Moltirakl a Kerebai er a Reprofet—Sefania
1. Ngera el blekeradel a mla er ngii er sel taem el lulsiou a Sefania el profet, e mekerang e ngii a ungil el kerebai el kired er chelechang?
1 A bekord el 661-660 B.C.E., e a teletelel a omengull er a Baal a mle bleketakl el ullecholt er a Juda. A mekngit el King el Amon a dirk lulekodir, e chelechang e a ngeasek el King el Josia a mengedereder. (2 Kr. 33:21–34:1) Seikid el taem e a Jehovah a tiltkii a Sefania el mo ouchais er a kerrekerilel. Me alta e a Sefania a mle chad er a blil a king er a Juda, engdi ngdimlak longitechut a klemechel a Jehovah el uleltngakl a omengedereder er a Juda. (Sef. 1:1; 3:1-4) Me ngdi osisiu, kede melasem el oukerebai er a blekengel a Sefania e diak dekengei er a rechedad me letemellii a omengull er kid el mo er a Jehovah. (Mt. 10:34-37) Ngera el klumech a luluuchais er ngii a Sefania, e ngera dilubech?
2. Ngera kired el meruul me bo deselebechakl er a sils er a cheldechuderreng er a Jehovah?
2 Mosiik er a Jehovah: Ngdi Jehovah a sebechel el olsobel er a rechad er a sils er a cheldechuderreng er ngii. Sei a uchul me a Sefania a millisiich er a rechad er a Juda el mo osiik er a Jehovah, osiik a llemalt, e osiik a delemedemek er a ledirk el ngar er ngii a taem. (Sef. 2:2, 3) A osisiu el tekoi a klemerang er chelecha el taem er kid. Ngdi ua Sefania, e kede melisiich er a rechad el mo osiik er a Jehovah, engdi kid me ngdirrek el kired el meruul a tekoi me lak ‘dobult e dikea doltirakl er a RUBAK.’ (Sef. 1:6) Kede bai osiik er a Jehovah el oeak sel dekerekikl el mesuub a Tekingel e doluluuch el kirel a ulekrael er ngii. E osiik a llemalt el oeak sel dekiei el klikiid a blekerdelel a klengar er kid. E dirrek el osiik a delemedemek el oeak a domekeroul er a blekeradel el olengesenges e demereched el kongei el oltirakl a ulekrael el mla er a cheldebechelel a Jehovah.
3. Ngera uchul me ngkired el melemolem el oba ungil el uldasu el kirel a omesiunged?
3 Ungil el Tekoi el Dilubech: A klemechel a Sefania a millisiich er a rebebil el ngar er a Juda el ileakl a ngeasek el Josia, el ngii a ulemuchel el osiik er a Jehovah er a ledirk lekekerei el buik. A uriul e a Josia a miluchelii a klou el ureor el mengikiid er a beluu er a omengull el bleob el chelid. (2 Kr. 34:2-5) Me chelechang, e alta bebil el tane er a Renged a ruebet er a rael, bedbeduul el chutem, deliul a tochedulik, engdi a bebil a ruebet er a ungil chutem e mo bekerredechel. (Mt. 13:18-23) Ngulterekokl a rengud el kmo a Jehovah a mo omekngeltengat a urered a dolemolem el mechesang el omerk a tane er a Renged.—Psa. 126:6.
4. Ngera uchul me ngkired el oltirakl er a tekoi el kmo, “RUBAK a kmo, ‘Msall e mongiil’”?
4 A rebebil el ngar er a Juda a ulemdasu el kmo a Jehovah a diak a ngera el bo lerellii. Engdi a Jehovah a ulterekeklii el mo er a rokui el chad el kmo a klou el sils er ngii a kmedang. (Sef. 1:12, 14) E a osobel a di mo er tirke el osiik a osebechakl er ngii. (Sef. 3:12, 17) Me chelecha el “RUBAK a kmo, ‘Msall e mongiil,’” e bo el deu a rengud el dmak el obengterir a rekldemed el mesiou er a klou el Dios er kid!—Sef. 3:8, 9.