Rolel a Dating el Mo Uchul a Mellomes el Omelilt

1-2. Ngera te feel a rebebil el kirel a dating?

A TAEM el le date a rechad a taem er a klou el deurreng. A lsekum ke date er chelecha el taem e ngulterekokl el soam a di bo lungilbesul a rokui el tekoi. E mo uaisei el kirir a rebetok el chad el date. A Tsion,a el odos er a Ethiopia a kmo: “A ta er a mle kot el klou el taem er a deurreng er a klengar er ngak a sel taem er ak date ngak me a bechik. Ki mle dmolech el chadecheduch e dirrek el mle chacherchur. Ak mlo happy er a kutebengii el kmo ak mla metik er a chad el kmal betik a renguk er ngii me ngii a kmal betik a rengul er ngak.”

² Me nguaisei engdi Alessio el odam er a Netherlands a kmo: “Alta ngmera el mle taem er a deurreng er aki em date ngak me a bechik engdi ngdirrek el mla er ngii omelsemai el ki blo mchebangel.” Me ngngar tia el suobel e kede mo mesaod a bebil er a omelsemai el sebechir a rechad el date el mo chobangel me a omellach er a Biblia el sebechel ngosuterir el mo mellomes el melilt. Kede dirrek el mo mesaod er a rolel e a rebebil er ongdibel a sebechir el support er tir.

MOKTEK ER A DATING

3. Ngngera moktek er a dating? (Osisechakl 20:25)

³ Alta dating a taem er a deurreng engdi ngdirrek el oberaod el bakes e le ngsebechel mo uchul a chebechiil. Sils er a merengel a chebechiil e a obekel a tibir el mora Jehovah el kmo te mo kaubltikerreng e kakull er a klemengetel a klengar er tir. Uchei er a doruul a ngii di el telbiil e ngkired el mo kerekikl el melebedebek er ngii. (Monguiu er a Osisechakl 20:25.) E tia kmal klemerang el kirel a telbiil er a chebechiil. A dating a mesterir a techellir a rechad el mo kaodengei e mo ungil melilt. A lebebil e a rechad a melilt el mo bechiil me a lebebil e a rechad a melilt el torebengii a deleuill er tir. A lsekum a rechad a melilt el torebengii a deleuill er tir e ngdiak el belkul a kmo ngngar ngii a cheleuid el lerirellii. Ngbai tia el temir el date a mla otutii a moktek er a dating. Ngngilsuterir el mo ungil melilt.

4. Ngera uchul me ngkirel mo melemalt osenged el kirel a dating?

⁴ Ngera uchul me ngklou a ultutelel a bo lemelemalt osenged el kirel a dating? A remesobil sel bo loba melemalt el uldasu e te diak bo le date er a chad el lodengei el kmo ngdiak bo lebechil. Me nguaisei te diak di el mesobil el chad a kirir el mo oba melemalt el uldasu el kirel a dating. Kid el rokui a kired el mo medengelii a moktek er a dating. El ua tiang, a rebebil omdasu el kmo a lsekum a rechad a date e ngkirir el mo bechiil. Tia el uldasu ngera ngrullii el mora remesobil el Kristiano? A Melissa el mesobil el odos er a Merikel a kmo: “Ngkmal klou orimel el mora Resioning el date. Tia uchul me a rebebil er a rechad a diak leterebengii a deleuill el lodengei el kmo ngdiak lungil kirir. Me a lechub e ngrulleterir a rebebil me te diak el date. Tia el orimel a sebechel mo uchul a klou el berraod.”

BO MUNGIL KAODENGEI

5-6. Ngera kirir a rechad el date el mo kaodengei el kirel? (1 Petrus 3:​4, BT)

⁵ A lsekum ke date, e ngera sebechel ngosukau el mo medengei el kmo ngungil obo bechil a chad me a lechub e ngdiak? Bo mungil el kaodengei. Ke ulterekokl el siluub a bebil tekoi el kirel er a uchei er a omomuchel el date. Engdi chelecha ngngar ngii a techellem el mo medengelii ngike el ‘berrotel el [chad er a] chelsel.’ (Monguiu er a 1 Petrus 3:​4, BT.b) Ngsebechem el mo medengei el kmo ngika ngngua ngera deleuill er ngii me a Jehovah, e uangerang a blekerdelel me a rolel a lomdasu. Cherengel a taem e ngsebechem el mo medengei a nger er a ker el uai a: ‘Ngika el chad ngungil kirek?’ (Osi. 31:​26, 27, 30; Efe. 5:33; 1 Ti. 5:8) ‘Ngsebechel meskak a bltikerreng me a attention el kuusbech er ngii me ngak e ngsebechek el msang a bltikerreng me a attention el lousbech er ngii? Ngsebecham el kaberkakl chelitechetemam?’c (Rom 3:23) Sel bo mungil kaodengei e lak mobes el kmo: A kot el klou a ultutelel a diak el kemiu a betok omkaisisiu er ngii, e ngbai kemiu e ngsebechiu el adapt el mo otirakl aike el klekakerous er a delongeliu.

