Rolel a Bo Demesisiich er Aike el Mo Olengibes er Kid

1. Ngerang a klemerang el kirir a rokui el diak el mecherrungel el chad?

KAU, ngmla ta el bo el soam el meruul er a tekoi el modengei el kmo a Jehovah diak el soal? Lak em give up. A Biblia melekoi el kmo: “Ng dirkak a ongarm el mla mer kemiu el dirkak le bor a ngii di le chad.” (1 Ko. 10:13) Tia belkul a kmo a rebebil a dirrek el olengibes er tir a ngibes el mengarm er kau. Me ngdiak di lekau el tang. Ngdirrek el loeak a ngelsuil a Jehovah e ngsebechem el mo mesisiich er ngii.

2. Ngera bebil er a tekoi el olengibes er a rebebil el Kristiano me a rebebil el mesuub a Biblia? (Dirrek el momes a siasing.)

² A Biblia dirrek el melekoi el kmo: “[A] chad a di ngii el mor ongarm sel le mekesuseu e lobedikl er a ikel mekngit el soal a rengul.” (Jak. 1:14) Tia el bades a ngosukid el mo mesa el kmo a rechad a mekesuseu er a kakerous el tekoi. El ua tiang, a rebebil el Kristiano a mengesuseu er tir omeruul el deleboes. Tia locha delongelel a sechal me a redil e dirrek el sebechel redil el bedul a redil me a lechub ngsechal el bedul a sechal. E tirke el mla stob el lomes a siasing er a remeau a locha oldechelakl er a rengrir e le ngsorir el lmuut el mo omes ngii el tekoi. A rebetok el uluusbech a mekngit el kar e mle chad er omelim a locha dirrek el sorir el lmuut el mo meruul aika el tekoi. Aika di bebil er a ngibes el oldechelakl er a rebebil el Kristiano me a rebebil el mesuub a Biblia. Kid el rokui a ngar ngii a taem el blo de feel el ua apostol Paulus el ngii a dilu el kmo: “Ngsoak el meruul a ungil, ma mekngit a me soiseb.”—Rom 7:​21, BT.

3. Ngera ngsebechel rullii el mora chad a lsekum ngblechoel loldechelakl er a rengul el kirel a tekoi el olengibes er ngii?

³ A lsekum ke blechoel el loldechelakl er a rengum el kirel a tekoi el olengibes er kau, e ke locha feel el kmo ngdiak a klisichem el mtekengii. Ke locha dirrek el feel el kmo ngdiak a omelatk el kirem me a Jehovah mo otngeklau le kau el ngar ngii omnguibes er ngii. Bo lulterekokl a rengum el kmo aika kmal diak el klemerang tekoi! Ngar tia el suobel e kede mo onger aika el teblo el ker el ngii a mo ngosukid el mo ulterekokl a rengud er tiang: (1) Ngera uchul me ke mo feel el kmo ngdiak a klisichem me a lechub ngdiak a omelatk el kirem? (2) Ngmekera sebechem el mo mesisiich er aike el mo olengibes er kau?

ULDASU EL “NGIKEL MEKNGIT” A SOAL A BO DOBANG

4. (a) Ngera uchul me a Satan a soal a bo de feel el kmo ngdiak a klisiched lotngakl aike el mo olengibes? (b) Ngera uchul me ngsebechel mo ulterekokl a rengud el kmo ngsebeched el mtok omengesuseu?

⁴ Sel lebo er ngii olengibes er kid e a Satan a soal a bo domdasu el kmo ngdiak a klisiched er ngii. A Jesus a mileketeklii el kmo a Satan a mo mengesuseu. Ngullisechakl er a rultirakl er ngii el mo meluluuch el kmo: “Lak momekrael er kemam el mor a meringel el ongarm, e bai mosebelemam er Ngikel Mekngit.” (Mt. 6:13) A Satan a kmo a rechad sel lemekesuseu e te mo diak lolengesenges er a Jehovah. (Job 2:​4, 5) Ngera uchul me ngomdasu el uaisei? A Satan ngike el milekesuseu e mlo diak loba blakerreng el mora Jehovah. Ngika omdasu el kmo kede di uai ngii el mo diak dolengesenges sel demekesuseu. Ngika dirrek el ulemdasu el kmo a Ngelekel a Dios el cherrungel el chad a sebechel mekesuseu el mo meruul a mekngit! (Mt. 4:​8, 9) Engdi ka molatk: Kid, ngmera el diak a klisiched er aike el mo olengibes er kid? Ngkmal diak el uaisei! Kede kongei a tekingel a apostol Paulus el dilu el kmo: “Ngngar ngii a klisichek el meruul a rokui el tekoi loeak a klisichel ngike el omeskak a klisiich.”—Fil. 4:​13, NW.

