1 | Nglunguuch “Moterekokl a Ikel Rokui el Tekoi el Suebek a [Rengum] er Ngii”

A BIBLIA KMO: “Moterekokl a ikel rokui el tekoi el suebek a rengmiu er [a Dios], ele ng kerekikl el omekerreu er kemiu.”—1 PETRUS 5:7.

A Belkul Tiang

A Jehovah mengemedaol er kid el mo mengedecheduch er ngii el kirel a ngii di el tekoi lomekberaod er a uldesued me a rengud. (Psalm 55:22) Ngdiak a mondai el kmal klou me a lechub e ngkekerei. A lsekum e ngklou a ultutelel er kid e ngklou a ultutelel er a Jehovah. A doluluuch el mo er ngii a klou a ultutelel el rolel e ngsebechel mo budech a uldesued.—Filipi 4:6, 7.

Rolel e Ngngosukau

Sel lengar ngii a ringelel a uldesued e kede locha mo feel el kmo ngkmal di kid el tang. A rebebil er a rechad a locha diak lungil medengelii a tekoi el dechelebangel er ngii. (Osisechakl 14:10) Engdi sel doluluuch louchais er a Dios aike el rokui el ngar er a rengud me a uldesued, e ngorrenges er kid e understand er kid. A Jehovah mesekid, e medengei a ringeled, e soal a doluluuch el mo er ngii el kirel a ngii di el tekoi el suebek a rengud el kirel.—2 Kronika 6:29, 30.

Sel doluluuch el mora Jehovah e ngsmisichii a klaumerang er kid el kmo ngomekerreu er kid. Ngsebeched el mo ua ta er a milluches er a Psalm el milluluuch el kmo: “Ke milsekak er a chelebulek, e dimlak mchitak er a kerior el kmlar a chelsel.” (Psalm 31:7) Sel dodengei el kmo a Jehovah mes a tekoi el dechelebangel e ngsebechel ngosukid el melemolem er a chelsel a meringel el blekeradel. E ngika diak di el ues a ringeled. Ngika ungil medengei a tekoi el dechelebangel el ngaruchei er a ngii di el chad, e ngosukid el metik ongelaod me a omelisiich er a Biblia.

Rolel a Biblia Olengeseu er a Julian

Lerellii el Mei er Ngak a Secher el Di Suebek a Renguk

“Ngar ngii a secherek el di ngerang ak mo suebek a renguk e dirrek el blechoel el mei er a uldesuek a uldasu el kmal omekringel er ngak. Ngsebechel di kiul el mo imis el suebek a renguk. Ak feel er ngak el kmal daijob engdi ngdi diak a ungil luchul e ngkmal mo imis el suebek a renguk. Ak tokubets el mo feel el uaisei sel kteloi er a rechad. Ak kmal di mo melatk el kmo ngera uldesuir el kirek.

“Tirke el medengelii a secherek a mora tkurrebab el sebechir lolengeseu er ngak. Engdi a lebebil e te mo dmu tekoi el diak el help. Engdi kuba omereng el saul le te melasem lolengeseu.

“A lebebil aika el secherel a uldesuek a uchul me ngmo meringel er ngak el meluluuch. Ngkirek el meringel loureor el concentrate e mengedecheduch er a Jehovah. A uldasu a di melechesokl er a chelsel a bdeluk me ngmeringel er ngak a mtab. Sel bo lak el sebechek lomtebechel er a uldesuek, e ngmeringel er ngak ouchais er a Jehovah aike el ngar er a renguk me a uldesuek.”

Rolel a Biblia Olengeseu er Ngak

“Ak mla suubii er omesubek er a Biblia el kmo a nglunguuch a diak lousbech a betok el tekoi me a lechub e lekirel kemanget e a Dios a mo kongei er ngii. Sel bo lak el sebechek el smaod aike el ngar er a renguk, ak di meluluuch el kmo: ‘Jehovah ak kmal lolengit me mngesukak.’ Mo lmuut er tiang me ak mo omelechesiu el kmo a Jehovah medengei e meskak sel kuusbech er ngii er tiakid el taem. Ak dirrek el ngar er a ukeruul. Ngkmal dmeu a renguk el melekoi el kmo a nglunguuch me a ukeruul a kmal mla ngosukak. Ngmera el ngar ngii a klungiolel ak meringel loureor losiik er a ngelsuil a Demak el ngar er a eanged e kulechesuar er a ulengesuil.”