesus a mle kirir el oltirakl “a ikel rokui” el tekoi el lullekoi, el uldimukl er sera lolisechakl a klemerang el mo er a rebebil. (Mt. 28:19, 20) A ruumesingd el beches el chad a mla mo sebechir el mo teloi er a Skuul el Kirel a Urerel a Dios e dirrek el mla mo sebechir el omerk a klumech er a ngii di el taem el mo er a rechad er a blirir me a resechelirir. E sel lorael el mo klou a omereng el saul er tir el kirel aike el bla lesuub e bo lodengei el kmo a Jehovah a soal a rokui el chad a bo lodengelii a ungil chais, e ngmo sorir el teloi er a ureor er a berkel a klumech. (Rom 10:13, 14) Me a uriul er a lenguu a kengei el mo ta er tirke el dirkak el metecholb el publisher, e a ungil el osisechakl a mo ngosuterir el mo oba ulterekokl el reng sel lomuchel el olengeriakl er a omesiungir.—Lk 6:40.

Rolel a Moruul er Ngii:

Mngesuterir tirke el beches el publisher me lengai aike el babier el bo lousbech el mo omerk er a klumech e lolisechakl a klemerang. E mochotii a rolel a omongetmokl er a tim er a odingel e mosaod er a derta er aike el babier el molab.
Mdak el terung, e mngiltii a ta er a rolel a dongedecheduch er a chad sel doldingel a obliil el ngar er a Omesiunged el Kirel a Renged e mosuub er ngii. Molisiich er a beches el chad me loltobed er a cheldechedechal el di ousbech a tekingel. E mosuub aike el setting el ngar er a Ministry School el babier, er a 82 el llel, el blechoel el duubech er a basio el moldingel er ngii. Momeklatk er ngii er a klungel a ultutelel a doubail a ungilbesul el bail e bo lungil oketmeklel a bedenged.—2 Ko. 6:3, 4.
Molisechakl er tir el mo olengeriakl. Mochotii a beches el publisher a territory card, e molisechakl er ngii er a rolel a lousbech a house-to-house record. Motebedii a rolel a doruul er tiang me a rolel a doluches a tekoi el kirir tirke el semeriar el chad el debetik er tir. E molisechakl er ngii el mo meduch el ousbech er a jw.org sel lomerk a klumech me a Good News for People of All Nations el babier. Mngesuir el mo meduch el mekurulii a klemeriarreng er tirke el semeriar el lebetik er tir.—1 Ko. 3:6.
Bo moba kllourreng, e mchat e molisiich er tir. (Osi. 25:11) E mochotii a ungil el kerebai. E a blakerreng er kau me a klemeriarreng er kau el molecholt er ngii a ngar er ngii a bo lerellii er aike el merael el mei er rak.

Molasem er Tiang er Chelecha el Buil:

Sel moldingel a obliil el lobengkel a chad el mulsuub el obengkel, e mnguu el mo oldingel er tirke el semeriar el chad me a lechub e ngtirke el omosuub a Biblia el mobengterir. E ngdi a lsekum e ngdiak a chad el mulsuub el lobengkel, e molengit er a diak el lsal ngar er ngii a duch er ngii el publisher el mo oureor el lobengkem.