5. Kede mekera medengei el kmo a Jehovah a ulterekokl a rengul el kmo ngsebeched el mtok a ngibes?

⁵ A Jehovah diak el ua Satan e le ngulterekokl a rengul el kmo ngsebeched el mtok a ngibes. Kede mekerang e medengelii tiang? E le Jehovah ulemlaoch el kmo a kloul seked er a rechad el loba blakerreng a mo suobel er a kloul ringel. Ka molatk er a belkul tiang. A Jehovah el ngii a diak el sebechel lomulak a kmo, a klou el ildois er a rechad a mo soiseb er a Baradis el “[selilek] a bilir er a rsechel a Ngelekel a Sib me ng [ngmla mo] becheleleu” el ngii a belkul a kmo a Jehovah omes er tir el klikiid. (Och. 7:​9, 13, 14) Me ngbleketakl el kmo a Jehovah diak lomdasu el kmo kid a diak a klisiched el mtok a ngibes.

6-7. Ngera uchul me a Satan a soal a bo de feel el kmo ngdiak a klisiched e diak omelatk el kired?

⁶ Me a Satan a soal a bo de feel el kmo ngdiak a klisiched er aike el olengibes er kid. Ngdirrek el kmal soal a bo domdasu el kmo ngdiak omelatk el kired. Engdi ka mluut el melatk. Ngera uchul me a Satan a soal a bo domdasu el uaisei? Ngii ngike el diak omelatk el kirel. Ngika diak loba kengei er a Jehovah me a Jehovah a mo okngemedii. (Gen. 3:15; Och. 20:10) Me ngsoal a bo de dirrek el feel el kmo ngdiak omelatk el kired, tokubets sel lodengei el kmo ngngar ngii omeltked el mo kiei el mo cherechar. Engdi kid a diak de uai a Satan! A Biblia olterekokl er a rengud el kmo a Jehovah a diak loltngakl er kid e ngbai kmal lolengeseu er kid. “Ng diak el soal a ngii di le chad a leriid, e bai soal a rokui el chad a lobult el mo imikr a kngterir.”—2 Pe. 3:9.

⁷ Me a lsekum kede omdasu el kmo ngdiak a klisiched el mtok a ngibes me a lechub ngdiak omelatk el kired le ngngar ngii olengibes er kid, e kede meruul er a tekoi el Satan a kmal soal a bo dobang. Sel bo dutebengii tia el tekoi e ngsebechel ngosukid el mo rullii er a rengud el mo dechor el omtok er a Satan.—1 Pe. 5:​8, 9.

SEBECHED EL MO OMELECHESIU ER NGII LEKID EL DIAK DEMECHERRUNGEL

8. A klengit ngmellutk er a mekngit el omeruul me a ngerang? (Psalm 51:5) (Dirrek el momes er a “Omesodel a Tekoi.”)

⁸ Ngdiak di le Satan a rullid el mo feel el kmo ngdiak a klisiched el mtok a ngibes me a lechub ngdiak omelatk el kired lekid el ngar ngii a mengesuseu er kid. A klengit el duldiukes er ngii er a kot el demad me a delad a dirrek el sebechel rullid el mo feel el uaisei.a—Job 14:4; monguiu er a Psalm 51:5.

9-10. (a) Ngera ngrirellii a klengit el mora Adam me a Eva? (Dirrek el momes er a siasing.) (b) Ngera ngrullii el mei er kid a klengit?

