2 | “Chongelaod el Lomeskid a Chedaol Llechukl”

A BIBLIA KMO: “Le ikal rokuil tekoi el dimla meluches a melluches el kirel chosisechakl el mer kid, el kirel me bo doba chomelatk loeak a ducherreng ma chongelaod el lomeskid a chedaol Llechukl.”—ROM 15:4, BT.

A Belkul Tiang

A Biblia ngar ngii a tekoi er ngii el kmal mengelaod er kid e meskid a klisiich me a ducherreng el mo outekangel a diak lungil rolel a uldasu. A klumech er a Biblia dirrek el meskid a omelatk el kmo a ringelel a rengud a di kmedung e ngmo tekoi er a ngar er a mong.

Rolel e Ngngosukau

Kid el rokui a ngar ngii a taem e ngmo ngdiak lungil a rengud. Engdi tirke el smecher a ringelel a uldasu el di suebek a rengrir me a lechub e te depressed a omelechesiu aikang er a bek el sils. Ngmekera Biblia e olengeseu?

Ngbetok a ungil el uldasu er a Biblia el sebechel mtechei a mekngit el rolel a uldasu. (Filipi 4:8) Ngkmal sebechel mekeek a uldesued er a uldasu el mengelaod e mengellakl er kid e ngosukid el mtebechelii a rengud.—Psalm 94:18, 19.
A Biblia sebechel ngosukid el mo diak domdasu el kmo ngdiak a ultuteled.—Lukas 12:6, 7.
Betok el bades er a Biblia olterekokl a rengud el kmo ngkmal diak di lekid el tang, me a Dios el ngii Ulemeob er kid, a kmal understand a feelings er kid.—Psalm 34:18; 1 Johanes 3:19, 20.
A Biblia tibir el kmo a Dios a mo smuld a rokui el tekoi el omekringel er a uldesued. (Isaia 65:17; Ocholt 21:4) Sel dechuarm er a tekoi lomekringel er a uldesued me a rengud, e tia el telbiil a sebechel meskid a klisiich el mo melemolem.

Rolel a Biblia Olengeseu er a Jessica

A Lerellii a Depression el Mei er Ngak

“Sera lebo el 25 a rekik e ngdi mle kiul el mo diak el sebechek el meruul a tekoi er a klengar er a bek el sils e mlo smecher er a oberaod el depression. Meringel el tekoi el dilubech er a klengar er ngak er a ngar er a mong a di mlo oldechelakl er a uldesuek. A retoktang a ngilsukak el mo medengei el kmo a diak lungil rolel a uldasu el kubang le ngmla er ngii a meringel el tekoi el dilubech er a klengar er ngak, a uchul me ak mlo smecher er a depression. Ngmlo kirek el melai a kar me a rolel a ukeruul el ngosukak el mo medengei e mesmechokl a diak lungil rolel a uldasu el kullab.”

Rolel a Biblia Olengeseu er Ngak

“Sera kmal depressed e ak mlo omelechesiu er ngak el kmal mo medakt, di suebek a renguk, e diak bechiuaiu. Sel klebesei e ngmeeleb a uldesuek er a mekngit el uldasu e diak el sebechek el mtebechel. Ngua lolekoi a Psalm 94:19, a Dios a sebechel mengelaod e rullii a rengud el mo ungil sel demeeleb er a tekoi el rullid el mo suebek a rengud. Me a kngiluu a Biblia er ngak el loia er bita er a bet er ngak me a babier el lluches a bades el melisiich er ngak. Sel lak el sebechel imiit a medak e ak menguiu a bades, e omechei er a uldesuel a Dios me ngmengelaod er ngak.

“A Biblia melisiich er kid el mo omult aike el uldasu el diak el chatter er aike el tekoi el dodengei el kirel a Dios. A ngar er a mong ak kmal ulemdasu el kmo, ngdiak a belkuk, e diak a chad el mo betik a rengul er ngak. Engdi ak mla suubii el kmo aikang a kmal diak loltirakl er a Biblia, el mesaod er a Dios el kmo ngbetik a rengul e chubechub el Chedam el kmal omekerreu er a derta me a derta er kid. Cherengel a taem e ak mlo omtebechel er a uldesuek e diak becherei me lomekrael er ngak. Ak mla suubii el mo omes er ngak el ua lomes er ngak a Dios. Tiang a kmal mle klou a ultutelel rolel e ngmlo diak el mekngit a uldesuek el kirek.

“Ak kmal lomes el beduluchei el mo er sel taem el diak lungil rolel a uldasu me a mekngit el tekoi el dilubech el mei er kid a mo mesuld er a uldesued. Sel kudengei el kmo a secherel a uldasu a di mo tekoi er a ngar er a mong, e ngsmisichak el loutekangel e mo omes el bedul a klengar er a ngar medad el diak ksecher er a depression.”