⁶ Ngera lmuut el bebil er a tekoi el ungil obo mungil medengei el kirel a chad er a temiu el date? Uchei er a leiuul a rengum er a chad e ngungil omosaod a bebil el meklou a ultutelel el tekoi, el uai a turrekong er ngii. E kuk mekerang a personal el tekoi el ua secherel a bedenged, mondai er a udoud, me a lechub e ngoberaod el tekoi el dilubech el mei er kid? A uchelel e ngdiak a belkul dosaod a rokui el tekoi. (Momekesiu er a Johanes 16:12.) A lsekum ke feel el kmo ngkora kmal dirk uchelel e dirkak bom ready el onger a personal el ker e msbedii. Me nguaisei engdi ngii el chad a kirel mo medengei me bo lsebechel mo ungil melilt. Me a cherengel a taem e ngkirem el bleketakl louchais er ngii el kirel.

7. Te mekera rechad el date e sebechir el mo ungil kaodengei? (Momes er a baks el “Date er a Chad el Kiei er Cheroid.”) (Dirrek el momes a siasing.)

⁷ Ngmekera sebechem el mo ungil medengelii ngike el mera el chad er a chelsel? A ta er a rolel a ombleketakl em honest el chadecheduch, moker a ker, e mera lorrenges. (Osi. 20:5; Jak. 1:19) Nglocha kmal mo ngosukau sel omdak el meruul a tekoi el rullii el mo beot er kemiu a chadecheduch, el ua omdak el omengur, merael a basio er a buai, e omerk er a klumech. Ngdirrek el sebechiu el mo ungil kaodengei sel mongoit a taem lobengterir a resechelimiu me a telungalek er kemiu. Me a lmuut kung, em plan el meruul aike el tekoi el lochotii el kmo a chad e ngua ngerang er a chelsel a kakerous el blekeradel e uangerang a lobengterir a rechad. Molatk a lullasem el meruul er ngii a Aschwin er a Netherlands. Ngmesaod er sel taem er a le date er a Alicia el kmo: “Aki mirruul a tekoi el ngii a ngosukemam el mo medengelii ngike el kuk tang. Aika mle mekekerei el tekoi el ua dmak el meruul a kall e meruul a ureor. Chouaika el tekoi a ngilsukemam el mo medengei a ungil blekerdelel me a dirrek el chelitechetul ngike el tang.”

8. Ngera el klungiaol a lengai a rechad el date sel ledak el mesuub?

⁸ Ngdirrek el sebechiu el mo ungil medengelii a tang me a tang loeak omdak el mesuub a topic er a Biblia. A lsekum ke mo bechiil e ngkiriu el kutmeklii a temiu el mengull el telungalek me a Dios bo el klou a ultutelel el part er a chebechiieliu. (Oli. 4:12) Me ngdiak bai ungil omketmeklii a temiu el dmak el mesuub er chelechang el mdirk date? Me nguaisei a rechad el date a dirkak bo el ta el telungalek me a odam a dirkak el bo el bdelul a odos. Engdi sel omdak el mesuub e ngsebechiu el mo medengei el kmo ngngua ngera deleuill er a chad me a Jehovah. A Max me a Laysa el obekel er a beluu er a Merikel a dirrek el miltebengii a lmuut el ta er a klungiolel omdak el mesuub. A Max a kmo: “Ngdi mle uchelel er a ki em date aki ulemuchel el mesuub aike el babilenged el mesaod er a dating, chebechiil, me a telungalek. Aika el babier a ngilsukemam el mesaod a betok el meklou a ultutelel el tekoi el mle meringel er kemam a di kemam lomuchel el mesaod.”

LMUUT EL BEBIL ER A TEKOI EL UNGIL MOLATK

9. Ngera el tekoi a ungil lolatk a rechad sel bo louchais el kmo te date?

⁹ Ngtecha ungil mouchais er ngii el kmo kom date? Tia di ior er kemiu el terung. Engdi sel momuchel el date e nglocha ungil a di mouchais er a remekesai el chad. (Osi. 17:27) Sel moruul el uaisei e nglocha diak bo mochau orimel me a ker. Me nguaisei olak mouchais er a ngii di el chad e kom locha mo meleakl er kemiu le ngdiak el somiu a rechad a bo lodengei. E tia kengaol. Me ngolechotel a llomeserreng omouchais er tirke el sebechir el meskemiu a ungil advice me a ngeso. (Osi. 15:22) El ua tiang, ngsebechiu louchais er a rechedal a telungalek er kemiu, resechelimiu el mla mukeroul el mo klou el chad er a tekoi er a klereng, me a lechub e ngremechuodel.