⁹ Ka molatk er a lerirellii a klengit el mora Adam me a Eva. Sera bo lak lolengesenges er a Jehovah e te milerteterir e dokedek a bedengir. A Insight on the Scriptures a mesaod el kirel tiang el kmo: “A klengit a rirelleterir el mo mekngit a ukltkir, merur, e suebek a rengrir.” Me a Adam me a Eva a dikea el sebechir el lmuut el mo er ngii a kmes el deleuill er tir me a Jehovah. Ngmo blechoel el di mekngit a ukltkir, merur, e suebek a rengrir le tir el mla mo diak el mecherrungel.

¹⁰ Me nguaisei, kid a diak dengar osisiu el blekeradel kid me tir. A olubet a diak loureor er a Adam me a Eva engdi ngngosukid me a kngtid a sebechel musubes e sebechel mo er ngii a kmes el deleuill er kid me a Jehovah. (1 Ko. 6:11) Me nguaisei kede uldiukes er a klengit me ngdiak demecherrungel. Me ngmo mekngit a ukltked, merur, e suebek a rengud. A Biblia kmo a klengit a ngar ngii a mesisiich a klisichel er a rechad. Tia uaisei el kirir a rokui el chad el “uldimukl er tirkel dimlak le bor a osisiu el klengit, el ua Adam e ulietii a tekingel a Dios.” (Rom 5:14) Me nguaisei, alta tiang a klemerang engdi lak debecherei me lerellid el mo feel el kmo ngdiak a klisiched me a diak a omelatk el kired. Ngkmal sebeched el otngakl aika el negative el uldasu. Ngmekera doruul er tiang?

11. Alta kede mo feel el kmo ngdiak el sebeched el mtok a ngelbesel a rengud, engdi mera er ngii ngera sebeched el rullii? (Rom 6:12)

¹¹ Ngdiak demecherrungel a uchul me a lebebil e kede mo feel el kmo ngdiak el sebeched el mtok a ngelbesel a rengud. Ngrengud ngngar ngii a chad el melekoi er kid el kmo ngkmal diak el sebeched el mo mesisiich er aike el tekoi el denguibes er ngii. Engdi ngdiak el kired lorrenges er tiang. E ngerang? E le Biblia olisechakl el kmo ngsebeched el stob er a klengit me ngdiak longedereder er kid. (Monguiu er a Rom 6:12.) Tia belkul a kmo ngsebeched el melilt el diak doruul aike el tekoi el nguibes a rengud er ngii. (Gal. 5:16) A Jehovah oumerang el kmo ngsebeched el mtok aike el mengesuseu er kid. A lak loumerang er tiang e ngdiak bo lolekoi er kid me doruul er ngii. (Dut. 30:​11-14; Rom 6:6; 1 Th. 4:3) Me ngbleketakl el kmo kid a diak demechitechut el ka lak el sebeched el mtok a ngelbesel a rengud.

12. Ngera kired el meruul er ngii sel bo de feel el kmo ngdiak omelatk el kired, e ngerang?

¹² Ngdi osisiu, sel bo de feel el kmo ngdiak omelatk el kired me a Jehovah mo otngeklid lengii el ngar ngii a denguibes er ngii, e ngtiaikid el klengit el duldiukes er ngii el diak demecherrungel a mengedecheduch er kid. Me lak dorrenges er ngii. E ngerang? E le Biblia olisechakl er kid el kmo a Jehovah a medengei el kmo kede mechell el ngar er a klengit. (Psa. 103:​13, 14) Ng “medengei a rokuil tekoi” el kired luldimukl er aike el kakerous el rolel e a klengit el duldiukes er ngii a ngar ngii a lerellii er aike el soad el meruul. (1 Jn. 3:​19, 20, BT) Me a lsekum kede mtekengii a rengud e diak bo doruul aike el nguibes a rengud er ngii, e a Jehovah mo omes er kid el klikiid. Ngera uchul me ngsebechel mo ulterekokl a rengud er tiang?

13-14. A lsekum ngmo er ngii omnguibes er ngii e tiang ngbelkul a kmo ngmla mo diak moba kengei er a Jehovah? Mosaod.

