Ungil el Omengetmeklel Aike el Beches el Tract!
1. Ngera el tekoi er a omesiunged a ngar er ngii a beches el omengetmeklel?
1 A kleim el beches el tract a mlotobed er aike el 2013 el ‘A Tekingel a Dios a Klemerang!’ el District Convention. Sel Chisel a Renged No. 38 el dai er ngii a kmo “Ngmera el Sebechir a Rulekoad el Lmuut el Me Ngar?” a dirrek el mlo uldak er aika el tract. Aika el kllolem el tract a ngar er ngii a beches el omengetmeklel. Ngera uchul me ngmlo er ngii a beches el omengetmeklel aika el tract? Ngmekerang a dousbech a beches el omengetmeklel aika el tract sel doldingel a obliil?
2. Ngera uchul me ngmlo er ngii a beches el omengetmeklel aika el tract?
2 A Uchul a Beches el Omengetmeklel: A ungil el cheldechedechad sel doldingel a obliil a uldimukl er aika el eua el tekoi: (1) Moker er a uldesuel el mo omuchel er a cheldecheduch. (2) Mosaod er a ta er a Bades. (3) Mnguu a babier el msa chad er a blai me longuiu er ngii. (4) Moker a ker el sebechem el mo onger er ngii sel mluut el mong, e mketmeklii a taem el mluut el mong. A beches el omengetmeklel aika el tract a ngosukid el mo beot er kid el oltirakl aika el eua el tekoi.
3. Ngmekerang a dorous aike el beches el tract sel doldingel?
3 Rolel a Dousbech: (1) Uriul er a omoutkeu er a chad, e mochotii sel ker el ngar er a medal a tract, e moker er a uldesuel. (2) Bekengii a tract, e mosaod er sel “Aike el Lolekoi a Biblia.” Monguiu er a bades er a Biblia a lsekum e ngsebechel. A lsekum e ngar er ngii a temel, e mosaod er sel “A Belkul Tia el Tekoi el Kirem.” (3) Bsang a tract, e molisiich er ngii me bo longuiu er ngii er sel ungil el temel. (4) Uchei er a omorael, e mochotii a ker el ngar er a ikrel er cheungel sel “Tekoi el Sebechem el Melatk” e mketmeklii a taem el mluut el mong el mo mesaod er a nger er a Biblia.
4. Ngmekerang a dousbech aike el beches el tract sel doldingel er tirke el semeriar?
4 Ngdirrek el beot er kid el lmuut el mo oldingel er a chad el semeriar. Mousbech aike el bades el ngar er a ikrel tia el tract el mo onger er sel ker el muleker er ngii er sel mlo merek el odngelem. A uchei er a omorael, e mtetkii a siasing er a Ungil Chais el babier, e mochotii er a chad er a blai tia el babier me a suobel el mesaod a lmuut el betok el kirel a tekoi el bo mosaod er ngii, e bsang a babilengel. Me a lsekum e nguu a babier, e mketmeklii a taem el mluut el mong el mo mesaod er tia el babier. Ke mla omuchel er a omesubel a Biblia! A lsekum e ngdiak obsang tia el babier, e ngsebechem el msang a kuk ta er a tract e mketmeklii a taem el mluut el mong el mo mesaod er ngii el obengkel a chad er a blai.
5. Ngua ngera klungel a ultutelel aika el tract el ngar er a omesiunged?
5 Kede mla ousbech a tract el ngar er a omesiunged el kuk betok er a 130 el rak. Me alta ngmla mengodech a meklungel me a omengetmeklel, engdi ngkmal dirk sebeched el ousbech el omerk er a klumech. Me bo el sebeched el mo ungil el ousbech a beches el omengetmeklel aika el tract el merkii a klemedengei er a Biblia er a beluulechad el rokir.—Osi. 15:7a.