ROLEL A DETEREBENGII A LEMELEMEL A KLTUI

3 | Motebedii A Kltui Er A Uldesuem

A Biblia Kmo:

“Bsa techellel a Dios me lukbeches a rengmiu e le ngodech a blekerdeliu. E seikid e kom mo medengelii a rengul a Dios er a kmo, ng ngera ungil, ma ngera odeuir a rengul, ma ngera kmal cherrungel el ungil.”—ROM 12:2.

Belkul a Bades:

A rolel a domdasu a klou a ultutelel er a Dios. (Jeremia 17:10) Me alta ngkired el melasem el diak bo dolekoi me a lechub e doruul a rolel a kltui engdi ngdiak di el tiang e lungiang. A kltui omuchel er a uldasu me a reng. Me ngkired lotobed a ngii di el rolel a kltui er a uldesued me a rengud. E seikid e ngsebeched el ‘mukbeches’ e mo mesisiich er a kltui.

Sebechem el Meruul er Ngii:

Di el kau el merriter er a uldesuem el kirir a rechad tokubets tirke el chad er a ngodech el beluu. Di lekau el oker: ‘Ngua ngera uldesuek el kirir? A kumdasu el uaisei le kmera el medengelterir me a lechub e ngmengai a uchetemel er a omengetukel?’ Mongeroid er kau er aike el social media, mubi, me a lechub e ngongelaod el melisiich a kltui me a klakoad.

A Tekingel a Dios a sebechel ngosukid el mo mesisiich er a kltui el ngar er a rengud me a uldesued

A lebebil e ngmo meringel er kid a melemalt el merriter aike el ngar er a uldesued me a rengud. Engdi a Tekingel a Dios a sebechel ngosukid el ‘merriter a urunguled ma uldesuel a rengud.’ (Hebru 4:12) Me molemolem el merriter er a Biblia. Mousbech a osisechakl er ngii el omekesiu er a uldesuem e moureor el meringel meruul er a uldesuem el mo oltirakl osisecheklel. A Tekingel a Dios a sebechel ngosukid el mo mesisiich er a kltui el ngii “a cheleuid el omesodel a tekoi” el delalem er a uldesued me a rengud.—2 Korinth 10:4, 5.

Experience er a Rechad—STEPHEN

Ngildechii a Rolel a Lomdasu

A Stephen me a rechedal a telungalek er ngii a mle experience a kltui er a rebecheleleu el chad. Sei a uchul me ngmlechetikaik er a cheldebechel er a balatiks el uluumekemad el kirel a llemeltir a rechad. Cherengel a taem e ngmlo meruul olechotel a kltui. Ngdmu el kmo: “Ngak me a resechelik a lebebil e aki mo omes a mubi el mesaod el kirel a klsibai er a remechedelekelek el chad el mlara Merikel. Ngkmal mo kesib a rengmam er tia el chelebirukel me a ki olebedeterir a rebecheleleu el chad el dirrek el lulemes er a mubi. Uriul e aki mora hang er a rebecheleleu el chad losiik er a rechad el ki bo mongelebed er tir.”

A uldesuel a Stephen a mlengodech er a lomuchel el mesuub a Biblia lobengterir a Resioning er a Jehovah. Ngmelekoi el kmo: “Ngak el di mle chelebangel a betok el rolel omengetukel a uchul me ngkmal mle mechas a renguk er aike el kulemes er a delongelir a Resioning. El ua tiang, a ta el becheleleu el Sioning er a lebo er a omerael e ngmilechititerir a rengelekel er cheungel a ulekerreuil a chedelekelek el telungalek. Me a dirrek a becheleleu el telungalek a ngiluu a chedelekelek el buik el mo kiei el obengterir er a bo lak a blil.” A Stephen a mlo ulterekokl a rengul el kmo a Resioning er a Jehovah a sel klodam lulsaod er ngii a Jesus el kmo ngmo er ngii er a delongelir a remera el Kristiano.—Johanes 13:35.

Ngera ngilsuir a Stephen el mo diak louketui er a rechad? A bades er a Rom 12:2 a ngilsuir. Ngdmu el kmo: “Ak mlo mtebengii el kmo ngmle kirek el ngodechii a rolel a kumdasu. Ngmle kirek lomekbeches er a uldesuek me bo lsebechek el meruul a rolel a budech. Engdi ak dirrek el mlo mtebengii el kmo tiakid a kot lungil rolel a klengar.” A Stephen a mla mo betok er a 40 el rak loldeu er a rengul er a klengar el diak louketui er a rechad.