Lak Momdasu el Kmo Ke Metitur
1. Ngera me a rebebil a omai er a rengrir el mesuub er a Biblia el obengkel a chad?
1 Kau ke omai er a rengum el mesuub er a Biblia el obengkel a chad e le komdasu el kmo ke metitur el meruul er tiang? A Moses me a Jeremia el blak a rengrir el mesiungel a Dios er a irechar a dirrek el ulemdasu el kmo ngdimlak el sebechir el kutmokl a ngerechelir. (Exo. 3:10, 11; 4:10; Jer. 1:4-6) Me a rebetok el chad a omdasu el uaisei. Me te mekerang e mo mesisiich er a chouaitia el uldasu?
2. Ngera me ngdiak el kired el di oldingel a obliil e domdasu el kmo ngungiang e debechititerir a rebebil me losuub a Biblia el obengterir a rechad?
2 Lak dobes el kmo a Jehovah a diak longerechir er kid el mo meruul aike el diak el sebeched. (Psa. 103:14) Me ngsebeched el kutmeklii tia el ngerecheled el meruul er a remo disaiplo e ‘olisechakl er tir.’ (Mt. 28:19, 20) A Jehovah a dimlak di lebesterir a rechellimosk me a lechub a redachelbai el chad tia el ileakl el techall. (1 Ko. 1:26, 27) Sei a uchul me ngdiak el kired el di oldingel a obliil e domdasu el kmo ngungiang e debechititerir a rebebil me losuub a Biblia el obengterir a rechad.
3. Ngmekerang a Jehovah a lomekduch er kid me bo el sebeched el mesuub a Biblia el obengkel a chad?
3 A Jehovah a Omekduch er Kid: A duch er kid el mo meruul er a remo disaiplo a mla er a Jehovah el mei. (2 Ko. 3:5) Ngoeak a cheldebechelel e ngmla osisecheklid a klemerang er a Biblia, el tirke el kot el mellomes a rengrir el chad er tia el beluulechad a diak lodengelii. (1 Ko. 2:7, 8) Ngmla kutmokl a rekord er a rolel a lolisechakl ngike el Klou el Sensei el Jesus me bo el sebeched el oltirakl. Ngdirrek el olisechakl er kid el okiu a ongdibel, e mla meskid a babier el sebeched el ousbech el olisechakl el kirel a Biblia. Ngmla meskid a Biblia Olisechakl el babier el dousbech er ngii el olisechakl er a klemerang el ngar er a bleketakl e beot el rolel. Me ngdiak domdasu el kmo ngmeringel a dosuub a Biblia el obengkel a chad.
4. Ngera me ngsebechel mo ulterekokl a rengud el kmo a Jehovah a mo ngosukid?
4 A Moses me a Jeremia a mle sebechir el kutmokl a ngerechelir el okiu a ulengesuil a Jehovah. (Exo. 4:11, 12; Jer. 1:7, 8) Kid me ngdirrek el sebeched el olengit er a Jehovah me lengesukid. E le sel dosuub a Biblia el obengkel a chad, e ke dolisechakl er ngii a klemerang el kirel a Jehovah e tia odeuir a rengul. (1 Jn. 3:22) Me a leuaisei, e mrellii a turrekong er kau el mo mesuub a Biblia el obengterir a rechad e le ngkmal ungil el ureor el mo uchul a deuil a rengud.