3 | Mngai a Klungiolem er a Kerebai er a Biblia

A BIBLIA MESAOD ER A . . . Reblak a rengrir el sechal me a redil el kmo te “mle chad el ua ikid.”—JAKOBUS 5:17.

A Belkul Tiang

A Biblia mui er a cheldecheduch el kirir a rechad er a ngar er a mong el mlo omelechesiu a betok el bedengel a tekoi. Sel donguiu el kirir e kede locha mo metik el kmo te kmal di uai kid.

Rolel e Ngngosukau

Kede rokui lousbech er a rechad el mo understand er kid. Kede kmal lousbech er tiang a lsekum e ngngar ngii a secherel a uldesued. Sel donguiu el kirir a rechad er a Biblia e kede mo mesa el kmo te ulemdasu e ulemelechesiu osisiu el tekoi el dechelebangel. Seikid e kede mo feel el kmo ngdiak di lekid a feel el uaisei, me kid a diak di lekid el tang oldechelakl aika el tekoi.

A Biblia mesaod el kirir a rebetok el mlo feel el kmo ngdiak el sebechir el mekerang. Ngmla ta el bo momdasu el kmo, ‘Ngdikea el sebechek el melemolem el uaisei’? A Moses a mlo feel el uaisei, me a Elias me a David.—Ulecherangel 11:14; 1 King 19:4; Psalm 55:4.
A Biblia ouchais el kirel a Hana, el redil el “kmal mle mekngit a rengul” le ngdimlak el sebechel loungalek e ngike el ta er a bechil a bechil a millumk er ngii el kirel.—1 Samuel 1:6, 10.
A Biblia dirrek louchais el kirel a Job, el locha sebeched el mesekid er ngii. Alta ngkmal mle mesiich a klaumerang er ngii er a Dios, ngika mlo chuarm er a klou el ringel luchul me ngmlo melekoi el kmo: “Ng mla tmurk a renguk el chad; ng dikea le soak el melemolem el chad.”—Job 7:16.

Sel bo dodengelii a rolel e tirka el chad er a Biblia mlo mesisiich er a diak lungil rolel a uldasu, e ngsebeched el dirrek el mo outekangel a ringeled.

Rolel a Biblia Olengeseu er a Kevin

Lerellii el Mei er Ngak a Secherel a Uldasu el Mesisiich a Lerellii er a Mood er Ngak

“Sera lebocha el okeim a rekik e ak mlo smecher er a secherel a uldasu el mesisiich a lerellii er a mood er ngak. Ngar ngii aike el taem el feel el kmo ngkmal sebechek el mo mesisiich er a ngii di el mondai er a klengar. Engdi aike el kuk bebil er a taem e ak mo feel el kmo ngdiak a ultutelel a kulemolem el ngar.”

Rolel a Biblia Olengeseu er Ngak

“A ta el chad er a Biblia el kumes er ngak el uai ngii a apostol Petrus. Ngika riruul a cheleuid el rirellii el mo feel el kmo ngdiak a ultutelel. Engdi ngika dimlak lolemolem er tia el uldesuel, e ngbai mlo osiik er a resechelil el kmal mle betik a rengrir er ngii. Sel mekngit a sils er ngak le ngtia el secherek a uchul, e ngsebechek el kmal di mo melatk a chelitechetuk me ak feel el kmo ngdiak a ultutelek. Ak ua Petrus el mla suubii el mo melemolem el kmeed er a resechelik el sorir lolengeseu er ngak el melemolem merael el beduluchei.

“A ta er a chad er a Biblia el meskak a klou el ongelaod a King David. Ngika mle blechoel kmal mo depressed el kirel a blekeradel er a klengar er ngii me a cheleuid el leriruul er a ngar er a mong. Ak mesekak er ngii le lebebil ak mo remuul me a lechub ak dmu tekoi el bo kuuchel a renguk er ngii er uriul. A tekingel el ngar er a 51 el bliongel er a Psalm a kmal mengelaod er ngak. Ngar er a 3 el kekerei el bades e a David a kmo: ‘Ak medengei a telemellek; mak di blechoel melebedebek a kngtik.’ Tia kmal mesaod er ngak sel bok imis el depressed, me ngmeringel er ngak a melatk a ungil kirek. Ngdirrek el kmal soak a tekingel el ngar er a 10 el kekerei el bades: ‘Momeob er a beches el chaidireng er a chelsek e Dios, e mlia beches e blak a rengul reng er a chelsek.’ A kuusbech a kmeed el osisiu el tekoi lolengit er a Dios me lengesukak el mo ungil a uldesuek el kirek. A 17 el kekerei el bades (NW) me ngkmal melisiich er ngak: ‘A chad el chelam a rengul e kmal mekngit a rengul e Dios, a diak bo motngeklii.’ Tia el bades olterekokl er a renguk el kmo a Dios a betik a rengul er ngak.

“Sel bo kulatk er a rechad er a Biblia me aike el bla lebeskak a Dios er chelechang, e ngsmisichii omeltkek el kirel a ngar medad. A telbiil er a Biblia mo klemerang el tekoi er a renguk, e tia ngosukak el melemolem.”