“A chutem a mla otebedii a smengel; ng Dios, el Dios er kid a mla omekngeltengat er kid.”—PSALM 67:6

Mngai a Diak a Ulebengelel el Klengeltengat er Ngike el Ulemeob

A Dios a tilbir el mora profet Abraham el kmo a ta er a ruldidellel a rsechel a mo uchul a klengeltengat el mora “bek el beluu er a beluulchad.” (Genesis 22:18) Ngika ngtechang?

A bekord el 2,000 el rak er a mla me mong, e a Dios a milsang a Jesus, el ngii a uldidellel a rsechel a Abraham, a klisiich el mo meruul a mengasireng el tekoi. Aika el tekoi a mileketeklii el kmo a telbiil el mlora Abraham a mora bek el beluu lokiu a Jesus.—Galatia 3:14.

Aika el lurruul a Jesus a ngilsuterir a rechad el mo medengei el kmo, ngii ngike el bla lengiltii a Dios el mo omekngeltengat er a rechad, e dirrek el ulechotii a rolel a bo lousbech er ngii a Dios el omekngeltengat er a rechad el diak a ulebengelel. Momtab a rolel e aika el mengasireng el tekoi el lurruul a Jesus a olecholt a bebil ungil blekerdelel.

Melatk a uldesuir a rechad—A Jesus a ulemekungil er a resmecher.

A ta el taem e a chad el chebedes a ullengit er a Jesus me lomekungil er ngii. Me a Jesus a rirtechii e dilu el kmo: “Ng soak!” Me ngdi mle mereched el mo ungil.—Markus 1:40-42.

Blekerurau—A Jesus a ulemeka er a resongerenger.

Ngdimlak el soal a rechad a lesengerenger. Ngmirruul a mengasireng el tekoi er sera lomdois blauang me a mekekerei el ngikel el mekelterir a rebetok el telael el chad. (Mateus 14:17-21; 15:32-38) Me te ulemengur e mlo er ngii a derengir.

Klechubechub—A Jesus a ullekiis er a rulekoad.

Ng “mlo chubur” a melakl el dil me ngulekisii a di ta el ngelekel e le ngdimlak a ngodech el chad el sebechel mo omekerreu er ngii.—Lukas 7:12-15.

A DIAK A ULEBENGELEL EL KLENGELTENGAT EL NGAR TIA EL CHUTEM

A Jesus a ulechotii el kmo a Dios a ngar ngii a klisichel el omekngeltengat er a rechad. Me sel lluut el mei a Jesus el ua letilbir, e Ngike el Olab a Bek el Klisiich a mo ousbech er ngii el meruul a meklou el mengasireng el tekoi er a beluulechad el rokir!

Ngmo uangera klengar el ngar tia el chutem er sel taem el Dios a mo otutii a telbilel el mora Abraham? Tirke el betik a rengrir e mengull er a Dios a mo “kiei el ngar a beluu” e mo “ungil a rengrir er a cherrungel budech.” (Psalm 37:11) “Ng dikea lluut el mor ngii a kodall, e mo diak a klengiterreng, ma langel, ma ringel.”—Ocholt 21:4.

Ngmera el klengeltengat a bo dekiei er tia el chutem el ngar er a budech el mo cherechar! Aki mengemedaol er kau me bora www.jw.org e mosuub a betok el kirel a klengeltengat el mo er ngii lokiu a omengederederel a Dios.