Rolel e a Jehovah a Ngosukid el Loutekangel

1. Ngera uchul me kede ousbech er a telekangel, e ngera el ngeso a dobang? (1 Petrus 5:10)

A RECHEDAL a Jehovah ousbech er a telekangel er a chelsel aika el kmal meringel el uriul el sils. A rebebil a chuarm e le te meketeketa el smecher. A rekuk bebil a chuarm e le ngmla mad a betik er a rengrir. Me a rebebil a chuarm e le telungalek er tir me a lechub ngrechad er a kabelment omtok er tir. (Mt. 10:​18, 36, 37) Lemechelaod a rengum el kmo a Jehovah sebechel ngosukau el outekangel a ngii di el ringel el kau a chelebangel er ngii.—Monguiu er a 1 Petrus 5:10.

2. Ngera uchul me ngsebeched el loutekangel?

² A telekangel a belkul a kmo kede melemolem el loba blakerreng el mora Jehovah e melemolem el mesiou er ngii el loba deurreng alta kede mo chobangel a ringel, odechelakl, omelsemai, me a lechub ngomengesuseu. A telekangel a dirrek el belkul a kmo ngdiak doridii a omelatk. Tia el duch el loutekangel a diak loeak a klisiched, ngbai mlara Jehovah, el ngike el lomeskid a “diak le metuk el klisiich.” (2 Ko. 4:​7, BT) Ngar tia el suobel e kede mo mesaod a kleua el tekoi el bla lebeskid a Jehovah el lolengeseu er kid el loutekangel. Kede dirrek el mo mesaod er a rolel e ngsebeched el mui el ngmai a klungioled er a derta er ngii.

NGLUNGUUCH

3. Ngera uchul me a nglunguuch a mera el mengasireng el tekoi?

³ A Jehovah mla meskid a mengasireng el tekoi el sebechel ngosukid el loutekangel. Ngsebeched el mengedecheduch er ngii e ngorrenges er kid alta kede uldiukes er a klengit. (Heb. 4:16) Ka di molatk er tiang: Ngsebeched el meluluuch el mora Jehovah er a ngii di el taem el kirel a ngii di el tekoi. E sebechel lorrenges er kid el ngar er a ngii di el omelekoi me a ngii di el basio, mo lmuut me a di lekid el tang me a lechub e dekelebus. (Jon. 2:1, 2; Rel. 16:​25, 26) A lsekum ngkmal mo ouedikel a rengud me ngmo diak el sebeched el mechobech a tekinged el mora Jehovah, e ngdirk sebechel understand aike el soad el melekoi er ngii. (Rom 8:​26, 27) Chochoi, a nglunguuch a mera el mengasireng el tekoi!

4. Ngera uchul me ngsebeched el melekoi el kmo ngoltirakl er a soal a Jehovah sel doluluuch lolengit er ngii me lengesukid loutekangel?

⁴ A Jehovah olterekokl er a rengud el ngar er a Tekingel el kmo “ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.” (1 Jn. 5:14) Kid, ngsebeched lolengit er a Jehovah me lengesukid el loutekangel? Chochoi! Tiang a oltirakl er a soal a Jehovah! Ngera uchul me ngsebeched el melekoi el uaisei? Sel doutekangel a ringel e kede onger er a Satan el Diabelong el ngike el melumk er a Jehovah. (Osi. 27:​11, NW) Me a lmuut kung, a Biblia melekoi el kmo a Jehovah a kmal soal el “omesterir a klisichir tirkel blak a rengrir er ngii.” (2 Kr. 16:9) Me ngkmal sebechel mo ulterekokl a rengud el kmo a Jehovah a ngar ngii a klisichel me a urungulel el lolengeseu er kid el loutekangel.—Isa. 30:18; 41:10; Lk. 11:13.

