Rolel a Dolisechakl er a Rebeches el Chad el Mo Omerk er a Klumech
1. Ngmle ua ngera uldesuem er a omkot el mo omerk er a klumech?
1 Ke dirk melatk er kau er a omkot el mo oldingel a obliil? Kulterekokl el locha kmal mle suebek a rengum e medakt. Me a omuluureor el obengkel a chad el milsuub a Biblia el obengkem me a lechub e ngkuk ta er a chad el mla mo omerk er a klumech, e ngulterekokl el mle dmeu a rengum er a ngelseuil ngii el chad. Me chelecha el bla bo meduch el omerk er a klumech, e ngmla mo sebechem el olengeseu er a rebeches el chad el dirrek el mo omerk er a klumech.
2. Ngera kirir a rebeches el mo omerk er a klumech el chad el mo mesuub?
2 A rebeches el omerk er a klumech a kirir el mo mesuub el omuchel el mengedecheduch er a rechad, e ousbech er a Biblia sel lengar er a tuangel er a obliil, e lmuut el mo oldingel er a resemeriar, e omuchel a omesubel a Biblia el obengterir a rechad. Ngdirrek el kirir el mesuub el mo teloi er aike el bek el telengtengil a ureor er a berkel a klumech, el ua berkel a klumech el ngar er a tkul a rael me a lechub e kede oldingel aike el basio er a ureor. Ngsebechem el ngosuterir el mo olengeriakl er aika el tekoi el oeak a ungil el kerebai er kau me a ungil el bo mdu er tir me te mo melasem el meruul el oltirakl.
3. Ngmekera dengesuterir a rebebil el oeak a kerebai er kid?
3 Molisechakl el Oeak a Kerebai: A Jesus a ulechotii er a redisaiplo er ngii a rolel a berkel a klumech. (Lk. 8:1; 1 Pe. 2:21) Sel moterekeklii el mo oureor el obengkel a chad el dirk mlo omerk er a klumech, e mketmeklii a kedeb el tekoi el sebechel el oltirakl el melekoi er ngii, el locha sebechem el dirrek el ousbech aike el tekoi el llechukl er a chelsel a bebil er a babilenged. E ba momuchel el nguu a kot el blai me a lechub e modekiar er sel ongingil el blai me bsa techall ngika el beches el mocha omerk er a klumech el mo sebechel el lorrenges a tekoi el omolekoi. Ngar er a omerolliu er a delongelel aika el obliil e moker er ngii el kmo ngngerang miltab el sebechel el oureor el mla er a chelsel a cheldechedecham. Tiang a sebechel el ngosuir el mesa klungel a ultutelel a doureor el obengterir a rebebil sel domerk er a klumech e rullii el mo beot er ngii el mo kongei a ngii di el tekoi el bo mdu er ngii el sebechel el mo oltirakl er a uriul er a bla lolasem er a kot el cheldechedechal.
4. Uriul er a dorrenges er a beches el omerk er a klumech el doureor el obengkel a longedecheduch er a medal a tuangel er a obliil, e ngngera sebeched el rullii el olengeseu er ngii?
4 Mouchais a Ungil el Tekoi el Sebechir el Oltirakl: A Jesus a dirrek el milsterir a redisaiplo er ngii a ulekrael er a kmo ngmekera lomerk er a klumech. (Mt. 10:5-14) Kau me ngsebechem el ngosuir a beches el dirk mlo omerk er a klumech el chad el ngar er a osisiu el rolel. Sel bo el temel el mengedecheduch e mkerekikl el orrenges er ngii. E a uriul er a omorael el mo cheroid er sel obliil, e a lsekum ke omdasu el kmo ngdirk kirel el oureor el meruul er a cheldechedechal el lmuut el mo ungil, me ngii a kmal ungil el omchetengii el kirel a ulterekokl el tekoi me a lechub e ngomeruul el multebengii er a longedecheduch. Uchei er a omomsa uldasu el kmo ngungil el lokerang, e ngsebechem el mengiil e omes el kmo ngmla olengeriakl a rolel a cheldechedechal er a ongingil el blai el bo longedecheduch er ngii me a lechub e ngdiak e le lta ngdi mle suebek a rengul a uchul me ngmilecheuid. Ngkirem el dirrek el diak mobes el kmo a rechad el lomerk er a klumech a diak di losisiu a duch er tir el rokui, e dirrek el ngar er ngii a betok el melemalt el rolel a doruul a tekoi.—1 Ko. 12:4-7.
5. Ngera sebeched el melekoi sel domuchel el mo omsa ungil el uldasu a chad el kirel a urerel er a berkel a klumech?
5 A lebebil e a beches el mla mo omerk er a klumech a oker er kau el kirel a uldesuem. Engdi a lsekum ngdiak leuaisei e di lekau el me a omuchel el melasem el olengeseu er ngii. Ngmekera e sebeched el meruul er tia el tekoi el ngar er a ungil el rolel me lak bo dolibas er ngii? A rebebil er a remeduch el omerk er a klumech a sebechir el di oker er a beot el ker el kmo, “Ngsebechek el meskau a ta er a uldasu?” me a lechub e ngkmo, “Ngua ngera uldesuem el kirel sel cheldecheduch?” Ngdirrek el sebeched el melekoi el kmo, “Sera dirk blo kumerk er a klumech, e ak miltik er ngii el mle telkib el kora uchul a omelsemai el kirek . . . , engdi tiakid el tekoi a ngilsukak. . . . ” A lebebil er a taem e ngungil el omdak el omes er a Reasoning el babier me a lechub a Omesiunged el kirel a Renged. Ngdiak el soad el oltilech er ngii er a kmal betok el tekoi el kirel el mo meruul, a uchul me ngungil el domsa uldasu el kirel a di chimo el tekoi el kirel el mo oureor er ngii er a cheldechedechal.
6. Sel dosaod er a ureor er a berkel a klumech, e ngmekera ‘deel a lororem er a deel’?
6 A Deel a Merorem er a Deel: A Timoteus, el mle ulsemuul er a ureor er a berkel a klumech, a lullisiich er ngii a Paulus el mo melemolem el blak a rengul er a tekoi er a osisechakl me a ngelsecheklel el lomeketakl er ngii er a mederir. (1 Ti. 4:13, 15) Me alta ngmla mocheuekl a betok el rak er sera omkot el mo omerk er a klumech, engdi ngkmal diak el kirem el meterob el melasem el olengeriakl a duch er kau er tia el ureor. Mnga klubelem er tirke el momerk er a klumech el obengterir, el mo lmuut er tirke el diak el sal klou a duch er tir, e mdirrek el biusech a medam el olengeseu er a rebebil el loeak a blekokeuii, el ileakl tirke el dirk beches el mlo omerk er a klumech, el mo merorem a duch er tir er a ureor er a berkel a ungil el chais.—Osi. 27:17.