Kau, Ke Olengesenges Aika el Uleklatk?

1. Ngera el kerrekeriil a di kmedung e ngmo er ngii?

KEDE kiei er a taem el meklou el tekoi a mo duubech! Ngdi kmedung e a Jesus a mo oukerrekeriil er a rederta el chad. A Jesus a milsaod aike el mo ochotii el kmo, a temel a kerrekerilel a merkung. Ngmilsterir a redisaiplo er ngii a “olangch” lochotii a diak lemeues el demiel me a mo “ullebongel ra taem ra belulechad.” (Mt. 24:​3, BT) Tia el olangch a debetik er ngii er a 24 me a 25 el bliongel er a Mateus me a osisiu el omesodel el ngar er a 13 el bliongel er a Markus me a 21 el bliongel er a Lukas.

2. Ngera kede mo mesaod er tia el suobel, e ngera uchul me ngmo ngosukid?

² A Jesus a milskid a edei el okesiu el ngosukid el mo kltmokl. Aikang a okesiu er a resib me a rekaming, remellomes me a rediak el mellomes a rengrir el ekebil, me a retedei el mesiou. A derta er aika el okesiu a ngosukid el mo mesa rolel e a blekerdelel a chad a ngar ngii a bo lerellii er a kerrekeriil el lebo el nguu. Sel dorriter aika el okesiu, e domes a klubeled el dengai er ngii me a rolel e ngsebeched el loltaut. A kot lokesiu el bo dosaod er ngii a kirir a resib me a rekaming.

RESIB ME A REKAMING

3. Oingerang e a Jesus a mo oukerrekeriil er a rechad?

³ Ngar er a okesiu er a resib me a rekaming, e a Jesus a milsaod er a kerrekeriil el mo er tirke el ngar ngii a techellir el kongei er a ungil chais e mo support er a rengellitel el odam er ngii. (Mt. 25:​31-46) Temel a “kloul ringel” e te mo mukerrekeriil er a uchei er a ledubech a Armakedon. (Mt. 24:​21, BT) Ngdi ua mengkerengel a sib a lomii a sib me a kaming, a Jesus a mo meleakl er tirke el loba blakerreng el support er a rengellitel er tirke el diak.

4. A doltirakl er a Isaia 11:​3, 4, e ngera uchul me ngsebechel mo ulterekokl a rengud el kmo a Jesus a mo melemalt el oukerrekeriil er a rechad? (Dirrek el momes er a siasing.)

⁴ A ulaoch er a Biblia ochotii el kmo a Jesus el mla metutk er a Jehovah el mo oukerrekeriil a mo melemalt a kerrekerilel. (Monguiu er a Isaia 11:​3, 4.) Ngmo omes omerellir, blekerdelir, me a tekingir a rechad, luldimukl a omerellir el bedul a rengellitel el odam er ngii. (Mt. 12:​36, 37; 25:40) A Jesus a mo medengei el kmo te rua techa mle support er a rengellitel el odam er ngii me a urerir me a redimlak.a A ta er a klou a ultutelel el rolel e a resib a support er a rudam er a Kristus a oeak sel lolengeseu er tir er a berkel a klumech. Tirke el ulechotii tia el support er tir a mo mukerrekeriil el “melemalt” e mo er ngii a techellir el mo nguu a “diak a ulebengelel klengar” er tia el chutem. (Mt. 25:46; Och. 7:​16, 17) Ngmera el ileakl el omeksaul el mo er tirke el melemolem el loba blakerreng! Sel lolemolem el loba blakerreng el lengelakl er a temel a kloul ringel e a ngklir a mo melemolem el ngar er a “babier er a klengar.”—Och. 20:15.

5. Ngera klubeled er a okesiu er a resib me a rekaming, e te rua techa ngmai a klungiolir er ngii?

⁵ Mochotii el kmo koba blakerreng. A okesiu er a Jesus el kirel a sib me a kaming a melutk el kirir tirke el oba omelatk el di kiei er tia el chutem. Te ochotii a klaumerang er tir loeak a leblak a rengrir el lolengeseu er a rudam er a Kristus el lomerk er a klumech, e dirrek loba blakerreng loltirakl a ulekrael er a blak a rengul e mellomes a rengul mesiou el bla lengiltii a Jesus. (Mt. 24:45) Me nguaisei tirke el oba omelatk el mora eanged a dirrek el kirir el nguu a uleklatk el ngar tia el okesiu. E ngerang? E le Jesus a dirrek el omes omerellir, blekerdelir, me a tekingir. Tir me ngkirir el lochotii a blakerreng er tir. A Jesus a uluuchais a teblo el okesiu el ngar ngii a ileakl el uleklatk er ngii el mora rengellitel. Kede dirrek el metik aika el okesiu er a 25 el bliongel er a Mateus. Me dosaod er a okesiu er a remellomes me a rediak el mellomes a rengrir el ekebil.

