Rolel e Ngsebechem el Metik er a Ungil Ongebechiall

1-2. (a) Ngera kirir a remesobil el Kristiano el melatk er a uchei er a lomuchel el melatk a mo date? (b) Ngera belkul a “de date”? (Momes er a “Omesodel a Tekoi.”)

KAU, ngsoam el mo bechiil? Alta deurreng a diak lultuil er a bo debechiil me a lak, me nguaisei a rebetok el mesobil el Kristiano el meklou me a mekekerei a sorir el mo bechiil. Me nguaisei engdi uchei er a bo doruul er a klasisiik e ngkirel mla mo ngar ngii a mesisiich el deleuill er kid me a Jehovah, mla mo ungil medengelkid, e sebeched el kutmokl a siunged er a chebechiil.a (1 Ko. 7:36) Sel bla bo molab aikang e ngmo ungil a chebechiielem.

² Me nguaisei engdi ngdiak lebeot a debetik er a chad el ungil ongebechiall. (Osi. 31:10) Mo lmuut er a obetik er a chad el soam el lmuut el mo ungil medengelii me ngdiak lebeot om date.b Ngar tia el suobel e kede mo mesaod aike el sebechel ngosuterir a remesobil Kristiano el metik er a ungil ongebechiall e omuchel el date. Kede dirrek el mo suub aike el sebechir a rechedal ongdibel el meruul el support er tirke el sorir el mo bechiil.

METIK ER A UNGIL ONGEBECHIALL

3. Ngera kirel a mesobil Kristiano el melatk sel losiik er a mo bechil?

³ A lsoam el mo bechiil e ngungil obo modengei el kmo ngngera el blekeradel a soam el kirel a chad el soam el mo bechil er uchei er a omomuchel date. E le lak ke mo el ochebir osengem er a chad el ungil kirem me a lechub e ke mo el date er a chad el diak lungil kirem. E uaisei el ngii di el chad el dolatk er ngii a kirel telecholb el Kristiano. (1 Ko. 7:39) Engdi ngdiak el rokui el telecholb el Kristiano a ungil ongebechiall el kirem. Me ngsebechem el di kau el oker, ‘Ngngera turrekong er ngak er a klengar? Ngera el blekeradel a kumes el meklou a ultutelel el kirel a chad el soak el mo bechil? A expectation er ngak, ngtabesul?’

4. Ngera bebil er a ongit el loluluuch el kirel a rebebil?

⁴ A lsekum e ngurungulem el mo bechiil, e ke ulterekokl el mla meluluuch el kirel. (Fil. 4:6) A Jehovah diak el promise el kmo ngmo msang a chad a bechil. Engdi ngmelatk aike el mousbech me a feelings er kau e sebechel ngosukau er chelecha el mosiik er a bechim. Me molemolem louchais er ngii a urungulem me aike el ngar er a rengum. (Psa. 62:8) Moluluuch el lolengit er a kllourreng me a llomeserreng. (Jak. 1:5) John,c el mesobil lodam er a beluu er a Merikel a melekoi el kirel aike el uldimukl er a nglunguchel el kmo: “A kuuchais er a Jehovah aike el blekeradel el soak el kirel a chad el soak el mo bechil. Ak meluluuch lolengit me lengar ngii a techellek el meet er tirke el ungil ongebechiall. Ak dirrek lolengit er a Jehovah me lengesukak el mekeroul a blekeradel el ngii a rullak el mo ungil bechiil el sechal.” A Tanya el odos er a Sri Lanka kmo: “Chelecha el kusiik er a mo ungil ongebechiall, e a kulengit er a Jehovah me lengesukak el mo melemolem el loba blakerreng el mo er ngii, e melemolem el positive e dmeu a renguk.” Mo lmuut me a lak omereched el metik er a chad el ungil ongebechiall, a Jehovah tibir el mo melemolem el omeskau aike el mousbech er a bedengem me a rengum me a uldesuem.—Psa. 55:22.

5. Ngera el techall el meet er a rechad el betik a rengrir er a Jehovah a ngar ngii el kirir a remesobil Kristiano? (1 Korinth 15:58) (Dirrek el momes er a siasing.)

