Lak Momdasu el Kmo Ke Kmal Mechesang
1. Ngera me a rebebil a omai er a rengrir el mesuub a Biblia el obengkel a chad?
1 A rebebil a omai er a rengrir el mo mesuub a Biblia el obengterir a rechad e le te kmal mechesang. A dosuub el obengkel a chad a ousbech a taem. Ngkired el mengetmokl er kid el kirel a omesubed, e mo mesuub el obengkel, e ngosuir me bo el sebechel el mo mesisiich er a mondai er ngii. A apostol el Paulus a dilu el kmo nguluusbech er a klengar er ngii el mo ngosuterir tirke el ngar er a Thesalonika el mo medengelii a Jehovah. (1 Th. 2:7, 8) Ngmekerang e sebeched el mesuub el obengkel a chad a lsekum e kede kmal mechesang?
2. Ngmekerang a bltkil a rengud el mo er a Jehovah a lomekrael er a rolel a dousbech a temed?
2 A Dosiou er a Jehovah a Ousbech a Taem: Ngklemerang el kmo a omesiunged me a omengull er kid a ousbech a taem. El uai tiang, kede ousbech a taem el mo er a miting, e mo oldingel, e menguiu er a Biblia, e meluluuch. A bechiil el chad el kmal mechesang a dirrek el dmeu a rengul el kutmeklii a taem el mo obengkel a bechil. Me ngkired el ‘mo ungil el ousbech’ a taem el mo mengull er a Jehovah e le kid el betik a rengud er ngii. (Efe. 5:15-17; 1 Jn. 5:3) A Jesus a dilu el kmo a klou a ultutelel el telengtengil a omesiunged a ureor er a omeruul el disaiplo. (Mt. 28:19, 20) A dolebedebek er tiang a mo ngosukid me lak domai er a rengud el mesuub a Biblia el obengkel a chad.
3. Ngera sebeched el meruul er ngii a lsekum e ngdiak el sebeched el mesuub a Biblia el obengkel a chad?
3 E kuk mekerang a lsekum e ngkired el oureor me a lechub e ngngar er ngii a sechered me a lechub e ngngerecheled er a ongdibel? A rebebil el publisher el blechoel el di dibus, a mesuub a Biblia el obengterir a rechad el okiu a dengua me a lechub e ng computer. E tirke el ngar er ngii a secherir a kuk melekoi er tirke el losuub el obengterir me lemei er a blirir el kirel a omesubir. A rebebil a kuk mla olengit er a reblak a rengrir el publisher me lomtechei er tir e losuub el obengkel a chad a lsekum e ngdiak el sebechir.
4. Ngera el klengeltengat a mo er a ngii sel dosuub a Biblia el obengterir a rechad?
4 A Paulus a kmal mle dmeu a rengul e le nguluusbech a temel me a klisichel el olengeseu er a rebebil el mo suubii a klemerang. (Rel. 20:35) Me sera lolatk el kirir tirke el rokui el lullengeseu er tir el ngar er a Thesalonika, e ngmlo oureng a sulel a Jehovah. (1 Th. 1:2) Ngsebechel el mo klou a deuil a rengud er a omesiunged a lsekum e ngdiak debechei a chelsengud me bo el uchul e lak dosuub a Biblia el obengterir a rechad.