¹³ A Biblia ochotii a klekakerous er a omeruul el mekngit (el ngii a tekoi el sebeched el control er ngii) me a ngibes (el ngii a sebechel di kiul el mo er ngii). El ua tiang, a rebebil er a Rekristiano el mlara ongdibel er a Korinth er a irechar a milenguchet a raod. A Paulus a milluches el kmo: “A re bebil er kemiu a mle uaisei.” Tia ngbelkul a kmo te dimlekea lluut el mo nguibes er tia el tekoi? Ngulterekokl el diak e le choua ikakid el ngibes a delalem er a rengul a chad. Me nguaisei engdi Rekristiano el olsarech a rengrir e diak bo loruul aike el olengibes er tir a oba kengei er a Jehovah. Ngomes er tir el “mla mekikiid.” (1 Ko. 6:​9-11, NW) Tia dirrek el sebechel mo klemerang el tekoi el kirem.

¹⁴ Ngii di el ngibes el oldechelakl er kau a sebechem el mo mesisiich er ngii. Mo lmuut me a bo lak el sebechel mo diak er a uldesuem me ngsebechem loserechii a rengum e diak bo moruul aike el ‘soal a rengum ma bedengem el meruul.’ (Efe. 2:3) Ngmekera sebechem el meruul er tiang e mo kats er a ultekengem er aike el mo olengibes er kau?

ROLEL E KE MO MESISIICH

15. A lsekum ngsoad el mo mesisiich er aike el olengibes er kid e ngera kired el mo bleketakl el meruul er ngii?

¹⁵ A bo demesisiich er aike el olengibes er kid e ngkired el di kid el mengedecheduch er kid e meketakl a chelitechetud. Bo mkerekikl me lak di lekau el mengeblad er kau. (Jak. 1:22) El ua tiang a chad el ngar ngii a mondai er ngii er omelim el rrom a locha mo mengkekerei er ngii el mondai loeak sel di lengii el melekoi el kmo, ‘A rebebil er a rechad a melim a kuk betok er ngak.’ Me a lechub a chad el ngar ngii a mondai er ngii el kirel omes a siasing er a remeau a locha mo oltelechakl er a rebebil e melekoi el kmo, ‘Okmo bechik olecholt er a bltikerreng el mei er ngak e ngdiak bo lsoak lomes er a rekuk bebil er a redil.’ A lsekum a chad a mo omdasu el uaisei e ngrullii el mo beot er ngii a mora klengit. Me lak molasem el meruul a excuse el kirel a omeruul el mekngit me a lechub ngmekngit el uldasu. Mkengei el ngmai a medal omerellem.—Gal. 6:7.

16. Ngmekera sebechem el smisichii a urungulem el mo meruul er a llemalt?

¹⁶ Ngdiak di momeketakl a chelitechetum, ngdirrek el kirem el smisichii a urungulem el diak bo moruul. (1 Ko. 9:​26, 27; 1 Th. 4:4; 1 Pe. 1:​15, 16) Molatk el kmo ngera ike el taem el klou a techellem el mo mechitechut me a ngera rullau el mo uaisei. Nglocha ngar ngii a ileakl el tekoi el olengibes er kau me a lechub ngtaem el klou a techall el bo mekesuseu. El ua tiang, kau ngbeot er kau a mo mechitechut sel lemesaul a bedengem me a lechub sel lebla bo lechosoi? Em prepare er kau el kirel e molatk er a obo moruul er ngii sel leduubech. Uchei er a lebo er ngii a mengesuseu er kau a sel kot lungil el taem el moruul er tiang.—Osi. 22:3.

17. Ngera sebeched el suub er a kerebil a Josef? (Genesis 39:​7-9) (Dirrek el momes a siasing.)

¹⁷ Molatk er a lurruul er ngii a Josef er a lolasem el mengesuseu er ngii a bechil a Potifar. Ngdi mle mereched e bleketakl el dmu er ngii el kmo ngdiak. (Monguiu er a Genesis 39:​7-9.) Ngera kede suub er tiang? A Josef a rirellii er a rengul a meruul er a llemalt er a uchei er a bo lolasem el mengesuseu er ngii a bechil a Potifar. Kau me ngdirrek el sebechem el meruul er a osisiu el tekoi. Ngsebechem el smisichii a urungulem el mo meruul er a llemalt er a uchei er a lebo er ngii a tekoi el sebechel mengesuseu er kau. Ngoeak tiakid el rolel e sel lebo er ngii a mengesuseu er kau e ngmo beot er kau a otireklii a obla mngiltii el mo meruul er ngii.