⁵ A Biblia melisiich er kid el kmo “bo le blak a rengmiu el oureor el kirel a Rubak.” (Monguiu er a 1 Korinth 15:58.) A lsekum ke mechesang er a omesiungem el mora Jehovah e mengoit a taem el lobengterir a rekakerous el odam me a odos, e ngdiak di bo mkasisiich, ngdirrek el mo er ngii a techellem el meet er a rebebil er a mesobil el tir a uai kau el ulturk osengir er omesiungir el mora Jehovah. E sel moruul er sel kot lungil sebechem el mo odeuir a rengul a Jehovah e ke mo melechesuar er a mera el deurreng.

6. A remesobil Kristiano el osiik er a rebecherir ngngera kirir el diak lobes er ngii?

⁶ Engdi bo mkerekikl me a skem er a ungil ongebechiall lak lebo el sel kot el klou a ultutelel el tekoi er a klengar er kau. (Fil. 1:10) A mera el deurreng a diak lultuil er a obechiil me a lak e ngbai ultuil er a deleuill er kau me a Jehovah. (Mt. 5:3) E chelecha el mdirk mesobil, e ngklou a ilmeklem el menglou er a omesiungem. (1 Ko. 7:​32, 33) Bo mungil lousbech er a temem er chelechang. A Jessica el odos er a Merikel el mlo bechiil er a lebocha el keed er okeuang a rekil a kmo: “Ngmle soak el mo bechiil engdi ngak el mle mechesang el omerk er a klumech a ngilsukak el mo dmeu a renguk er aike el ngar ngii er ngak.”

MONGOIT A TAEM EL OMTAB

7. Ngera uchul me ngungil momtab er a chad el telkib el taem er uchei er omouchais er ngii el kmo ngsoam ngii? (Osisechakl 13:16)

⁷ Engdi ngmekerang a lsekum ke mla metik er a chad el momdasu el kmo ngmo ungil ongebechiall? Ngungil omereched louchais er ngii a feelings er kau? A Biblia kmo a mellomes a rengul el chad a mo medengei er a uchei er a bo loruul er a tekoi. (Monguiu er a Osisechakl 13:16.) Me ngolechotel a llomeserreng omomtab er a chad el telkib el taem er a uchei er omouchais er ngii el kmo ngsoam ngii. Aschwin er a Netherlands a kmo: “Ngsebechel di mereched el mo er ngii a feelings er kid er a chad me nguaisei ngdirrek el sebechel di mereched el mo diak. Me sel mongoit er a taem el omtab er a chad e ngdiak bo momuchel el date er a chad el locha di mereched el mo diak a feelings er kau el mo er ngii.” Me a lmuut kung sel momtab er a chad e ke locha mo mtebengii el kmo ngika el chad a diak lungil el kirem.

8. Ngmekera chad e sebechel omtab er a chad el lomdasu el kmo ngmo ungil ongebechiall? (Dirrek el momes er a siasing.)

⁸ Ngmekera sebechem el diak mongoit a taem el mengedecheduch e obengkel a chad engdi osisiu el taem e ke omtab er ngii? Ngar er a miting er a blil a ongdibel me a dirrek el gathering e ngsebechem el mtab el kmo ngngua ngera blekerdelel, omerellel, me a dirrek el delechel a klaumerang er ngii. Ngtecha resechelil? Ngngera ngmesaod? (Lk. 6:45) A turrekong er ngii ngosisiu er a turrekong er kau? Ngsebechem el mengedecheduch er a remechuodel er a ongdibel er ngii me a Rekristiano el mla mo klou el chad er a tekoi er a klereng el lungil medengelii. (Osi. 20:18) Ngsebechem loker er a chisel me a blekerdelel. (Rut. 2:11) Sel momtab er a chad e bo mkerekikl me lak mrellii el mo feel uncomfortable. Em respect er a feelings er ngii, e lak dim bereked er ngii me a lechub e molasem el mo medengei a rokui el tekoi el kirel.

