Molemolem el Klekar er Aike el Mo Mengesuseu er Kau

1-2. (a) A Jesus, ngmilsterir a redisaiplo er ngii a ngera el uleklatk? (b) Ngera uchul me a redisaiplo a chilitii a Jesus? (Dirrek el momes a siasing.)

“A RENG a soal engdi klechad a mechitechut.”a (Mt. 26:41b, NW) Aika el tekingel a Jesus ochotii el kmo ng understand el kmo kid a diak demecherrungel me kede mo remuul a cheleuid. Engdi tekingel a dirrek el meskid a uleklatk: Lak bo domdasu el kmo kede kmal mesisiich me ngkmal diak bo deruul a cheleuid. Sesei el sikang er uchei er a ledu aika el tekoi a Jesus e a rechapostol er ngii a millekoi el kmal ulterekokl a rengrir el kmo ngkmal diak bo lechitii a Mastang er tir. (Mt. 26:35) Ngmle ungil a moktek er tir. Me nguaisei engdi te dimlak lutebengii el kmo a chelsel a meringel el blekeradel e ngkmal sebechir el di mereched el mo mechitechut. Sei a uchul me a Jesus a milengelechel er tir el kmo: “Molemolem el klekar e di moluluuch me lak mekesuseu.”—Mt. 26:41a, NW.

² Ngklengiterreng e le redisaiplo dimlak lolemolem el klekar. Sera lenguu a Jesus el mo kelebus e tir, te millemolem lobengkel me a lechub te mlo medakt e chemiis? A redisaiplo el dimlak el kerekikl a uchul me te rirellii a tekoi el ledilu el kmo ngkmal diak bo loruul er ngii, te chilitii a Jesus.—Mt. 26:56.

3. (a) A bo dolemolem el oba blakerreng el mora Jehovah e ngera uchul me ngdiak el kired el mo omdasu el kmo kede kmal mesisiich? (b) Ngera kede mo mesaod er tia el suobel?

³ Ngkmal diak el kired el mo omdasu el kmo kede kmal mesisiich me ngdiak bo deruul a cheleuid. Ngklemerang el kmo kede mla rullii er a rengud el diak debechei a ngii di el ngerang me bo luchul e bo decheroid er a Jehovah. Me nguaisei engdi ngdirrek el diak demecherrungel me ngbeot er kid a mekesuseu el mo meruul a mekngit. (Rom 5:12; 7:​21-23) Ngkmal sebeched el di kiul soiseb er a blekeradel el rullid el mo soad el meruul er a klengit. A bo dolemolem loba blakerreng el mora Jehovah me a Ngelekel e ngkired el mo olengesenges er a tekingel a Jesus el mo melemolem el klekar el kirel aike el mo mengesuseu er kid el mora klengit. Tia el suobel a mo ngosukid el meruul er tiang. A kot, e kede mo mesaod aike el tekoi el tokubets el kired el mo klekar er ngii. Ongingil, e kede mo mesaod er a rolel e ngsebeched el mo klekar er aike el mo mengesuseu er kid el mora klengit. E a ulebongel, e kede mo mesaod aike el mo ngosukid el melemolem el klekar.

NGERA EL TEKOI A KIREM EL MO KLEKAR ER NGII?

4-5. Ngera uchul me ngkired el mo klekar el kirel aike el klengit el diak el sal oberaod?

⁴ Mo lmuut er a klengit el diak loberaod me ngsebechel choitechetur a deleuill er kid me a Jehovah. Ngdirrek el sebechel mekrolid el mo meruul a oberaod el klengit.

⁵ Kid el rokui a mo mekesuseu el mora klengit. Me nguaisei engdi kede rokui el kakerous a chelitechetud, me ngngar ngii aike el ileakl el tekoi el kmal mengesuseu er kid el mora klengit. El ua tiang, a chad a locha kmal meringel loldechelakl er a omengesuseu el mo meruul er a deleboes. A kuk tang a locha kirel loldechelakl er omengesuseu el mo meruul a diak el klikiid el omeruul el ua meleketak me a lechub e ngosengel a siasing er a remeau. Me a kuk tang a oldechelakl er a dektel er a rechad, kldidiul a rengul, bekongesengasech a rengul, me a lechub e ngkuk ta er a tekoi. Ngua lolekoi a Jakobus, a “chad el mechitikaik a mekurs ra ikel di ngelbesel a rengul e mekesuseu.”—Jak. 1:​14, BT.

6. Ngera kired el mo honest er ngii?

⁶ Kau, ke medengei aike el tekoi el kmal mengesuseu er kau? Ngkmal kengaol el tekoi a de ignore a chelitechetud me a lechub e domdasu el kmo kede kmal mesisiich me ngdiak bo derellii a klengit. (1 Jn. 1:8) Mo lmuut er a Paulus me ngmelekoi el kmo tirke el “olab a ngerachel er a tekoi er a klereng” a dirrek el kirir el mo kerekikl e le lak e ngdirrek el sebechir el ruebet er a klengit. (Gal. 6:​1, NW) Ngkired el mo honest el merriter er kid e mo medengei aike el tekoi el demechitechut er ngii.—2 Ko. 13:5.

