Molengeseu er Ngike el Chad el Mdak el Oldingel a Obliil
1. Kede mekerang e oukerebai er a blekerdelel a Paulus sel doldingel a obliil el obengterir a rebebil?
1 A apostol el Paulus a ulemes er a taem el lulebengterir a rekldemel er a klaumerang el kmo ngtechall el bo el kasisiich. (Rom 1:12) Sel moldingel a obliil el obengkel a ta er a publisher, e ke ousbech er tia el techall el mo melisiich er ngii e olengeseu er ngii? Ngungil a molengeseu er a chad el mdak el oldingel a obliil el oeak sel mouchais aike el tekoi el ngosukau el mo ungil el omerk er a klumech.
2. Ngera sebeched el rullii me lemengal mo ulterekokl a rengul ngike el chad el doldingel el obengkel, e ngera me tiang a klou a ultutelel?
2 Mngesuir el Mo Ulterekokl a Rengul: A rebebil el publisher a diak el ulterekokl a rengrir, me ngsebechel el me chemolt er a mederir me a rolel a longedecheduch. Ngsebeched el melisiich er tir el oeak sel dechat er tir. Ngerang a bebil er a rolel e ngsebeched el rullii a chad el mo ulterekokl a rengul? A ta el odam el oldingel a ongdibel a blechoel el ouchais er a chad el ledak el oldingel el kirel a dektel me a rolel e ngblechoel el meluluuch me bo el mesisiich er aika el chelitechetul. A kuk ta er a odam a mesaod el kirel a tekoi el rullii el mo ulterekokl a rengul el kmo: “A kot e ngkirem el mo klikmechur. A lebebil er a taem e ngkirek el meluluuch me bo el sebechek el rullii tia el tekoi.” Ngar er ngii a tekoi el mla ngosukau el mo oba ulterekokl el reng sel momerk er a klumech? Mouchais er ngii el mo er ngike el chad el mdak el oldingel a obliil.
3. Ngera sebeched el ouchais er a chad el dedak el oldingel el mo ngosuir sel loldingel a obliil?
3 Mouchais Aike el Tekoi el Bla Msuub: Ke mla metik er a beot el rolel a momuchel a cheldechedecham me a lechub a ker el kirel a tekoi el dilubech er a basio el mkiei er ngii el omeksemeriar er a chad? Ngar er ngii a rolel a cheldechedecham el bla mketmeklii el mlo uchul e ngsebechem el mengedecheduch er a rechad? Mouchais er ngike el chad el omdak. (Osi. 27:17) Sel morael el mo oldingel er a chad el semeriar, e mouchais er a uchul e ngsoam el mo oldingel er ngii me a ngera el tekoi a bo molekoi. A uriul er a omosuub a Biblia, e ngsebechem el mesaod er a uchul me ke ngileltii a tekoi, bades, me a lechub e ngsuobel el muluusbech er ngii el olisechakl er a chad el oltirakl er sel lousbech er ngii.
4. Ngera me ngkired el mo semeriar el olengeseu er tirke el dedak el omerk er a klumech?
4 A rumerk er a klumech er a irechar a dimlak di lesemeriar el olengeseu er tirke el diak loumerang e lemerekong. Te dirrek el milsang a klungel a ultutelel a lekasisiich er a delongelir. (Rel. 11:23; 15:32) A apostol el Paulus a ulsisecheklii a Timothy e dirrek el millisiich er ngii el mo ouchais er a rebebil el kirel aike el bla lesuub. (2 Ti. 2:2) Me sel lak dobes el meruul a ungil el kirir a rekldemed el Kristiano sel doldingel, e ngmo klou a deuil a rengrir me tir a mengal mo meduch el omerk er a klumech e dirrek el odeuir a rengul a Demad el ngar er a eanged.—Heb. 13:15, 16.