9. Uchei er a mongedecheduch er a chad, e ngera kirel mo ulterekokl a rengum el kirel?

⁹ Ngungil momtab er a chad el ua klteketel a ngerang e mochu ouchais er ngii el kmo ngsoam el date er ngii? A lsekum ke di mereched louchais er a chad, e ngsebechel mo omdasu el kmo kau a diak mungil melatk er a uchei er omoruul omelilt. (Osi. 29:20) Engdi a lsekum ke kmal meoud e ngsebechel mo omdasu el kmo kau a diak lultebechel a rengum, tokubets a lsekum ngii el chad a mla mtebengii er uchei el kmo ngsoam ngii. (Oli. 11:4) Uchei er omongedecheduch er a chad e lak mobes el kmo, tia diak el belkul a kmo ngkirel mla mo ulterekokl a rengum el kmo ke mo bechil. E ngbai kirel mla mo ulterekokl a rengum el kmo ke mla mo ready el mo bechiil me ngii el chad a momdasu er ngii el kmo ngungil kirem.

10. Ngera kired el meruul er ngii a lsekum kede mtebengii el kmo ngngar ngii a chad el soal kid engdi ngdiak el soad ngii?

¹⁰ Engdi ngmekerang a lsekum ke mtebengii el kmo ngngar ngii a chad el soal kau? A lsekum ngdiak el soam ngii e beketeklii el mo er ngii loeak omerellem. Ngmera el mekngit el omeruul a lsekum kede rullii a chad el mo omdasu el kmo ngmo er ngii a delongeled kid me ngii e diak bo el uaisei.—1 Ko. 10:24; Efe. 4:25.

11. Ngar er aike el beluu el dating me a chebechiil a le arrange er ngii a rebebil el kirir a remesobil, e ngngera ungil lolatk tirka el chad?

¹¹ Ngar er a bebil beluu e a rechad er a blil a chad me a lechub e te chedal a melilt er a mo bechil a mesobil el chederir. Ngar er a kuk bebil er a beluu, e te sechelil me a lechub e ngtelungalek er a mesobil el chad osiik er a ungil mo bechil e arrange er tir el mo meet e mesa el kmo te chatter. A lsekum te olengit er kau el mo arrange er a rechad el mo date me a lechub e te mo bechiil e molatk aike el lousbech tirka el terung. A lsekum ke mtebengii el kmo ngngar ngii a chad el lungil kirel a chedam me a lechub e ngsechelim, e molasem el mo medengei aike el rokui el sebechem el mo medengei el kirel a blekerdelel me a teletelel e a ngaruchei er ngii a uangerang a deleuill er ngii me a Jehovah. A kmes el deleuill lobengkel a Jehovah a lmuut el klou a ultutelel er a udoud, skulel a chad, me a lechub e ngderuchellel er a buai. E lak mobes el kmo a ulebongel e ngomelilt er ngii el chad el mesobil el mo bechiil me a lechub e ngdiak.—Gal. 6:5.

OMUCHEL EL DATE

12. A lsekum e ngsoam el date er a chad, e ngmekera sebechem louchais er ngii?

¹² A lsekum e ngsoam el lomuchel el date er a chad, e ngmekera sebechem louchais er ngii?d Ngsebechem el mengedecheduch louchais er ngii er a public el basio me a lechub e ke call er ngii. Mbleketakl louchais er ngii er a moktek er kau. (1 Ko. 14:9) A lsekum ngousbech er ngii, e bsang a taem el mo onger er kau. (Osi. 15:28) A lsekum a chad a diak el soal, em respect a feelings er ngii.

