ROLEL A DETEREBENGII A LEMELEMEL A KLTUI

2 | Lak Mosiik Omelaitechei

A Biblia Kmo:

“A le rellii a mekngit a chad el ekor kemiu, e lak momtechei er sel mekngit el oba mekngit, . . . E bor a ikel sebechiu el kie el ngar a budech kemiu ma rokui el chad. Lak molaitechei, . . . Ele Chedaol Llechukl a kmo, ‘A omelaitechei a ngar ngak, mak mo melaitechei, ng dmu Rubak.’”—ROM 12:17-19.

Belkul a Bades:

Me alta ngdiak el mekngit a bo lekesib a rengud sel lemeruul a mekngit el mei er kid, me nguaisei engdi a Dios a diak lekengei omelaitechei. E ngbai melisiich er kid el mo mengiil er ngii e le ngdi kmedung e ngmo sumechokl a rokui el cheleuid.—Psalm 37:7, 10.

Sebechem el Meruul er Ngii:

A rediak el mecherrungel el chad sel bo lolaitechei e te melemolem er a kltui. Me a lsekum a chad a mla tomellii a rengum e lak molaitechei. Molasem lomtebechel er a rengum e bo er omerellel a budech. Ngar er a bebil blekeradel e nglocha bai ungil a di dobes er a tekoi. (Osisechakl 19:11) E ngar er a kuk bebil e nglocha kired el mo ouchais a tekoi el dilubech. El ua tiang, a lsekum ngngar ngii a mekngit el dilubech el mo er kau el tilemellii a llach e nglocha mo kirem el report el mora rebulis.

Sel dolaitechei e kede di kid el melemall er kid

Engdi ngmekerang a lsekum e ngdiak el sebechel mesmechokl er a rolel a budech? Me a lechub e ke mla mora ike el rokui el cheldechuul e di diak? Lak molaitechei. Tia di mo rullii a blekeradel el lmuut el mo mekngit. Bai mterebengii a lemelemel a kltui. Bo moumerang er a rolel a Dios a losmechokl a mondai. “Moumeral ulsirs er ngii, e ng mo ngosukau.”—Psalm 37:3-5.

Experience er a Rechad—ADRIÁN

Mlo Mesisiich er Omelaitechei

A Adrián er a lengeasek e ngkmal mle soal el di okoad er a rechad e melaitechei er tirke el millemall er ngii. Ngdmu el kmo: “Ak mle blechoel teloi a klakoad el ousbech a boes e mla er ngii aike el taem el di blok merserasech el cheloit er a rael.”

Adrián ulemuchel el mesuub er a Biblia er a le 16 a rekil. Ngkmo: “Ngar er a omesubek e ak mlo mtebengii el kmo ngkirek el melodech a blekerdelek.” Ngmle kirel mo diak louketui e mo diak di lokoad. Ngika kmal mle soal a Rom 12:17-19 el ngii a mesaod el kirel a bo lak dolaitechei. Ngmelekoi el kmo: “Ak mlo mesa el kmo a Jehovah mo sumechokl a chelebirukel er a telutk el temel el ngar sel soal rolel. Cherengel a taem e ak ngildechii a klengar er ngak.”

A ta er a klebesei e a cheldellir a rebuik el ble lekaucheraro a uldelecheklii a Adrián. Ngike el merreder er tir a dilu el kmo: “Ka debong!” Me a Adrián a kmo: “Ngkmal mle soak el odelecheklii!” Engdi ngdimlak bo lolaitechei ngbai milluluuch el mora Jehovah e mirrael.

Ngmelemolem el melekoi el kmo: “A ongingil sils e ak milsa ngika el merreder er tir el di mle ngii el tang. Ngkmal mlo kesib a renguk e mle soak el mo melaitechei, engdi ak liluut el meluluuch el mora Jehovah me lengesukak el orekedii a renguk. Ngkmal mlo mechas a renguk le ngika el buik a mle er ngak e dmu el kmo: ‘Mousubes el kirel a kesus. A mera er ngii ngkmal soak el mo uai kau. Ngsoak el mesuub a Biblia.’ Ngkmal mle dmeu a renguk le kurrekedii a ngesechel a renguk! Tia mlo uchul me aki ulemuchel el mesuub el terung.”