5. Ngmekera nglunguuch e sebechel meskid a budech? (Isaia 26:​3, NW)

⁵ A Biblia kmo, sel doluluuch el mora Jehovah “e a budech er a Dios, el diak el sebechel a chad el mo cherrungel el medengelii, a mo mtebechel a [rengud ma uldesued].” (Fil. 4:7) Ka molatk er tiang. A rechad el diak losiou er a Jehovah a dirrek el mo chobangel a ringel. Te locha mo melasem a kakerous el tekoi me bo lsebechir lomudech er a uldesuir. El ua tiang, a rebebil a mengellakl a uldesuir me a rengrir loeak sel le bechachongii a uldesuir, luldimukl aike el tekoi el suebek a rengrir er ngii. Chouai tia el teletael a kengaol e le ngmesterir a remekngit el anghel a techall el mo omekrael er tir. (Momekesiu er a Mateus 12:​43-45.) Me a lmuut kung, a budech el lenguu a chad loeak tiang a kmal diak bo lokesiur a budech el denguu er a Jehovah. A Jehovah di omesterir tia el budech el mo er tirke el ultuil er ngii. ‘Ngmelemolem lomesterir a budech’ mo lmuut er a chelsel a kmal meringel el blekeradel. (Monguiu er a Isaia 26:​3, NW.a) A ta er a rolel a Jehovah loruul er tiang oeak sel lolengeseu er kid el dobedebek a klemerang el bla desuub er a Tekingel, el ngii olterekokl er a rengud. Aika el klemerang a chollakl a uldesued me a rengud e le kede medengei el kmo a Jehovah betik a rengul er kid e soal a bo demesisiich.—Psa. 62:​1, 2.

6. Ngmekera sebechem el mui el ngmai a klungiolem er a nglunguuch? (Dirrek el momes er a siasing.)

⁶ Sebechem el meruul er ngii. Sel lebo er ngii omchelebangel er ngii e “bsa RUBAK a berredem” e moluluuch lolengit er a budech er ngii. (Psa. 55:22) Mdirrek el meluluuch lolengit er a llomeserreng el mo medengelii a kirem el meruul er ngii. (Osi. 2:​10, 11) Lak mobes el dirrek el meluluuch loreng a sulel a Jehovah. (Fil. 4:6) Momtab aike el rolel e a Jehovah olengeseu er kau loutekangel, e moreng a sulel el kirel. Lak bechei a ringel el omchelebangel me bo luchul e lak mues a klengeltengat er a Jehovah el mo er kau.—Psa. 16:​5, 6.

TEKINGEL A DIOS

7. Ngmekera omesubed er a Biblia e ngosukid el loutekangel?

⁷ A Jehovah mla meskid a Tekingel el ngii a olengeseu er kid el loutekangel. Ngbetok a bades er a Biblia el lolterekokl er a rengud el kmo a Jehovah a mo ngosukid. Molatk er a ta er ngii. A Mateus 6:8 a kmo: “A Demmiu a medengei a ikel mousbech er uchei er cho molengit er ngii.” A Jesus el ungil medengelii a Jehovah el ngaruchei er a ngii di el chad ngike el dilung aika el tekoi. Me ngkmal sebechel mo ulterekokl a rengud el kmo a Jehovah medengei a dousbech sel dechuarm er a ringel e mo ngosukid. Ngbetok a osisiu el bades er a Biblia el ngii a sebechel meskid a klisiich el dousbech er ngii el mo outekangel.—Psa. 94:19.

8. (a) Mouchais er a ta er a example er a omellach er a Biblia el sebechel ngosukid el loutekangel. (b) Ngera sebechel ngosukid el dobedebek omellach er a Biblia sel bo dousbech er ngii?

⁸ A omellach er a Biblia sebechel ngosukid el loutekangel. Aika sebechel meskid a llomeserreng el dousbech er ngii me bo lsebeched el ungil el melilt. (Osi. 2:​6, 7) El ua tiang, a Biblia a melekoi el kmo lak el sebek a rengud el kmo ngera mo duubech er a ngar medad, bai bo dultuil er a Jehovah el kirel a kuk di chelecha el sils. (Mt. 6:34) A lsekum ngmo blekerdeled el menguiu er a Biblia e melebedebek aike el donguiu, e sel bo dousbech a omellach er a Biblia e ngbeot er kid a dobedebek.