“BO MUNGIL EL MERRITER”

18. Ngmekera sebechem el mo mesisiich er a ngelbesel a rengum? (2 Korinth 13:5)

¹⁸ A obo mesisiich er aike el mo olengibes er kau e ngkirem el ‘mo ungil el merriter’ er kau. Tia belkul a kmo ngkirem el mo blechoel el merriter el kmo ke uangerang. (Monguiu er a 2 Korinth 13:5.) Ke kuk mong e merriter er a uldesuem el mo mesa el kmo ngera el omelodech a kirem el meruul er a uldesuem me a omerellem. El ua tiang, mo lmuut me a omotngakl aike el mlengesuseu er kau e di lekau el oker: ‘Ngak ak mle mereched el dmu diak?’ A lsekum ke mtebengii el kmo ngdimlak lemereched el tekoi e lak bo lemekngit a rengum. Bai moruul aike el rokui el sebechem el mo smisichau me a next e ngsebechem el lmuut el mo ungil el kltmokl. Di lekau el oker a ker el ua: ‘Ngak sel lebo er ngii a mekngit el uldasu el me soiseb er a uldesuek e ngsebechek el lmuut el mo mereched el otngeklii? A rolel a ongelaod el kulilt ngmeruul er ngii el mo meringel er ngak otngakl omengesuseu? Ak di mereched el ochebir osengek er a diak el klikiid el tekoi el kues? Ak understand er a uchul me a llechul a Jehovah a blechoel el ungil el kirek mo lmuut me a bo lekirek el meringel el oureor lolsarech er a renguk?’—Psa. 101:3.

19. Ngmekera sebechel a mekekerei el omelilt el diak lochotii a llomeserreng e rullii el mo meringel er kid el mtok a ngibes?

¹⁹ Sel morriter er kau em make sure e ngdiak moruul a excuse. A Biblia a kmo: “Ng diak a cheblad el [uai a rengul a chad]; ng kmal smecher me ng diak le mukar.” (Jer. 17:9) A Jesus a dilu el kmo a “mekngit el uldasu” a ngar er a rengud el me tuobed. (Mt. 15:19) El ua tiang, a chad el mla stob el omes a siasing er a remeau a locha uriul e ngmo omdasu el kmo ngdiak a kngtil a lomes a tekoi el ngar ngii olechotel a deleboes er ngii engdi ngdiak a chad el meau. Me a lechub nglocha di ngii el melekoi er ngii el kmo: ‘Ngdiak el mekngit a kumbeberrous el kirel omeruul el mekngit ngii di lak bo kmera el rullii.’ A lsekum a chad omdasu el uaisei e ngua ‘longedmokl [er ngii] el kirel a ngibes er a tech.’ (Rom 13:​14, BT) Ngmekera sebechem el diak bo mrebet er tia el tekoi? Bo mo modengei aike el mekekerei el tekoi el ngii a mo mekrolau el mo meruul a meklou el omelilt el diak lochotii a llomeserreng el ua omeruul el mekngit, e mongeroid er kau er ngii.b Moltngakl a ngii di el uldasu el rullau el mo meruul excuse el mo meruul a mekngit.

20. Ngera el omelatk a dobang el kirel a ngar medad, e ngera el ngeso a dobang er chelechang?

²⁰ Ngua bla desuubii, ngoeak a ngelsuil a Jehovah e ngngar ngii a klisiched el mtok a ngibes. Ngdirrek el loeak a klechubechub er ngii e ngngar ngii omeltked el mo kiei el mo cherechar er a beches el beluulechad. Ngmera el mo dmeu a rengud sel bo el sebeched el mesiou er a Jehovah e diak domtok a ngelbesel a rengud. Engdi chelecha el dongiil er tia el taem e ngkmal sebechel mo ulterekokl a rengud el kmo ngngar ngii a klisiched el mtok a ngibes me a omelatk el kired alta ngngar ngii a mo olengibes er kid. Ngoeak a klengeltengat er a Jehovah er a blakerreng er kid, e ngsebeched el mo mesisiich!