REMELLOMES ME A REDIAK EL MELLOMES A RENGRIR EL EKEBIL

6. Milekera reteim el ekebil e ochotii el kmo te mellomes? (Mateus 25:​6-10)

⁶ Ngar er a okesiu er a rekebil e a Jesus a milsaod er a reteruich el ekebil el mlo olsiuekl er a chad el mlo bechiil. (Mt. 25:​1-4) Te mle sorir el lobengkel el mora mur er a merengel a chebechiil. A Jesus a milsaod er a reteim er tir el “mellomes” me a reteim el “mekebelung.” Tirke el mellomes a mle kltmokl e klekar. Te mle kltmokl el mengiil er a chad el mlo bechiil mo lmuut er a lemei er osoi. Me te ngilai a olbdelir e dirrek el milekeek a blil a chelucherir, lomech er a lsekum e ngmo meoud ngii el chad. Ngmle kltmokl olbdelir el mo melemolem el kmard. (Monguiu er a Mateus 25:​6-10.) Sera lemei ngike el chad el mlo bechiil e tirke el teim el mellomes a rengrir el ekebil a ulebengkel el mora merengel a chebechiil. Ngdi osisiu, a rengellitel el Kristiano el lochotii el kmo te kltmokl loeak a lolemolem el klekar e oba blakerreng el dimerekmo lemei a Kristus el mo oukerrekeriil a mo nguu omeksullir el mo obengkel a Hanamuko el Jesus el ngar er a Renged er a eanged.b (Och. 7:​1-3) E kuk mekerang tirke el ekebil dimlak loba llomeserreng?

7. Ngera dilubech el mo er tirke el teim el ekebil el dimlak lochotii a llomeserreng, e ngerang?

⁷ Tirke el dimlak loba llomeserreng el ekebil a dimlak el kltmokl er a lemei ngike el chad el mlo bechiil. A olbdelir a medkung e diak a blil a chelucherir. Sera lerenges el kmo ngike el chad el mlo bechiil a merekung, e ngmlo kirir el mo omechar a cheluch. A lemei a chad el mlo bechiil e te dirkak el mei. Tiakid e “tirkel teim er a ekebil el mle kltmokl a ulebengkel el mo tmuu er sel le ngar ngii a merengel a chebechiil, e sola e a tuangel a mlechesimer.” (Mt. 25:10) Uriul er a lemei tirke el dimlak lochotii a llomeserreng el ekebil e bocha el sorir el mo tmuu e ngike el chad el mlo bechiil a dilu er tir el kmo: “Ngak a diak kudengelkemiu.” (Mt. 25:​11, 12) Tirka el ekebil a dimlak el kltmokl el mengiil er a chad el mlo bechiil el dimerekmo lemei. Ngera sebechir el suubii a rengellitel er tiang?

8-9. Ngera sebechir a rengellitel el suubii er a okesiu er a rekebil? (Dirrek el momes er a siasing.)

⁸ Mochotii el kmo ke kltmokl e klekar. A Jesus a dimlak lolekoi el kmo te mo er ngii eru el bliongel er a rengellitel, el tang a mo kltmokl el mo lmuut er a ulebongel me a tang a diak. Ngbai milsaod er a sebechel duubech el mora rengellitel a lsekum e te diak kltmokl el mo oba blakerreng el mo lmuut er a ulebongel. A lsekum te diak el kltmokl e te diak bo el nguu omeksullir. (Jn. 14:​3, 4) Tiang a oberaod el tekoi! A doba omelatk el mora eanged me a lechub e ngchutem me ngungil el de sochedeklii tia el uleklatk el debetik er ngii er a okesiu er a rekebil. A derta er kid a kirel melemolem el klekar e kltmokl loutekangel el mora ulebongel.—Mt. 24:13.

⁹ Uriul er a Jesus a louchais er a okesiu er a rekebil el melisiich er a klungel a ultutelel a bo dekltmokl e klekar, e nguluuchais er a okesiu er a retedei el mesiou. Tia el okesiu a melisiich er a klungel a ultutelel a bo dechad er a ureor.

