Ke Mo Auxiliary Pioneer?
1. Ngera me a blsechel a Chedaol el Blsoil a ungil el taem el donglou er a omesiunged?
1 A blsechel a Chedaol el Blsoil a ungil el taem el donglou er a omesiunged. Ngtaem el sebeched el melatk er a klou el bltkil a rengul a Jehovah el kilengei er a Ngelekel el mo olubet el tenget. (Jn. 3:16) Tiang a uchul e kede mo oba klou el omereng el saul e dirrek el mo soad el ouchais er a rechad el kirel a Jehovah me aike el loruul el kirel a klechad. (Isa. 12:4, 5; Lk. 6:45) Ngdirrek el taem el doldeu a rengud el teloi er a ileakl el ureor el mo mengemedaol er tirke el dekaodengei me a rechad er a beluu el mei er a Chedaol el Blsoil el obengked. E a uriul, e kede melasem el omekeroul er tia el klemeriarreng er tir. Me kau ke mo menglou er a omesiungem el oeak a bo mteloi er a ureor er a auxiliary pioneer er a Ongedei, Ongeuang, me a lechub a Ongeim el Buil?
2. Ngera me a Ongedei el Buil a kmal ungil el taem el bo mteloi er a ureor er a auxiliary pioneer?
2 Mrellii a Ongedei el Buil el Mo Ileakl el Buil: A Ongedei el Buil a kmal ungil el taem el bo mteloi er a ureor er a auxiliary pioneer. Tirke el mo meruul er tiang a sebechir el melilt el mo oldingel el 30 me a lechub e ng 50 el sikang. A lsekum a odngelel ngike el odam el oldingel a ongdibel a mo er ngii er a Ongedei el Buil, e tirke el auxiliary pioneer a sebechir el mo er sel miting er tirke el ngar er a mui el taem el omesiou me tirke el special pioneer. A ureor el mo merous a siotaikeng er a Chedaol el Blsoil el mo er ngii er a Ongeru el Ureor el March 26, 2013, a bla lekemengetii me ngmo omuchel er a March 1. Ngar er ngii a 5 el Sebadong me a Sandei er a chelsel a Ongedei el Buil me nglocha ungil a molatk el mo teloi er tia el ureor e mrellii tia el buil el mo ileakl el taem er a chelsel a rak.
3. Ngera sebeched el meruul el mo menglou er a omesiunged?
3 Mongetmokl er Kau er Chelechang: Chelechang e ngtaem el momes er a schedule er kau e mesa el kmo ngera el tekoi a kirem el meruul me bo el sebechem el pioneer. Ngklou a ultutelel el kirel a telungalek el kaingeseu. Me a leuaisei, e mousbech er a temel a Omengull el Telungalek el mo mesaod a turrekong er kemiu e mrellii a schedule er kemiu. (Osi. 15:22) Lak bo el mechitechut a rengum a lsekum e ngdiak el sebechem el auxiliary pioneer. Kau ngsebechem el remuul a temem me bo el sebechem el oldingel el kemanget el taem? Ngsebechem el dochelii a ta er a sils el bo moldingel a obliil?
4. Ngera el klungiaol a mo er ngii e le kid el menglou er a omesiunged er a Ongedei, Ongeuang me a Ongeim el Buil?
4 Me sel donglou er a omesiunged er a Ongedei, Ongeuang me a Ongeim el Buil, e ngmo klou a deurreng er kid e le kid el mesiou er a Jehovah e merous el mo er a rebebil. (Jn. 4:34; Rel. 20:35) E a ngaruchei er ngii, aike el tekoi el doruul a rullii a Jehovah el mo dmeu a rengul.—Osi. 27:11.