13. Ngera sebechem el meruul er ngii a lsekum a chad ouchais er kau el kmo ngsoal kau? (Kolose 4:6)

¹³ E kuk mekerang a lsekum a chad a subedau el kmo ngsoal date er kau? Ngulterekokl ngika el chad el uleba blekeu el me mengedecheduch er kau, me bo mungil er ngii e mochotii omengull. (Monguiu er a Kolose 4:6.) A lsekum ke ousbech a taem el melatk er ngii, e mouchais er ngii. Engdi molasem el mereched el longer er ngii. (Osi. 13:12) A lsekum e ngdiak el soam, e mbleketakl louchais er ngii er a ungil rolel. Molatk er a rolel e a Hans lodam er a Austria ulenger er a odos el mlo mengedecheduch er ngii: “Ngmle ungil omerellek el mo er ngii e mle bleketakl el mengedecheduch er ngii. Ak di mle mereched louchais er ngii e le ngdimlak el soak a bo lomdasu el kmo ngngar ngii a techall. Tia osisiu luchul me ak mlo kerekikl omerellek el mo er ngii er uriul.” Engdi a lsekum e ngsoam el date er ngii el chad e mosaod a uldesuiu me aike el em expect sel bom date. Siukang er kemiu me a lmuut el bebil er a tekoi a uchul me a expectation er kemiu a locha mo kakerous.

TE MEKERA REBEBIL E SEBECHIR EL SUPPORT ER A REMESOBIL EL KRISTIANO?

14. Ngmekera de support er a remesobil el Kristiano loeak a tekinged?

¹⁴ Ngmekera sebeched el rokui el support er a Rekristiano el mesobil el sorir el mo bechiil? A ta er ngii a sel bo dekerekikl a tekinged. (Efe. 4:29) Ngsebeched el di kid el oker, ‘Ngak, a kumekako er tirke el sorir el mo bechiil? Ngak sel kisa mesobil el odam me a odos el chadecheduch, e ak mla mo omdasu el kmo ngsorir a tang me a tang?’ (1 Ti. 5:13) Me a lmuut kung, ngkmal diak el soad el rulleterir a remesobil Kristiano el mo omdasu el kmo te olengesonges le tir el diak el bechiil. A Hans el dulsaod er ngii er a uchei a kmo: “A rebebil er a rudam a kmo, ‘Ngera uchul me ngdiak bo bechiil? Kau a mla mo diak mkekerei el chad.’ Aika el tekingir a rulleterir a remesobil el mo feel el kmo te diak el appreciate er tir e menglou er orrimel el mo bechiil.” Ngbai lmuut el lungil a dosiik a techall el mo chemat er a remesobil el Kristiano!—1 Th. 5:11.

15. (a) A doltirakl er a omellach er a Rom 15:​2, e ngera kired el melatk er uchei er a dolasem lolengeseu er a chad losiik er a bechil? (Dirrek el momes er a siasing.) (b) Ngera el point er a video a tilab osengem er ngii?

¹⁵ Ngmekerang a lsekum kede omdasu el kmo a odam me a odos a chatter? A Biblia melekoi el kmo ngkired el melatk a rengrir a rebebil. (Monguiu er a Rom 15:2.) A rebetok el mesobil a diak el sorir a de introduce er tir el mora rechad me ngkired el respect a sorir. (2 Th. 3:​11, NW) A rekuk bebil a sorir a dengesuterir, engdi ngdiak el kired el olengeseu er tir a lsekum te diak lolengit er kid.e (Osi. 3:27) A rebebil mesobil a diak el sorir a di debleketakl el introduce er tir. Lydia el mesobil lodos er a Germany a kmo: “Ngsebechem el include er a odam me a odos er a klou el group. Mketmeklii a techall el sebechir el meet e becherei er chimorir.”

16. Ngera ungil lolatk er ngii a remesobil el Kristiano?

¹⁶ Kid el rokui, el bechiil me a remesobil a sebeched el kiei el dmeu a rengud e ungil a klengar er kid! (Psa. 128:1) Me a lsekum e ngsoam el mo bechiil engdi ngdirkak obetik er a chad, e molemolem el ulturk osengem er a omesiungem el mora Jehovah. A Sin Yi el odos er a Macao a kmo: “Sel momekesiu er a temem lobengkel a bechim er a Baradis er a temem el mesobil, e a temem el mesobil a kmal kekedeb. Mongreos er tiakid el taem e bo mungil lousbech er ngii.” Engdi ngmekerang a lsekum ke mla metik er a chad e mla omuchel el date? Ngar er a ongingil suobel e kede mo mesaod er a rolel ngsebechem el date e mellomes el melilt.