RETEDEI EL MESIOU

10. Te milekera tirke el teru el mesiou e ochotii a blakerreng er tir? (Mateus 25:​19-23)

¹⁰ Ngar okesiu er a retedei el mesiou e a Jesus a milsaod er a reteru el mesiou el uleba blakerreng el mora mastang er tir me a tang el dimlak. (Mt. 25:​14-18) Tirke el terung a ulechotii a blakerreng er tir er a lemeringel el loureor el mengereker a ududel a mastang er tir. Uchei er a lorael a mastang er tir e ngmilsterir a betok el udoud. Tirke el teru el mesiou a mle meringel loureor e ungil lousbech a udoud. Me ngngera dilubech? Sera lluut el mei a mastang er tir e te mla choisois a udoud el lengilai. A mastang a chilat er tir me tir a ‘tiluu el mo obengkel el ngar a deurreng.’ (Monguiu er a Mateus 25:​19-23.) E kuk mekerang ngike el ongedei el mesiou? Ngmilekera udoud el lengilai er a mastang er ngii?

11. Ngera dilubech el mo er ngike el “mesaik” el mesiou, e ngerang?

¹¹ Ngike el ongedei el mesiou a ngilai a 1,000 el udoud engdi ngmle “mesaik.” A mastang er ngii a mle expect er ngii el mo ungil lousbech aika el udoud, engdi ngbai milart er a chelsel a chutem. Sera lluut el mei a mastang er ngii e ngdimlak a dechelel a udoud. Ngika el mesiou a dimlak lungil a attitude er ngii. E dimlak lolengit a klausubes le ngdimlak lekereker a ududel a mastang er ngii e bai millekoi er a mastang er ngii el kmo ng “meringel a [tekingel] el chad.” Ngika el mesiou a dimlak lenguu a kengei er a mastang er ngii. Me a udoud a lengilai er ngii e te odikii er a blil a mastang.—Mt. 25:​24, 26-30.

12. Tirke el teru el blak a rengrir el mesiou te omtechei er techang er chelechang?

¹² Tirke el teru el blak a rengrir el mesiou omtechei er a reblak a rengrir el ngellitel el Kristiano. A Mastang el Jesus a mengemedaol er tir el mo ‘tmuu el mo obengkel el ngar a deurreng’ er ngii. Te nguu a dikesir er a eanged er a kot el lokiis. (Mt. 25:​21, 23; Och. 20:5b) Engdi ngike el mesaik el mesiou a olachidnger el mora rengellitel el Kristiano. Ngoeak a ngera el rolel?

13-14. Ngera te suubii a rengellitel er a okesiu er a retedei el mesiou? (Dirrek el momes er a siasing.)

¹³ Mochotii el kmo ke meringel loureor. Ngar er a okesiu er a retedei el mesiou el ua okesiu er a rekebil e a Jesus a dimlak lolekoi el kmo a rengellitel a mo mesaik. E ngbai milsaod er a sebechel duubech a lsekum te oridii a blakerreng er tir. Te diak bo lenguu ‘okedong me a omelilt el mo chedal’ e diak el sebechir el soiseb er a Renged er a eanged.—2 Pe. 1:10.

¹⁴ A okesiu er a Jesus el kirel a rekebil me a retedei el mesiou a meketeklii el mora rengellitel el Kristiano el kmo ngkirir el kltmokl e klekar e dirrek el mo meringel loureor. Engdi ngngar ngii a le liluut el melekoi a Jesus el uleklatk el mora rengellitel? Chochoi! A tekingel a Jesus el ngar er a Mateus 24:​40, 41 a dirrek el mesaod er a ulebongel el kerrekeriil el lebo el nguu a rengellitel.

NGTECHA “MO MENGAI”?

15-16. Ngmekera Mateus 24:​40, 41 e melisiich er a klungel a ultutelel a bo leklekar a rengellitel el Kristiano?

¹⁵ Uchei er a louchais aika el kldei el okesiu a Jesus e nguluuchais er a ulebongel el kerrekeriil el bo lenguu a rengellitel, el ngii a mo ochotii el kmo, ngtecha oba kengei er ngii. Ngmilsaod er a reteru el chad el loureor er a sers me a reteru el redil el loureor er a blil omengsous. Tirka meruul osisiu el lureor engdi Jesus a dilu el kmo a “tang a mo mengai, e a tang a mo medechel.” (Monguiu er a Mateus 24:​40, 41.) Me ngmilengelechel er a rultirakl er ngii el kmo: “Di mongkar ele ng diak modengelii a le mer ngii a Rubak er kemiu.” (Mt. 24:42) A Jesus a dilung a osisiu el tekoi er a losaod er a okesiu er a rekebil. (Mt. 25:​13, BT) Aika el tekoi ngulekuak? Ngkora uaisei. Te di bliochel a rengrir e blak a rengrir el ngellitel a “mo mengai,” el Jesus a mo ngoititerir el mora Renged er a eanged.—Jn. 14:3.