7. Ngera kired el kmal mo kerekikl er ngii? Mosaod.

⁷ Sel bo dodengei aike el tekoi el kmal mo mengesuseu er kid, e ngungil dokerang? Ngkired el meringel loureor el smisichii a rengud el mo oltngakl! El ua tiang, taem er a Biblia e a siseball er a beluu a sel kot el mechitechut el part er a mats. Sei a uchul me a siseball a mle betok a remengkar er ngii. Ngdi osisiu, ngkmal kired el mo kerekikl el klekar er aike el tekoi el dodengei el kmo kede kmal mechitechut er ngii.—1 Ko. 9:27.

ROLEL A BO DEKLEKAR

8-9. Ngmekera buik el losaod er ngii a 7 el bliongel er a Osisechakl e mle sebechel mengeroid er ngii er a oberaod el klengit? (Osisechakl 7:​8, 9, 13, 14, 21)

⁸ Ngmekera sebeched el melemolem el klekar? Molatk aike el desuub er ngike el chad el losaod er ngii a 7 el bliongel er a Osisechakl. Ngika mlora deleboes lobengkel a dengerenger el redil. A 22 el kekerei el bades a kmo ngika el buik a di “mle mereched” el mo obengkel. Engdi ngua lochotii aike el uleak uchei el bades, ngika mirruul a tekoi er uchei er tiang el mlekekokil el omekrael er ngii el mora klengit.

⁹ Ngera milekrolii el mora klengit? A kot e ngmocha kebesesengei e “ng [merael] er a chades el kmeed er a chibokill el le kiliei er ngii [ngika el dengerenger el] redil.” E mocha merael el lengelakl er a blil ngii el redil. (Monguiu er a Osisechakl 7:​8, 9.) Me sera lesa ngii el redil e ngdimlak lobult el merael. Ngbai milecherei me ngturengul a medal e orrenges er ngii el mesaod a tenget el luldars, el locha melasem el meruul er ngii el buik el mo omdasu el kmo ngdiak el mekngit el chad. (Monguiu er a Osisechakl 7:​13, 14, 21.) Omko ngika el buik a milengeroid er ngii er aika el tekoi el milekrolii el mora klengit, e ngmle sebechel melemolem el klekar me ngdiak el mekesuseu e lerebet er a klengit.

10. Ngmekera chad er chelecha el taem e rullii osisiu el cheleuid el lerirellii ngike el buik?

¹⁰ Tia el cheldecheduch a ochotii a tekoi el sebechel duubech el mora mesiungel a Jehovah. Nglocha rullii oberaod el klengit e a uriul e ngmo feel el kmo ngdi “mle mereched” el duubech. Me a lechub e ngkmo “tia di mle kiul happen.” Me nguaisei engdi a lsekum e ngmo dengchokl e melatk a tekoi el dilubech e ngmo metik el kmo, ngriruul a bebil mekngit el lomelilt el milekrolii el mo rullii a oberaod el klengit. A uldimukl er aika el mekngit el omelilt a locha mekngit el klausechelei, diak el klikiid el rolel ongelaod, website el lengar ngii, me a lechub e ngbasio el lodengei el kmo ngdiak lungil el kirel a Kristiano. Ngii el chad a locha mla mo diak loluluuch, longuiu er a Biblia, lengar er a miting, me a lechub e ngomerk er a klumech. Ngua ngike el buik er a Osisechakl, a kngtil a locha dimlak di lekiul duubech.

11. Ngera soad el mengeroid er kid er ngii me lak bo derebet er a klengit?

¹¹ Ngera kede suubii er tiang? Ngdiak el di lekired el mengeroid er kid er a klengit ngdirrek el kired el mengeroid er kid er aike el mekrolid el mora klengit. Tiakid a lesilodii a Salomon er uriul er a louchais a dilubech el mo er ngike el buik me a dengerenger el redil. Ngmelekoi el kirel ngika el redil el kmo: “Lak bo momais el osiik er ngii.” (Osi. 7:25) Ngdirrek el dilu el kmo: “Mcheridemiu er a ua isei el redil! Lak bo mkeed er a medal a tuangel er a blil!” (Osi. 5:​3, 8) Chochoi kede mekerreuid er a klengit loeak a dongeroid er kid er aike el blekeradel el mekrolid el mo er ngii.b Tia belkul a kmo, alta tekoi a diak el mekngit er a Rekristiano, engdi ngdiak bo doruul er ngii a lsekum e ngmengesuseu er kid e sebechel mekrolid el mora klengit.—Mt. 5:​29, 30.

