Mongetmokl er Kau er Chelechang el Mo Menglou er a Omesiungem
1. Ngerang a klou a ultutelel el tekoi el kirel a blsechel a Chedaol el Blsoil, e mekerang a dongetmokl er kid el kirel?
1 A bek el blsechel a Chedaol el Blsoil a meskid a techall el mo “mereng a sulel a [Jehovah].” (Psa. 109:30) Kau ke mo menglou er a omesiungem er a Ongedei el Buil el olechotel a omereng el saul er kau el kirel Ngike el Milskau a olubet? Chelechang e ngtaem el momuchel el mengetmokl er kau.—Osi. 21:5.
2. Ngmle ua ngera uldesuem er a techall el mo mesiou el auxiliary pioneer el kirel a di kesai el sikang er tia el mlo merek el Ongeua el Buil, e mle ua ngerang a uldesuir a rebebil?
2 Mesiou el Auxiliary Pioneer: Ngar tia el mlo merek el rak, e a rokui el ongdibel a mle dmeu a rengrir er sera lerenges el kirel a techall el mo auxiliary pioneer er a Ongeua el Buil el di ousbech a mekesai el sikang. A ta el odam a milluches el kmo: “Ngak a dirk ngar er a high school e dirkak betik er a rolel e ngsebechek el mo er a mui el taem el omesiou. Engdi ak mo luchesii a ngklek el mo oldingel el 30 el sikang e melasem el oldingel el 50 el sikang er a Ongeua el Buil.” A ta el odos el oureor el mui el taem a milluches el kmo: “Okedei el sikang, tia kmal sebechel el meketmokl!” Sera ltobed a subed el kirel tia el tekoi, e a ta el 80 a rekil el odos el mle pioneer er a ngar er a mong a dilu el kmo: “Tiaikid sel taem el kulengiil er ngii! A Jehovah a mera el mle medengei el kmo sel taem er ak pioneer a kot el mle ungil el taem er a klengar er ngak!” A rebebil el dimlak el sebechir el auxiliary pioneer a riruul a turrekong er tir el mo menglou er a omesiungir.
3. Ngera uchul me ngkired el melatk el mo auxiliary pioneer er a Ongedei, Ongeua me a Ongeim el Buil?
3 A Ongedei el Buil a kmal mo ungil el taem el kirel a ureor er a auxiliary pioneer e le nglmuut el mo er ngii a techelled el mo melilt el mo oldingel el 30 me a lechub e ng 50 el sikang. Ngdirrek el omuchel er a Sebadong el March 17, e ngmo er ngii a techelled el mo teloi er a ileakl el ureor el mengemedaol er a rebebil el me obengked er a Chedaol el Blsoil el mo er ngii er a April 5. A rebetok el chad a kmal mo dmeu a rengrir e le tir el milenglou a omesiungir me ngmo sorir el auxiliary pioneer er a Ongeua me a Ongeim el Buil, el oldingel el 50 el sikang.
4. Ngmekerang e sebeched el menglou er a omesiunged, e ngera mo rsel?
4 Ngar sel merael mei el temel a Omengull el Ongalek, e nglocha ungil a bo mosaod el kmo ngtecha sebechel el mo menglou er a omesiungel er a temel a Chedaol el Blsoil. (Osi. 15:22) Molengit er a Jehovah me bo lomekngeltengat aike el bo moruul. (1 Jn. 3:22) Sel monglou er a omesiungem, e ke mo oldanges er a Jehovah e dirrek el mo klou a deurreng er kau.—2 Ko. 9:6.