¹⁶ Mochotii el kmo ke klekar. Ngii di el ngellitel el Kristiano el diak lolemolem el klekar er a tekoi er a klereng a diak bo lemechudel lobengterir a “rengellitel el chedal.” (Mt. 24:31) Me a lmuut kung, a rokui el chedal a Dios el loba omelatk el mora eanged me a lechub e ngdi ngar tia el chutem a kirir el nguu tia el uleklatk er a Jesus el mo melemolem el klekar e oba blakerreng.

17. Ngera uchul me ngdiak debekikl er a Jehovah a lolilt er a rebebil el mo ngellitel er chelecha el taem er kid?

¹⁷ Kede mla mo ungil medengelii a Jehovah me kede oumerang a kerrekerilel. Ngdiak debekikl er a Jehovah el mla melilt er a rebebil el mo ngellitel er chelecha el taem er kid.c Kede melatk aike el lullekoi a Jesus el kirir tirke el mlo oureor er a mochu eim el klok el ngar sel okesiu er a sers er a bilong. (Mt. 20:​1-16) Tirke el ble lolengit er tir el mo oureor er a uriul a ngilai a osisiu el udoud el lengilai tirke el mle mereched el mo oureor. Ngdi osisiu, ngii di el taem el lemengilt a chad el mo ngellitel me tir a di mo nguu omeksaul el mora eanged a lsekum te mukerrekeriil el kmo te oba blakerreng.

MOLENGESENGES AIKA EL ULEKLATK

18-19. Ngera el suobel me a uleklatk a bla desaod?

¹⁸ Ngera kede mla smaod? A okesiu er a resib me a rekaming ochotii el mo er tirke el oba omelatk el mo kiei er tia el chutem el mo cherechar a klungel a ultutelel a lolemolem loba blakerreng el mora Jehovah er chelechang me a dirrek el temel a kloul ringel. Ngar tiakid el taem e a Jesus a mo oukerrekeriil er a reblak a rengrir el kmo te rredemelel a “mor a diak a ulebengelel klengar.”—Mt. 25:46.

¹⁹ Kede dirrek el milsaod a teblo el okesiu el uleklatk el mora rengellitel el Kristiano. Ngar er a okesiu er a remellomes me a rediak el mellomes el ekebil e a reteim er tir ulechotii a llomeserreng. Te mle kltmokl e klekar el mengiil er a chad el mlo bechiil el dimerekmo lemei. Engdi tirke el dimlak loba llomeserreng a dimlak el kltmokl. Me a chad el mlo bechiil a dimlak lekengei er tir el me soiseb er a merengel a chebechiil. Kid me ngdirrek el kired el mo kltmokl el mengiil el dimerekmo lemei a Jesus el mo olekngemed er tia el mekngit el blekeradel. Me a dirrek el ngar er a okesiu er a Jesus el kirel a retedei el mesiou e kede milsaod er a reteru el mesiou el mle chad er a ureor. Te mle meringel loureor el kirel a mastang er tir e ngiluu a kengei er ngii. Engdi ngike el mesaik a lultngeklii. Ngera klubeled er ngii? Ngkired el melemolem el mechesang er a omesiunged el mora Jehovah el mo lmuut er a ulebongel. E a orokiolel e kede milsaod er a rolel e a rengellitel a kirir el melemolem el klekar me lsebechir el “mo mengai” el mora eanged. Te kmal lomes el beduluchei el mo “mekideb el rokui el mo obengkel” a Jesus er a eanged. Uriul er a Armakedon e te mo hanayome er a Jesus er a merengel a chebechiielel a Ngelekel a Sib.—2 Th. 2:1; Och. 19:9.

20. Ngera ngmo meruul er ngii a Jehovah el kirir tirke el olengesenges a uleklatk er ngii?

²⁰ Me alta Jesus a di kmedung e ngmo oukerrekeriil, ngdiak a belkul el demedakt. A lsekum kede melemolem el loba blakerreng e a Demad el ngar er a eanged a mo meskid “sel diak le metuk el klisiich” “me bo le [sebeched] el dechor er medal a Ngelekel a Chad.” (2 Ko. 4:​7, BT; Lk. 21:36) Me a le omeltked el mora eanged me a lechub e kede di ngar er tia el chutem, kede mo odeuir a rengul a Demad a lsekum kede olengesenges aika el uleklatk el debetik er a okesiu er a Jesus. Ngoeak a krasia er a Jehovah e a ngkled a bo debetik el “llechukl er a babier” er a klengar.—Dan. 12:1; Och. 3:5.