12. Ngera el telbiil a lerirellii a Job, e tia el telbiil ngmekera ngosuir el mo klekar er aike el mo mengesuseu er ngii? (Job 31:1)

¹² A lsoad el mengeroid er kid er a blekeradel el mekrolid el mora klengit e ngkired el ngiltii el mo klekar. Tiakid a lurruul er ngii a Job. Ngika ‘rirellii a mesisiich el telbilel’ el diak bo lomes e lengibes er a ngodech el redil. (Monguiu er a Job 31:1.) A bo loruul er tiang a Job e ngkmal diak bo lsiseb a blekeradel el mo uchul e ngruebet er a laokreng. Kid me ngdirrek el kired el rullii er a rengud el mo choridid er a ngii di el tekoi el sebechel mo mengesuseu er kid.

13. Ngera uchul me ngkired el kokerengii a uldesued? (Dirrek el momes a siasing.)

¹³ Ngdirrek el kired el kokerengii a uldesued. (Exo. 20:17) A rebebil omdasu el kmo ngdiak a kngtil a dombeberrous er kid el meruul a mekngit el ngibes a lsekum e ngdiak demera el mo meruul. Engdi chouaisei el uldasu a diak el melemalt. A chad el di melatk a mekngit el ngibes a smisichii tia el mekngit el ngelbesel a rengul. Me ngika mekdebechii omengesuseu el mocha kirel oltngakl er ngii. Nguaisei, a mekngit el uldasu a ngar ngii a taem e ngme der er a uldesued. Sel leduubech tiang e a klou a ultutelel el tekoi el kired el meruul er ngii a otngakl e mtechei er a ungil el uldasu. Sel doruul el uaisei e ngdiak debechei a mekngit el luldasu me lemukeroul el mo mesisiich el ngibes el meringel er kid otngeklii e sebechel mekrolid el mo rullii oberaod el klengit.—Fil. 4:8; Kol. 3:2; Jak. 1:​13-15.

14. Ngera dirrek el sebechel kokerengid er aike el mo mengesuseu er kid?

¹⁴ Ngera dirrek el sebechel kokerengid er aike el mo mengesuseu er kid? Ngkirel mo ulterekokl a rengud el kmo ngblechoel el mo klungioled sel dolengesenges a llechul a Jehovah. A lebebil e ngmo meringel er kid a remuul a uldesued me a tekoi el dengibes er ngii el mo oltirakl er a soal a Jehovah, engdi sel budech el bo domelechesiu er ngii sel doruul el uaisei a kmal diak a mo mekesiur.

15. Ngmekera domekeroul a melemalt el ngibes e mo ngosukid el kokerengid er a omengesuseu?

¹⁵ Ngkired el mekeroul a melemalt el ngibes. A lsekum kede suubii el ‘mouketui a mekngit, e mo betik a rengud er a ungil’ e kede smisiich a urunguled el mo meruul a llemalt e mengeroid er kid er aike el blekeradel el mekrolid el mora klengit. (Amo. 5:15) Melemalt el ngibes a dirrek el mo smisichid me ngdiak demesim sel bo dechebengelii a blekeradel el mengesuseu er kid, el diak a klisiched er ngii.

16. Ngmekera demechesang er a tekoi er a klereng e ngosukid el mo melemolem el klekar? (Dirrek el momes a siasing.)

¹⁶ Ngmekera domekeroul a melemalt el ngibes? Ngoeak sel demechesang er a tekoi er a klereng. Sel dengar er a miting me a lechub e domerk er a klumech, e ngmeringel er kid a mekesuseu el mo meruul a mekngit. Kede bai mekurulii a urunguled el mo oldeu er a rengul a Jehovah. (Mt. 28:​19, 20; Heb. 10:​24, 25) Ngoeak a omengiued me a omesubed er a Biblia me a omelebedebeked er ngii, e kede smisichii a bltkil a rengud el kirel a llemalt me a kltui er kid el kirel a mekngit. (Jos. 1:8; Psa. 1:​2, 3; 119:​97, 101) Lak mobes el kmo a Jesus a dilu er a redisaiplo er ngii el kmo: “Molemolem el klekar e di moluluuch me lak mekesuseu.” (Mt. 26:​41, NW) Sel dongoit a taem el meluluuch el mora Demad, e kede msa techellel lolengeseu er kid e smisichii a urunguled el mo odeuir a rengul.—Jak. 4:8.

