MKIEI EL UA KLENGAR ER A REKRISTIANO
Moltirakl a Llechul a Jehovah el Kirel a Ungil me a Mekngit
A Jehovah a mla kutmokl a llach el kirel a ungil me a mekngit. El uai tiang, ngkiltmeklii a chebechiil er a delongelel a sechal me a redil me di lolemolem. (Mt 19:4-6, 9) Ngouketui a rokui el bedengel a deleboes el omeruul. (1Ko 6:9, 10) Ngdirrek el mla meskid a omellach el kirel a rolel a doubail e dongetmokl er kid el ngii a rullid el mo ileakl.—Dut 22:5; 1Ti 2:9, 10.
A rebetok el chad er chelecha el taem a oltngakl a llechul a Jehovah. (Rom 1:18-32) Te bai kongei a merael a chisel el uldasu me lomekrael er a rolel a loubail me a longetmokl er tir me a tekoi el loruul. A ruumesingd a sorir a rechad a lechat a mekngit el tekoi el loruul e metengel a osengir er tirke el diak el uai tir.—1Pe 4:3, 4.
Kid el Sioning er a Jehovah a kired el bekeu el oltirakl a llechul a Dios el kirel a ungil me a mekngit. (Rom 12:9) Ngoeak a ngera el rolel? Ngkired el oba delemedemek el ouchais aike el tekoi el lekengei er ngii a Jehovah. Nguaisei, engdi ngdirrek el kired el mo kerekikl el oltirakl aika el tekoi er a klengar er kid. El uai tiang, sel dolilt a biled me a lechub e ngrolel a dongetmokl er kid, e ngungil a doker el kmo: ‘A omelilt er ngak ngoltirakl a llechul a Jehovah me a lechub e ngbeluulechad? A bilek me a rolel a omengetmeklek ngochotii el kmo ak Kristiano?’ Me a lechub e sel dolilt a prokuram me a lechub e ngmubi el bo domes, e ngungil a doker el kmo: ‘A Jehovah ngmo kongei er ngii? Ngllechul techang a lolisiich er ngii? A ongelaod el kulilt, ngmengitechut er a uldesuek el kirel a melemalt el llechul a Jehovah? (Psa 101:3) Ngmo melibas er a rechedak me a lechub a rebebil?’—1Ko 10:31-33.
Ngera me ngkmal klou a ultutelel a doltirakl a llechul a Jehovah el kirel a ungil me a mekngit? A Jesus Kristus a di kmedung e ngmo olekngemed aika el renged me a rokui el chelebirukel. (Ese 9:4-7) Ngdi tirke el meruul a soal a Dios a mo medechel. (1Jn 2:15-17) Me bo doltirakl a llechul a Jehovah el kirel a ungil me a mekngit me bo el sebechir a rechad el mes a ungil el omerelled e bo longebkall er a Dios.—1Pe 2:11, 12.
MOMES ER A VIDEO EL BECOME JEHOVAH’S FRIEND—ONE MAN, ONE WOMAN, E MOSAOD AIKA EL KER:
Ngera uchul me ngrolel a llomeserreng a dekiei el oltirakl a llechul a Jehovah?
Ngera me ngkirir a ruungalek el olisechakl er a rengelekir a llechul a Jehovah el kirel a ungil me a mekngit sel ledirk mekekerei?
Te mekerang a rengalek me a remeklou e ngosuterir a rechad el mo ngmai a klungiolir er a ungil el omerellel a Dios?