ROLEL A DETEREBENGII A LEMELEMEL A KLTUI

4 | Bo Mesisiich Er A Kltui Loeak A Ngelsuil A Dios

A Biblia Kmo:

“Ngdi Reng a omuchel a bltikerreng, ma deurreng, ma budech, ma kllourreng, ma blekokuiirreng, ma ungilreng, ma blakerreng, ma delemedemekerreng, ma ulserechakrreng.”—GALATIA 5:22, 23.

Belkul a Bades:

Ngoeak a ngelsuil a Dios e ngsebeched el mo diak douketui er a rechad. A chedaol reng er ngii a sebechel ngosukid el mo olab a blekeradel el diak el sebechel mukeroul loeak a di klisiched. Me lak di lekid el melasem el mo mesisiich er a kltui e bai bo dultuil er a klisichel a Dios. Sel doruul uaisei e kede mo ua apostol Paulus el ngii a milluches el kmo: “A klou el klisiich a ngar a Dios el mei, el diak le ngar kemam el mei.” (2 Korinth 4:7) Ngmera el mo sebeched el melekoi el kmo: “A ngelsuik a ngar a RUBAK el mei.” —Psalm 121:2.

Sebechem el Meruul er Ngii:

“A Jehovah mla rullak el mo chad er a budech.”—WALDO

Moluluuch el mora Jehovah lolengit er a chedaol reng er ngii. (Lukas 11:13) Molengit er ngii me lengesukau el mo olecholt a ungil blekeradel. Mosuub er a Biblia aike el blekeradel el mesisiich er a kltui el uai a bltikerreng, budech, kllourreng, me a ulserechakl el reng. Mosiik a rolel e ngsebechem el mekeroul aika el blekeradel er a klengar er kau. E bo mobengterir tirke el melasem el dirrek el omekeroul aika el blekeradel. Chouai tirka el chad a sebechir el ngosukau el mo “olecholt er a bltikerreng e [meruul] a ungil.”—Hebru 10:24.

Experience er a Rechad—WALDO

Mlo Mesisiich er a Klsiberreng

A Waldo a kmal mle mekngit a ulekurulel e tia uchul me ngkmal mle klou a kltui er a klengar er ngii. Ngdmu el kmo: “Ak mle blechoel kaudechelakl ngak me a rulterau a mekngit el kar . . . A ta el taem e te mle hire er a merael chisel chad el lomekoad el mo omekoad er ngak. Ngmle sebechek el chemiis engdi ngrirskak.”

A Waldo dimlak el deu a rengul er a lomuchel a bechil el mesuub lobengterir a Resioning er a Jehovah. Ngdmu el kmo: “Ngkmal mle chetik a Resioning e mle betok el taem el kulekoi a mekngit el tekoi er tir. E tir a di mle ungil mengedecheduch er ngak.”

Uriul e a Waldo a mlo omuchel el mesuub a Biblia. Ngdmu el kmo: “Ngdimlak el beot er ngak oltaut a tekoi el kusuub. Ak kmal ulemdasu el kmo ngdiak el sebechek el mo diak lekesib a renguk.” Engdi ngngar ngii a lesilubii er a Biblia el ngildechii a klengar er ngii.

Ngdmu el kmo: “A ta er a klebesei e a Alejandro el ngii a mesuub lobengkek a ullengit er ngak el mo menguiu er a Galatia 5:22, 23. . . . A Alejandro a silodii el kmo ngdiak lultuil er a klisichek e ngbai kirek lultuil er a chedaol reng el mo omekeroul aika el blekeradel. Tia ngilsukak el mo mtebengii el kmo ngkmal sebechek el ngodechii a blekerdelek!”

Me a Waldo mla mo mesisiich er a kltui le ngii el ultuil er a klisichel a Dios. Ngmelekoi el kmo: “A rechedak me tirke el mle sechelik a kmal mechas a rengrir er a blekerdelek er chelechang. A Jehovah mla rullak el mo chad er a budech.”