MOLEMOMLEM EL KLEKAR

17. Ngera ngmle blechoel el mo mechitechut er ngii a Petrus?

¹⁷ Ngngar ngii a bebil el chelitechetud el sebeched el mo diak dolab. Engdi kede locha metik el kmo ngngar ngii a bebil er ngii el locha kired el melemolem el loldechelakl. Molatk er a apostol Petrus. Dektel er a rechad a uchul me ngmle edei el taem el lotngeklii a Jesus. (Mt. 26:​69-75) A Petrus a mle teletelel a mla mo mesisiich er tia el chelitechetul er a lebekeu el omerk el kirel a Jesus er medal a Sanhedrin. (Rel. 5:​27-29) Me nguaisei engdi a sesei el rak er uriul e “ng mlo medakt er tirkel chad el oldubech a botk” me ngmle stob el omengur lobengterir a Rechisentael el Kristiano. (Gal. 2:​11, 12) Ngliluut el moba tia el chelitechetul. Tia el chelitechetul a Petrus a locha dimlak lemecherrungel a klisichel er ngii.

18. Ngsebechel mo uangerang a bebil el chelitechetud?

¹⁸ Ngdi ua Petrus, nglocha mo er ngii aike el taem el kired loldechelakl er a chelitechetud el dulemdasu el kmo kede mla mo mesisiich er ngii. El ua tiang, a ta el odam a kmo: “Ngmlo teruich el rak el diak kumes a siasing er a remeau me ngkmal mle ulterekokl a renguk el kmo ak mla mo mesisiich er ngii. Engdi tia el chelitechetuk a ua kdekudel el charm el omart er ngii e mengiil el mo er sel lungil taem el lodelecheklak.” Kede chemat er ngii le ngdimlak le give up. Ngmlo mtebengii el kmo ngngar ngii a kirel meruul er a bek el sils loldechelakl er tia el chelitechetul e locha mo kirel meruul er tiang er a klemengetel a klengar er ngii er tia el mekngit el beluulechad. Ngmla lmuut el mo kerekikl a tekoi el loruul el mengeroid er ngii er a siasing er a remeau, me a bechil me a remechuodel a kmal klou a ngelsurir el mo er ngii.

19. Ngera sebeched el meruul er ngii a lsekum e ngngar ngii a chelitechetud el dirk mengitechut er kid?

¹⁹ Ngera sebeched el meruul er ngii me a chelitechetud el di oldechelakl er kid a diak bo luchul e kede ruebet er a klengit? Molengesenges a ledilu a Jesus el kirel omengesuseu: “Molemolem el klekar.” Mo lmuut er aike el taem el em feel el kmo ke kmal mesisiich, me mongeroid er kau er aike el blekeradel el sebechel el mo mengesuseu er kau. (1 Ko. 10:12) Molemolem el meruul aike el tekoi el mla ngosukau el otngeklii a chelitechetum. A Osisechakl 28:14 (NW) a kmo: “Ngdmeu a rengul ngike el chad el blechoel el klekar.”—2 Pe. 3:​14, NW.

KLUNGIOLEL A DOLEMOLEM EL KLEKAR

20-21. (a) Ngera el klungiaol a bo dengai a lsekum kede melemolem el klekar er aike el sebechel mo mengesuseu er kid? (b) A lsekum kede rullii a ngerecheled e ngera ngmo meruul er ngii a Jehovah el kired? (2 Korinth 4:​7, NW)

²⁰ Ngkmal sebechel el mo ulterekokl a rengud el kmo ngmo uchul a klungioled a dolemolem el klekar er aike el tekoi el sebechel mo mengesuseu er kid. Alta klengit a meskid a “tedeb el deurreng,” engdi sel dekiei el oltirakl a llechul a Jehovah e ngmeskid a lmuut el klou el deurreng. (Heb. 11:25; Psa. 19:8) Ngmeskid a lmuut el klou el deurreng le kid el ulebeob el kired el kiei el oltirakl a rolel a Jehovah. (Gen. 1:27) Sel dekiei el lodeuir a rengul a Jehovah e ngungil a rengud e le ngklikiid a ukltked e ngar ngii omeltked el mo kiei el mo cherechar.—1 Ti. 6:12; 2 Ti. 1:3; Jud. 20, 21.

²¹ Chochoi, a “klechad a mechitechut.” Engdi tia diak el belkul a kmo ngdiak a klisiched er ngii. A Jehovah kltmokl el lomeskid a klisiich el dousbech er ngii. (Monguiu er a 2 Korinth 4:​7, NW.c) Engdi mutebengii el kmo a klisiich el lomeskid a Dios a diak lemetuk el klisiich. Me a kot e ngngerecheled el ousbech er a di klisiched el meruul aike el rokui el sebeched el oldechelakl a chelitechetud. A lsekum kede rullii a ngerecheled e ngkmal sebechel mo ulterekokl a rengud el kmo a Jehovah mo onger a nglunguched lolengit a lmuut el klou el klisiich. (1 Ko. 10:13) Chochoi, ngoeak a ngelsuil a Jehovah e ngsebeched el melemolem el klekar er aike el sebechel mo mengesuseu er kid.