MKIEI EL UA KLENGAR ER A REKRISTIANO

Bo Mungil Melilt a Tekoi er a Ongelaod el Soam

Ngera uchul me ngkired el mo ungil melilt a ongelaod el soad? E le sel dolilt a mubi el bo domes, me a chelitakl el bo dorrenges, me a website el debo er ngii, me a babier el bo donguiu, me a lechub a video game el bo dousekool, e kede mocha melilt aike el tekoi el bo domekeek er a uldesued. Me a omelilt er kid a ngar ngii a lerellii er a omerelled. Ngklengiterreng, e le oumesingd el tekoi er a ongelaod el ngar ngii er chelechang a uldimukl er ngii a tekoi el louketui a Jehovah. (Psa 11:5; Gal 5:19-21) Sei a uchul me a Biblia a mengelechel er kid el mo blechoel el melatk a tekoi, el ngii a mo kobkellii a Jehovah.—Fil 4:8.

MOMES ER A VIDEO EL WHAT ENTERTAINMENT SHOULD I CHOOSE? E MONGER AIKA EL KER:

Ngoeak a ngera el rolel e aike el klokolir tirke el gladiator er a Rom er a irechar, a osisiu el ua tekoi er a ongelaod er chelechang?
Te mekera rechedal a ongdibel a lolengeseu er a remekekerei el mo ungil melilt a tekoi er a ongelaod?
Ngmekera Rom 12:9 e ngar ngii a lerellii er a omelilt er kid er a tekoi er a ongelaod?
Ngera bebil er a ungil el tekoi er a ongelaod el ngar er a beluam?

A ONGELAOD, NGRULLID EL MO OUEDIKEL ME A LECHUB E KEDE DI CHELELLAKL?

A betok el rolel a ongelaod er chelecha el sils a osisecheklterir a rechad el mo omes me a lechub e te menguiu el kirir a rebebil er a rechad er a bai di el tir el meruul a tekoi. A mubi me a babier me a prokuram er a T.V. a olecholt a uldesuir a rebebil er a rechad, el diak el uldesued. Me alta ngdirrek el sebeched el di chelellakl e meruul aika el tekoi er a ongelaod, engdi a rebetok a mla metik el kmo sel loruul a tekoi er a ongelaod el rulleterir el mo ouedikel e nglmuut el klou a klungiolel. El ua tiang, a rebebil a dmeu a rengrir el ousekool a bebil el rolel a ongngak me a lechub e te ousunga. A rekuk bebil a sorir el milil er rikl, el ousekool a sports me a lechub e te hike me a lechub e te camp. Me a ngii di el rolel a ongelaod el dolilt er ngii, e bo ‘doruul el rokui el mo kirel odengesel a Dios.’—1 Ko 10:31.