Beches el Chelitakl el Kirel a Omengull!
1 Ngar sel dirk mlo merek el annual meeting er a Watch Tower Bible and Tract Society of Pennsylvania, el mla er ngii er a October 4, 2014, e ngmildung a uldasu el mo meruul a omelodech el mo er tia el blil a chelitakl el dousbech er ngii er chelechang. Tiang a ulterekokl el kmal mle ungil chais! Tirke el rokui el mla er sei a mluklatk el kirel a klungel a ultutelel aika el chelitakl er a Renged el ngar er a omengull er kid.—Psa. 96:2.
2 Ke locha mo oker el kmo, ‘Ngera uchul me ngkired el melodech er a blil a chelitekled?’ Ngar er ngii a bebil er a uchul. A kot el uchul, a klemedengei er kid er a Bades el melemolem el merael mo bleketakl a uchul me ngar er ngii a lerellii er a omeldechel a tekoi er a chelsel a chelitekled. (Osi. 4:18) A ongeru el uchul tia el omelodech: A betok el rolel a dolekoi a tekoi el luluusbech er tia el blil a chelitakl er chelechang a milengai er sel dimla oidel a Biblia er kid el New World Translation. A tekoi el ngar er a chelsel a chelitakl a kirel el mengodech el mo oltirakl aike el tekoi el ngar sel beches el oidel a Biblia er kid. Ngkmal klou el ureor a usbechall el mo omekbeches aika el rokui el chelitakl a uchul me te kilengei el di mlo melechel a bebil er a beches el chelitakl el mo er aika el dimla chelitekled.
3 Ngkired el mengiil el dimerekmo letobed a beches el blil a chelitakl e bo el sebeched el ousbech aika el beches el chelitakl? Ngdiak. Ngkmal dmeu a rengud el mo ouchais er kemiu el kmo ngar er aika el merael el mei el buil, e a bebil er a beches el chelitakl a mo motobed er a Web site er kid, el jw.org. Sel letobed a beches el chelitakl el ngar er a omelekinged, e ngmo beldukl er a ulebengelel a suobel er a Miting el Kirel a Berkel a Klumech el obengkel a olangch el kmo “beches el chelitakl.”
4 Rolel a Mosuub Aika el Beches el Chelitakl: Ngsebechel el kmal mo meringel a dosuub a beches el chelitakl. Engdi nguai ngike el milluches er a psalm, ngsoad el mo klou a ngered el mengitakl sel dengar aike el miting er a ongdibel e ‘lak di deluk.’ (Psa. 30:12) Me sel omosuub a beches el chelitakl, e moltirakl aika el beot el rolel.
Momelekl el orrenges a mla rekord el ongngak er a piano el kirel a beches el chelitakl el mo tuobed er a Web site er kid. A cherengel a taem el morrenges er a ongngak er a chelitakl e ngmo beot er kau el mereched el mo medengelii.
Mosuub e momelekl a tekoi el ngar er a chelitakl e molasem el mo medengei el rokui.
Mongitakl a chelitakl el obengkel a ongngak e molemolem el mesuub er ngii el dimerekmo a obo meduch el mengitakl er ngii.
Molasem aike el beches el chelitakl a lebebil er a taem er a Omengull el Telungalek er kemiu el dimerekmo bo el sebechiu el mo ungil medengei.
5 Ngar er aika el merael el mei el buil el bo dongitakl er a beches el chelitakl el mo mengesimer er a Miting el Kirel a Berkel a Klumech, e a ongdibel a kirel el ta el bo el rengesii a mla rekord el ongngak er a uchei er a lebochu er ngii a chelitakl. E sola e a ongdibel a mochu mengitakl el obengkel a ongngak, el di ua bek el chelitakl.
6 A dongitakl er aika el miting er kid a meskid a klou el techall el mo oldeu a rengud el ngar er a kltarreng sel dedak el rokui el mengitakl el oldanges er a Jehovah. Me ngdiak el kirel el mo blekerdeled el mekiis er a kingelled el diak a ungil uchul sel sekum e ngmo er ngii a chelitakl er aika el miting er kid a Rekristiano.
7 Ngar er ngii a kuk ta er a rolel el sebeched el olecholt a melemalt el omereng el saul er kid el kirel a chedaol el chelitekled. Sel lengar er ngii a meklou el ongdibel, e ngmerael a ongngak er a uchei er a lomuchel a bek el prokuram. A reblak a rengrir el rudam me a rudos er a bek el merekelel a beluulechad a eru el taem er a ta el rak el di tir el harau a omerollir el mo er a Patterson, New York, el mo meruul a kmal ungil el ongngak el dousbech er a omengull er kid. Sei a uchul, me a odam el oungerachel sel longemedaol er kid el mo melai a kingelled e dorrenges a mla meketmokl el ongngak, e ngkired el oltirakl. E le doruul el uaisei e ngmo ngosukid el kutmokl a rengud el kirel aike el suobel el bo dorrenges.—Esra 7:10.
8 A ta er aika el beches el chelitakl a dai er ngii a kmo “A Renged a Mla Meketmokl—Me Le Mei!” Tia el chelitakl el tilobed er sel dirk mlo merek el annual meeting, a milluches el ileakl el kirel a 100 el rak er a lomuchel a Renged.
9 Aika el beches el chelitakl a ulterekokl el “ungil tekoi” el mla er a Jehovah. (Mt. 12:35a) Me derellii el mo telbiled el mesuub aika el beches el chelitakl e dongitakl el ngar er a rengud, e debsa odanges me a klebkall a Dios er kid el ngii a kmal rredemelel a ngmai aika el odanges!—Psa. 147:1.