9. Ngmekera smisichii a klaumerang er kid el kmo a Jehovah mo ngosukid sel donguiu er a rolel e ngulengeseu er a rechedal er a irechar?

⁹ A Biblia dirrek el louchais el kirir a rechad el uluumerang er a Jehovah e ngiluu a ngelsuil. (Heb. 11:​32-34; Jak. 5:17) Sel dolatk a rolel e a Jehovah ullengeseu er tir, e ngsmisichii a klaumerang er kid el kmo a Jehovah “omderungel er kid e klisiched, el di blechoel el kldmokl el olengeseu er a belsechel a chelebuul.” (Psa. 46:1) Me a dirrek sel dolatk er a klaumerang er a remesiungel a Jehovah me a blakerreng er tir el mesiou er ngii alta te mlo chobangel a ringel, e ngodbechid el mo oukerebai er tir.—Jak. 5:​10, 11.

10. Ngmekera sebechem el mui el ngmai a klungiolem er a Tekingel a Dios?

¹⁰ Sebechem el meruul er ngii. Monguiu er a Biblia er a bek el sils e mrellii a list er kau er a bades el kmal ngosukau. Te betok a mla metik el kmo sel lomuchel er a sils er tir loeak a omengiuel a days text e ngmesterir a tekoi el melisiich er tir el sebechir el melatk er ngii el ta el sils. Tiakid a ngilsuir a odos el Marieb er a lomekerreu er a demal me a delal. Tirka di diul el mlo smecher er a kasinoma e mlad er a rektir. A Marie a kmo: “Ngbek el tutau el kunguiu er a text e kulebedebek aike el ksuub er ngii. Tia ulemekeek er a uldesuek el kirel a Jehovah me aike el betok el tekoi el lolisechakl er kid, e mo diak di kulatk er a ringel el kchelebangel er ngii.”—Psa. 61:2.

RUDAM ME A RUDOS

11. Nger a uchul me ngmelisiich er kid sel dodengei el kmo ngdiak di lekid el tang el outekangel a ringel?

¹¹ A Jehovah mla meskid a rudam me a rudos er kid el meliuekl er a beluulechad el rokir el lolengeseu er kid el loutekangel. Sel dodengei el kmo “a re bebil er [kid] el oumerang el ngar a beluulchad el rokui a dirrek el chuarm osisiu el ringel el [dengar] ngii” e ngolterekokl er a rengud el kmo ngdiak di lekid el tang. (1 Pe. 5:9) Tia belkul a kmo te ngar ngii a rudam me a rudos er kid el mla chobangel osisiu el ringel el dechelebangel e mlo mesisiich er ngii. Me kid a dirrek el sebeched el mtekengelii!—Rel. 14:22.

12. Te mekera rudam me a rudos e sebechir el ngosukid, e ngera sebeched el meruul el kirir? (2 Korinth 1:​3, 4)

¹² A rudam me a rudos er kid a sebechir el ngosukid el loutekangel. A apostol Paulus a kmal mle ungil medengelii tiang. Ngar er aike el babilengel e ngblechoel omasech a ngklir e mirreng a sulir tirke el ullengeseu er ngii er a lekelebus er a blil. Te ullengeseu er a Paulus er aike el lousbech e milengelaod e melisiich er ngii. (Fil. 2:​25, 29, 30; Kol. 4:​10, 11) Kede locha mo chobangel osisiu el tekoi er chelecha el taem. Sel bo dousbech a ngeso loutekangel e te ngar ngii a rudam me a rudos el lolengeseu er kid. E sel bo lousbech a ngeso e ngsebeched el ngosuterir.—Monguiu er a 2 Korinth 1:​3, 4.

13. Ngera ngilsuir a odos el Maya el loutekangel?

¹³ Sera 2020 e a rebulis er a Russia mle search er a blil a odos el Maya. Uriul e ngmlora kerrekeriil le ngii el mle share er a klaumerang er ngii el mora rebebil. A Maya a kmo a rudam me a rudos er ngii a kmal millisiich er ngii er a chelsel tia el kmal meringel el taem. Ngmelekoi el kmo: “Tiakid el taem e ngkmal mlo mesaul a bedengek, suebek a renguk, e mekngit a renguk. Engdi a rudam me a rudos a uluudengua, message, e meluches el mei er ngak lolterekokl er a bltkil a rengrir el mei er ngak. Ak mle medengei el kmo ngngar ngii a klou el telungalek er ngak er a klereng el betik a rengrir er ngak. Engdi ngkmal mlo ulterekokl a renguk er tiang er a 2020 el mei.”