10. Ngera sebechir a rechad el date el meruul er ngii me lolemolem el klikiid? (Osisechakl 22:3)

¹⁰ Ngmekera sebechel a temiu el date el melemolem el klikiid? Sel lorael el mo mesisiich a deleuill er kemiu me a feelings er kemiu a lmuut el menga el mo mesisiich. Ngera sebechel ngosukemiu me ngdiak bo moruul a tekoi el tomellii a rengul a Jehovah? (1 Ko. 6:18) Mongeroid er kemiu er a mekikiongel el cheldecheduch, dmak el di kemiu el terung, me a omelim el rrom el mo imis. (Efe. 5:3) Aika el tekoi a sebechel smisichii a ngelbesel a cheliuaiu e choitechetur a rengmiu el mo meruul a llemalt. Ngolechotel a llomeserreng omblechoel mesaod aike el sebechel a tang me a tang el meruul el lochotii omengull er ngii er a llechul a Jehovah me ngike el tang. (Monguiu er a Osisechakl 22:3.) Mutebengii el kmo ngngera ngilsuir a Dawit me a Almaz er a Ethiopia. Te kmo: “Aki mengoit a taem el dmak er aike el basio el betok a rechad er ngii me a lechub e ngobengterir a resechelimam. Ngdimlak a ta el di el kemam el tang el ngar er a mlai me a blai. Me ngdimlak ki msiseb a blekeradel el sebechel mo mengesuseu er kemam.”

11. Ngera el tekoi a ungil lolatk a rechad el date sel lolib el kirel aike el omeruul lolecholt a bltikerreng?

¹¹ E kuk mekerang aike el omeruul lolecholt a bltikerreng? A bebil omeruul lolechotel a bltikerreng a locha di ungilbesul sel lemukeroul a deleuill er kemiu. Me nguaisei engdi lsekum ngmekerdii a ngibes er a cheliuaiu e nglocha mo meringel er kau a mellomes el melilt el kirel ngii el chad. (Sal. 1:2; 2:6) Me a dirrek el omeruul lolechotel a bltikerreng a sebechel rullii el mo meringel er a chad a moba ulserechakl el reng e rullii a tekoi el kingtir a rengul a Jehovah. (Osi. 6:27) Me di luchelel a deleuill er kemiu e mosaod a omellach er a Biblia e moterekokl aike el mkengei me a diak mkengei el meruul el lolecholt er a bltikerreng.d (1 Th. 4:​3-7) Mdak el loker el kmo: ‘Ngera osengir a rechad er a beluu el ki mkiei er ngii el kirel omeruul er a delongelam el lolecholt a bltikerreng? Aika el omeruul ngomekard er a ngibes er a cheliuaiu er a rengul a ngii di el techa er kemam?’

12. A rechad el date ngerang kirir el mo medengelii el kirel a mondai me a kebosech er a uldasu el duubech er a taem el le date?

¹² Ngmekera sebechiu el mesmechokl a mondai? A lsekum e ngngar ngii aike el taem el mo duubech a mondai, e tia ngbelkul a kmo ngdiak lungil omdak? Ngdiak el uaisei. A rokui el chad el kasisiik a ngar ngii aike el taem el bo lekebosech a uldesuir. A mesisiich el chebechiil a delongelir a reteru el chad el sebechir el dmak el loureor el mesmechokl a mondai er tir. Me a rolel omosmechokl a mondai a ochotii el kmo a chebechiieliu e ngmo ungil me a lechub e ngdiak. Mdak el loker el kmo: ‘Ngsebecham el dmak el mesaod a tekoi el chelellakl a rengmam e kaiuecholt omengull? Aki ouchais sel ki mruul a cheleuid e melasem el improve? Aki di mereched el nguu a rengmam el moriou, olengit a klausubes, e ousubes?’ (Efe. 4:​31, 32) Me nguaisei engdi a lsekum e ngdi kebosech a uldesuiu me a lechub kom di kaumondai er a temiu el date, e ngdiak el bo el improve a blekeradel sel bo bechiil. A lsekum ke mtebengii el kmo a chad a diak lungil kirem, e a terebengel a deleuill a sel kot lungil omelilt el kiriu el terung.e

13. Ngera el eru el tekoi a sebechel ngosuterir a rechad el date el oterekeklii a klemengetel a taem el le date?

¹³ A temiu el date ngkirel el ua klteketel a ngerang? Sel lak dongoit a taem el melatk er a uchei er a dolilt e ngblechoel el diak bo lungil a tekoi. (Osi. 21:5) Me a temiu el date a kirel lungil a klemengetel, el ke mo ungil medengelii a chad. Me nguaisei engdi ngdiak lungil omongemanget er ngii. A Biblia kmo: “Sel le metemall omelatk, e a reng me ng metemall.” (Osi. 13:12) Me a lmuut kung sel lorael a taem el mong e nglocha mo meringel er kemiu oserechii a ngibes er a cheliuaiu. (1 Ko. 7:9) Me lak molatk er a klemengetel a taem em date e bai di lekau el oker, ‘Ngera kdirk ousbech el mo medengelii el kirel a chad er a uchei er a krellii omelilt er ngak?’

