MKIEI EL UA KLENGAR ER A REKRISTIANO
Bo el Deu a Rengum el Omerk er a Ungil Chais
Ngmla ta el molatk el kmo ngmeringel er kau el oldingel a obliil? A ruumesingd er kid a mo onger el kmo choi. E ngera uchul? E le nglocha diak a klemeriarreng er a rechad me a lechub a rechad a omtok er kid me a lechub e kede medakt el mengedecheduch er a rechad el diak dodengelterir. Nguaisei, aika el tekoi a sebechel rullid el mo diak a deuil a rengud. Engdi kid a mesiou er a “dmeu a rengul el Dios” el ngii a soal a dosiou er ngii el oba deurreng. (1Ti 1:11, NW; Psa 100:2) Me ngera edei el uchul me ngkirel dmeu a rengud el oldingel?
A kot, e kede ouchais er a klumech el ngii a meskid omelatk. Me alta ngmla mo diak a mera el omeltkir a rechad, engdi ngsebeched el ouchais er tir er a “ungil chais” el kirel a ungil klengar. (Isa 52:7) Ngdirrek el tia el ungil chais el kirel a Rengedel a Dios a meskid a deurreng. Me a uchei er a bo moldingel, e molebedebek el kirel aike el klengeltengat el mo er ngii el okiu a Rengedel a Dios.
A ongerung, e tia el ungil chais el domerk er ngii a mo uchul a klungiolir a rechad er a tekoi er a klechad me a klereng. A rechad a mesuub el mo mengoit a mekngit el omeruul e mo er ngii a omeltkir el mo kiei el diak a ulebengelel. (Isa 48:17, 18; Rom 1:16) Ngsebeched el omes er ngii el ua ureor er a search-and-rescue. Engdi alta ngar er ngii a rechad el diak el sorir el mo suobel, engdi kede di melemolem er tia el ureor el osiik er tirke el sorir a osobel.—Mt 10:11-14.
E a ongedei el ngii a kot el klou a ultutelel el uchul me kede meruul er tia el ureor, a ngii el mengebkall er a Jehovah. Ngii a omes er tia el urered el kmal klou a ultutelel. (Isa 43:10; Heb 6:10) Ngdirrek el omeskid a chedaol reng er ngii me bo el sebeched el ungil kutmeklii tia el ureor. Me bo el blak a rengum el olengit er a Jehovah el mo meskau a deurreng, el ngii a rodech er a chedaol reng. (Gal 5:22, BT) Ngokiu a ngelsuil, e kede mo mesisiich er aike el uldasu el mengitechut er kid e mo sebeched el omerk el oba blekeu. (Rel 4:31) E seikid e ngmo dmeu a rengud el omerk a klumech, alta rechad a orrenges me a lak.—Ese 3:3.
MOMES ER A VIDEO EL REGAIN JOY THROUGH STUDY AND MEDITATION, E MONGER AIKA EL KER:
Ngera uchul me ngkired el kerekikl el mesuub, alta kede mengoit er a klou el taem el oldingel er a bek el buil?
Ngoeak a ngera el rolel e ngsebeched el oukerebai er a Mary?
Ngoingerang e ke mengoit a taem el melebedebek er a Tekingel a Dios?
Ngera meskau a deurreng sel momerk er a ungil chais?