Uchul Me Ngmelemolem a Mekemad me a Klautok

KLENGIT

A Dios a milebii a kot el demad me a delad er a Adam me a Eva el lokesiul. (Genesis 1:27) Tia belkul a kmo te ullab a blekerdelel el ua budech me a bltikerreng. (1 Korinth 14:33; 1 Johanes 4:8) Me nguaisei engdi te mlo diak lolengesenges er a Dios e mlora klengit. Tiakid a uchul me kede rokui loudiukes er a klengit me a kodall. (Rom 5:12) A klengit el duldiukes er ngii a uchul me ngblechoel el mo er ngii a mekngit el uldesued luchul me kede mo meruul a mekngit.—Genesis 6:5; Markus 7:​21, 22.

KABELMENT ER A RECHAD

A Dios a dimlak lebebid el di kid el mengedereder er kid. A Biblia a kmo: “Diak a chad el sebechel el chodereder a blekeklel.” (Jeremia 10:23) Tiakid a uchul me a kabelment er a rechad a diak el sebechel torob a rokui el mekemad me a omelemall er a rechad.

SATAN ME A REMEKNGIT EL ANGHEL ER NGII

A Biblia ouchais el kmo a “beluulchad el rokir a ngar eungel Ngikel Mekngit.” (1 Johanes 5:19) ‘Ngikal Mekngit’ a lomekedong er ngii el Satan el Diabelong, e ngii a blekerdelel el soal lomekoad. (Johanes 8:44) Ngii me a relmuut el bebil el mekngit el anghel a omekrael er a rechad el mo omuchel a mekemad e melemall er a rechad.—Ocholt 12:​9, 12.