Ungil me a Mekngit: Omekrael er a Rebetok

Te bekord el rokui el chad a kongei el kmo ngngar ngii a bebil el tekoi el kmal bleketakl el kmo ngungil me a mekngit. El ua tiang a omekoad er a rechad, olterebek, me a omelemall er a rengalek a tekoi el rechad er a beluulechad el rokir ouketui, e a klechubechub, blekokuii, me a llemalt a tekoi el lolisiich. Engdi ngar er a kuk bebil er a tekoi er a klengar el ua tekoi er a cheliuaiu, mo honest, me a omekeroul er a rengalek, e a rechad a kmo ngdiak a melemalt me a chebirukel el omelilt. Te kongei a ngii di el rolel omelilt. Me a rechad a blechoel el melilt loltirakl a tekoi el le feel me aike el lomelechesiu a rechad el iliuekl er tir. Tiang, ngungil uldasu?

AIKE EL DOMELECHESIU

Kede blechoel el lousbech aike el de feel el kmo ngungil me a mekngit el lomekrael er kid, e tiang a dodengelii el kmo ngukltked. (Rom 2:​14, 15) Mo lmuut er a lekmal dirk mekekerei a rengalek me ngsebechir el mtab a klekakerous er a fair me a diak el fair el omeruul e mo feel guilty sel lerellii a cheleuid. E sel dorael el mo klou e kede suubii el mo medengei el kmo ngngera ungil me a mekngit er a rechedal a telungalek er kid, rebeseched, resensei, rechad er a buai, klechelid er kid, me a siukang er kid. E sel doruul omelilt e a ukltked ouchais er kid el kmo omelilt er kid ngoltirakl aika el bla desuub el kmo ngungil me a mekngit me a lechub e ngdiak.

Tiakid el uldesued el kirel a ungil me a mekngit a odbechid el mo olecholt er a klechubechub, omereng el saul, me a fair el omeruul el mora rebebil. Ngdirrek el torebengid me ngdiak bo doruul a tekoi el mo melemall er a rebetik er a rengud me a lechub e doruul er a tekoi el mo uchul a rur el mei er kid me a ukltked bo loldechelakl er kid.

Me ngsebeched el lultuil aike el domelechesiu el mo omekrael er kid? A Garrick er a lekekerei el chad e ngileltii a klengar el lomekedong er ngii el kmo, “Ngsebechek el di ngak el meruul aike el soak.” Me nguaisei engdi ngmlo metik el kmo ngii el mirruul aike el feel el kmo ngungil a dimlak bo luchul a ungil kirel. Ngmesaod er a klengar er ngii el kmo ng “dimlak a deurreng er ngii le ngmlara deleboes, ousbech a drugs, mengetelaol er a rrom, e melemall er a rechad.”

AIKE EL LOMELECHESIU A REBEBIL

Ngdiak di dousbech aike el de feel el mo omekrael er kid, a uldesuir a rechad el kirel me ngdirrek el omekrael er kid. Tia sebechel mo uchul e kede ngmai a klungioled er a experience me a llomeserreng er tir. Kede nguu a respect er a telungalek er kid, resechelid, me a rechad er a buai sel doruul aike el lomdasu el kmo ngungil.

Me ngsebeched el lultuil aike el lomelechesiu a rechad el mo omekrael er kid? A Priscila er a lekekerei el redil e ngmirruul a mle haeri er a delongelir a resechelil e mlo bad lobengkel a sechal er a uchei er a bo lebechiil. Engdi ngmiltik el kmo alta ngmirruul er a tekoi el rebebil a omdasu el kmo ngdi ungil, me nguaisei ngdimlak el deu a rengul. Ngkmo: “Ngak el mirruul er a tekoi el rokui el chad a millekoi el kmo ngungil a dimlak lerellak el mo ungil a renguk. Ngbai mlo uchul me ak mlo meruul a tekoi el diak lolechotel a llomeserreng e dirrek el mle kengaol.”

NGNGAR NGII A LMUUT EL LUNGIL ROLEL?

Sel dolilt el kmo ngera ungil me a mekngit e a tekoi el de feel me aike el feel a rebebil a kmal sebechel ngosukid. Me nguaisei aika el ulekrael a diak el bek el taem e ngmo ungil kired. A lebebil e kede di kid el tomellid me a lechub e kede tomelleterir a rebebil le ngdiak dutebengii el kmo omelilt er kid e ngmo uangerang. (Osisechakl 14:12) E diak a guarantee el kmo aike el doumerang me aike el loumerang a rechad el iliuekl er kid a ungil kired me ngdiak dolodech. El ua tiang, a bebil er a blekeradel el lulemes a rechad el kmo ngdiak el ungil a bla bo lekengei a rechad er chelechang, e a bebil er a blekeradel el lekilengei a bla bo domes el kmo ngdiak el ungil.

Me ngngar ngii a lmuut el ungil rolel e kede mo medengei el kmo ngngera mera el ungil me a mekngit? Ngngar ngii a sebeched el oltirakl er ngii er chelecha el taem el diak bo luchul e kede ouuchel a rengud er omelilt er kid er uriul?

Kede kmal oba omereng el saul le ngngar ngii a ulekrael el sebechir a rokui el chad er ker me ker lousbech, el kmal oureor e sebeched el ultuil. Ongingil suobel a mo mesaod er tia el sebeched el lousbech er ngii lolterekokl el kmo ngngera ungil me a mekngit.