TE MEKERA REBEBIL E SEBECHIR EL SUPPORT ER A RECHAD EL DATE?

14. Ngera bebil er a rolel e a rebebil a sebechir el support er a rechad el date? (Dirrek el momes er a siasing.)

¹⁴ A lsekum kede medengei el kirir a rechad el date, e ngmekera sebeched el ngosuterir? Ngsebeched el invite er tir el mo omengur, meruul er a omengull el telungalek, me a lechub e ngta er a bedengel omilil. (Rom 12:13) Aika locha techall el sebechir el lmuut el mo ungil kaodengei. Nglocha sebechem el ngosuterir loeak sel mobengterir el mo tuobed, ngar er a mlai, me a lechub e ke offer er a blim er tir me lsebechir el chadecheduch e diak di bo el tir el terung. (Gal. 6:10) A Alicia el dulsaod er ngii er a uchei a mesaod er a kmal ble appreciate er ngii, ngii me a Aschwin. Ngkmo: “Ngkmal rirutech a rengmam er a ledu er kemam a rebebil er a rudam el kmo ngsebecham el mo oldingel er tir a lsekum aki ousbech er a basio el mo dmak e diak el di bo lekemam el terung.” A lsekum te olengit er kau el mo chaperone e momes er ngii el ileakl el techall. Bo mkerekikl me lak bechititerir me di bo el tir tang, engdi mdirrek el melatk er aike el taem el lousbech el chadecheduch el terung.—Fil. 2:4.

15. Ngera dirrek el sebechir a rebebil el meruul lolengeseu er a rechad el date? (Osisechakl 12:18)

¹⁵ Ngdirrek el sebeched el support er a rechad el date loeak a tekinged me a omerelled. A lebebil e kede locha mo ousbech er a ulserechakl el reng. (Monguiu er a Osisechakl 12:18.) El ua tiang, nglocha kmal soad el louchais el kmo techang me a techang a date, engdi tirka locha sorir el tir ouchais er a rechad. E diak lungil a dolaes er a rechad el date me a lechub e doukerrekeriil er tir el kirel a personal el tekoi. (Osi. 20:19; Rom 14:10; 1 Th. 4:11) Me a lmuut kung a rechad el date a diak el sorir a dolekoi me a lechub e doker a ker el mo orrimel er tir el mo bechiil. A odos el Elise me a bechil a melekoi el kmo: “Aki mlo merur sel loker er kemam el kirel a wedding plans er kemam e dirkak ki bo mosaod el kirel.”

16. Ngungil dokerang sel leterebengii a deleuill er tir a rechad el date?

¹⁶ E mekerang a lsekum a reteru el chad a tibir el torebengii a deleuill er tir? Ngdiak lungil a dongetiit el kirel me a lechub e dolab el mo er techang me a techang. (1 Pe. 4:15) Odos el Lea a kmo: “Ak rirenges el kmo a rebebil a melechedech er a uchul me ngak me a odam a mle break up. Tia kmal tilemellii a renguk.” Ngua dulsaod er ngii er a uchei, a rechad sel tibir el torebengii a deleuill e ngdiak el belkul a kmo ngngar ngii a mlo mekngit. Tia bai belkul a kmo a temir el date ultutii a moktek er a dating. Ngngilsuterir el mo ungil melilt. Me nguaisei tia el omelilt a dirk sebechel mo uchul a klengiterreng e rullii a chad el mo feel el kmo ngkmal di ngii el tang. Me ngsebeched losiik a rolel e support er tir.—Osi. 17:​17, NW.

17. Ngera ungil lolemolem el meruul er ngii a rechad el date?

¹⁷ Kede mesa el kmo a dating a ngar ngii omelsemai er ngii engdi ngdirrek el taem er a deurreng. A Jessica kmo: “A temam el date a mle meringel el ureor. Engdi ngkmal mle worth er a temek me a klisichel a bedengek.” A lsekum ke date e molemolem el melasem el mo kaodengei. Omoruul el uaisei e a temiu el date a mo ngosukemiu el mo mellomes el melilt.