Kerrir A Rechad

◼ Ngera kirir a rengalek el mesuub me lemukeroul a mesisiich el deleuill er tir me a Jehovah?

A ruungalek el Kristiano a betok a loruul el omekeroul er a rengelekir el mo “oba omellach ma osisechakl er a Rubak.” (Efe. 6:4) El ua tiang, a ruungalek a mla metik er ngii el kmo ngmo uchul a klungiaol a ledak el mesaod a bades er a bek el sils el obengterir a rengelekir sel tutau. Sel temel a omengull el telungalek me a kuk bebil er a taem, e ngsebechir el dmak el omes e mesaod er a ta el video, mesaod er a ileakl el tekoi er a Young People Ask, otebedii a ta er a sibai er a cheldecheduch er a Biblia, me a lechub e te melasem aike el tekoi el bo lolekoi. Engdi a bo el sebechir a rengelekir el ‘ngosechekl el mor a osisechakl el kirir a re ultebechel el chad,’ e ngkirir el mosisechakl a dmolech el klemerang er a Biblia.​—Heb. 6:1.

Ka molatk aike el tekoi el dolisechakl er tirke el ngar er a basio el domerk a klumech er ngii. Sel dekot el mengedecheduch er a chad me a lechub e deluut el mo oldingel er ngii, e kede blechoel el melasem el omuchel a omesubel a Biblia el ousbech er a Ngerang Mera el Lolisechakl a Biblia? el babier. A uriul er a bo lemerek tia el babier, e kede ousbech er a “Keep Yourselves in God’s Love.” E ngera uchul? A Biblia Olisechakl el babier a mesterir a uchetemel a klemedengei er a Bades. A “God’s Love” el babier a olisechakl er tir a rolel e ngsebechir el oltaut a omellach er a Biblia er a klengar er tir er a bek el sils. A omesubel aika el teblo el babier a ngosuterir el mo ‘mesisiich el ulak a delongelir’ tir me a Kristus e bo el “mesisiich el oumerang.” (Kol. 2:6, 7) Aika el babier ngdiak el dilerrek el sebechel el mo uchul a klungiolir a rengeleked? Tir me ngdirrek el kirir el mosisechakl el kirel a olubet, Renged, me a blekerdelir a rulekoad. A rengalek a dirrek el kirir el mo medengelii a uchul me a Dios a omechei a ringel e mekerang a bo lodengei el kmo kede kiei er a uriul sils. Ngkirel el mo ulterekokl a rengrir el kmo a Resioning er a Jehovah a oba klemerang. A rengalek a kirir el mo medengei a omellach er a Biblia me a rolel “e ng sebechir el tiriter a ungil ma mekngit.” (Heb. 5:14) Nguaisei, me a ruungalek a kirir el melatk er a rengelekir el kirel a rekrir me a duch er tir er a omesuub. Engdi a rebetok el ngalek a sebechir el omuchel el mesuub el kirel a dmolech el klemerang er a Biblia sel dirk lemekekerei.​—Lk. 2:42, 46, 47.