Ak Mekerang e Moues er a Jehovah?
1. Ngmekerang a Biblia e uai a dirk?
1 Kau ke mekdekudem el omes er a dirk? A ruumesingd er kid a meruul el uaisei er a bek el sils e le ngosukid el mo mes a tekoi el kirel a klebekeled el kired el sumechokl. A Biblia a lomekesiu er ngii el mo er a dirk. A omengiuel a Tekingel a Dios a rullid el mo omes a blekerdeled, el ike el lomes a Jehovah. (1 Sa. 16:7; Jak. 1:22-24) A Tekingel a Dios a sebechel el “merriter a urungulel ma uldesuel a rengul a chad.” (Heb. 4:12) Ngmekerang e sebechel a omengiued me a omelebedebeked er a Biblia er a bek el sils e ngosukid el mes a tekoi el kired el melisiich me bo dungil el omerk er a klumech?—Psa. 1:1-3.
2. Ngmekerang a Biblia e lengesukid el mo merriter er kid?
2 Mousbech er a Biblia el ua Dirk: A cheldecheduch er a Biblia el kirir a reblak a rengrir el mesiungel a Jehovah a osisecheklid el kmo ngera el blekeradel a klebokel er a osengel. El ua tiang, a David a ulechotii a blakerreng el kirel a ngklel a Dios. (1 Sa. 17:45, 46) A Isaia a mle bekeu el kongei el mo omerk er a klumech er a mekngit el basio el domerk er a klumech er ngii. (Isa. 6:8, 9) A dmolech el bltkil a rengul a Jesus el kirel a Demal el ngar er a eanged a rirellii el mo omes er a omesiungel el uchul a ulengull me a deurreng er a bai loberaod el ureor. (Jn. 4:34) A Rekristiano er a irechar a mle blak a rengrir el omerk er a klumech, e mle ultuil er a Jehovah, e tilbir el diak lemeterob el meruul er ngii. (Rel. 5:41, 42; 2 Ko. 4:1; 2 Ti. 4:17) A dolebedebek el kirel aika el kerebai a ngosukid el mo merriter er kid me dolengeriakl er a omesiunged el mo er a Dios.
3. Ngera uchul me ngdiak el kired el mengudel a blachel el kirel a dosmechokl a blekerdeled?
3 Moruul a Tekoi el Mo Mesmechokl a Blekerdeled: Nguaisei, ngdiak a ultutelel a domes er a dirk e desa telemall e lak desemecheklii. Ngsebeched el olengit er a Jehovah me lengesukid el mo ungil el merriter er kid e lengesukid el mo sumechokl aike el kirel el semechekill. (Psa. 139:23, 24; Lk. 11:13, BT) E le a taem el medechel a kmal kedeb me a klengar er a rechad a uldimukl er ngii a uchul me ngkired el diak dongudel a blachel el kirel a dosmechokl a blekerdeled.—1 Ko. 7:29; 1 Ti. 4:16.
4. Ngera duubech el mo er a chad el kerekikl el omes er a Tekingel a Dios e mo oltaut aike el bla lesuub?
4 A blekerdelel a chad er a chelsel, el ike el lomes a Jehovah, a lmuut el meklou a ultutelel er aike el lomes er a ikrel. (1 Pe. 3:3, 4) Ngera mo duubech el mo er a chad el kerekikl el omes er a Tekingel a Dios e mo oltaut aike el bla lesuub? Ng “diak di lorrenges e lechoit, e bai ngmai e otaut er omeruul, ingikel chad ia bo lomekngeltengat er ngii a Dios er a ikel loruul.” (Jak. 1:25) Choi, ngmo dmeu a rengud e ungil el mesiou e le kede “domes ra klebkellel a Rubak el ua domes er ngii ra dirk.”—2 Ko. 3:18, BT.