Lmuut el Mo Ungil a Duch er Kid el Ngar er a Omesiunged—Bo Mungil el Kldemel a Chad

A Uchul Me Ngklou a Ultutelel: A Jesus a milsa klungel a ultutelel a doldingel el obengkel a kldemed. Me sera lodureklterir a re 70 el disaiplo er ngii el mo omerk a klumech, e nguldureklterir el derterung. (Lk. 10:1, BT) A kldemed a sebechel el ngosukid a lsekum e kede mo chelebangel er a meringel el blekeradel me a lechub e kede metitur el onger er a chad er a blai. (Oli. 4:9, 10) Ngsebechel el ouchais a tekoi el dilubech el ngar er a omesiungel me a bebil el tekoi el sebechel ngosukid el mo ungil el omerk er a klumech. (Osi. 27:17) Ngdirrek el sebechel el melisiich el okiu a ungil el cheldechedechal er a delongelel a obliil.—Fil. 4:8.

Rolel a Moruul er Ngii:

Bo mkerekikl el orrenges sel longedecheduch a kldemem. (Jak. 1:19) Sel longuiu a bades, e moltirakl er ngii el oba Biblia er kau. Tiang a mo uchul e ngmo beot er kau el ngosuir sel lousbech a ngeso.
Bo mungil el melilt er a ungil el taem el sebechem el mo teloi er a cheldecheduch. (Osi. 25:11) Me sel mobengkel a ta er a publisher el mo mesuub a Biblia, e a derta el tekingem a locha bo loba omereng el saul el kirel. Engdi sel moldingel a obliil, e a kldemem a locha soal a di lengii a mengedecheduch er sel temel. Nguaisei, engdi a lsekum e ngdirk beches el publisher me a lechub e ngmetitur el onger er a ker me a lechub a ultok, e nglocha mo oba omereng el saul el kirel a ngelsuim. Engdi sel mobengkel a chad el oldingel a obliil, oldingel er tirke el semeriar, me a lechub e kom dmak el mo mesuub a Biblia el obengkel a chad, e lak moleb er a cheldechedechal me a lechub e bo moungerachel er a cheldecheduch me a lechub e ke kuk mo mosaod er a ta er a tekoi.
Mouchais aike el dilubech el ngar er a omesiungem. Me a lsekum a lebebil er a taem e ngsebechem el msang ngike el publisher el moureor el obengkel a ngeso el mo ungil er a omesiungel, e lak momai er a rengum el ouchais er ngii. (Osi. 3:27) Ngar er a ungil el taem, e ngsebechem el omuchel el melekoi el kmo: “Ngera uldesuem er a cheldechedecham el mo er ngika el chad er a blai?” me a lechub “Ngsebechek el meskau a ngeso er a uldasu?” me a lechub “Tiakid a kulasem el meruul er ngii.” Lak mobes el kmo a rechad a oba omereng el saul sel domeklatk er tir sel lebebil er a taem, engdi ngmo mechitechut a rengrir a lsekum e kede blechoel el mesaod aike el lecheleuid er ngii.

Molasem er Tiang er Chelecha el Buil:

Uriul er a mobengkel a chad el oldingel, e mouchais er ngii el kirel a tekingel me a omerellel el rirellii el mo ungil el kldemem.