14. Ngmekera sebechem el ngmai a klungiolem er a rudam me a rudos er kau? (Dirrek el momes er a siasing.)

¹⁴ Sebechem el meruul er ngii. Molemolem el kmeed er a rudam me a rudos er kau er a klereng sel lebo er ngii a ringel el moutekangel er ngii. Lak lomai er a rengum olengit a ngeso er a remechuodel. Tirka sebechir el mo ua “omerotel er a eolt el . . . mengeluolu er kid er a meses el eolt.” (Isa. 32:2) Lak mobes el kmo a rekldemem el Kristiano me ngdirrek el ngar ngii a ringel el loutekangel. Sel moruul a ungil el mora chad el lousbech a ngeso e ngngosukau el loutekangel a ringelem loba tabesul uldasu me a ungil el uldasu.—Rel. 20:35.

OMELATK EL DOBANG

15. Ngmilekera omelatk e ngosuir a Jesus, e mekera ngosukid? (Hebru 12:2)

¹⁵ A Jehovah mla meskid a ulterekokl el omelatk el ngii a ngosukid el outekangel. (Rom 15:13) Molatk er a rolel e a omelatk a ngilsuir a Jesus el mtekengelii sel kot el mle meringel el sils er a klengar er ngii er tia el chutem. (Monguiu er a Hebru 12:2.) A Jesus a mle medengei el kmo a blakerreng er ngii a mo sobecheklii a ngklel a Jehovah. Ngdirrek el ulemes el beduluchei el mo er sel lluut el mo obengkel a Demal me sel taem el bo losiou er a Renged el ngar er a eanged lobengterir a rudam er ngii. Ngdi osisiu, a omeltked el mo kiei el mo cherechar er a beches el beluulechad er a Dios a ngosukid loutekangel a ngii di el ringel er a beluulechad er a Satan.

16. Ngmilekera omelatk e ngosuir a ta el odos el loutekangel, e ngera ke suub er a tekingel?

¹⁶ Molatk er a rolel e a omelatk el kirel a Renged a ngilsuir a Alla el odos er a Russia. Te ngiluu a bechil el mo kelebus e mengiil er a temel a kerrekerilel. Ngmelekoi el kmo: “Ak blechoel el meluluuch el kirel omeltked er a ngar medad e melebedebek el kirel. Tia ngosukak me ngdiak lebo el mechitechut a renguk. Ak medengei el kmo ngngar ngii a ungil el merael el mei er uriul er aika el ringel. A Jehovah mo mesisiich er a recherrouel e mo omekngeltengat er kid.”

17. Ngmekera sebeched lochotii omereng el saul er kid el kirel omelatk er a Biblia el dobang? (Dirrek el momes er a siasing.)

¹⁷ Sebechem el meruul er ngii. Mongoit a taem el melatk er a ungil el klengar er a ngar medad el bla letibir a Jehovah el mo er kau. Molatk er kau el ngar er a beches el blekeradel er a Dios me aike el klengeltengat el bo molab. A ngii di el ringel el omchelebangel er chelechang a di mo ua le ‘tedeb e kebekakl.’ (2 Ko. 4:​17, BT) Dirrek el moruul aike el rokui el sebechem el mo ouchais er a klaumerang er kau el mora rebebil. Ka di em imagine er a klengar er tir el chuarm a ringel er a beluulechad er a Satan engdi ngdiak lodengelii a moktek er a Dios el kirel a ngar medad. Ke locha mo omeksemeriar er tir er a omelatk el kirel a Renged loeak a di kesai el tekingem.

18. Ngera uchul me ngsebeched loumerang a telbilel a Jehovah?

¹⁸ A Job uluutekangel a betok el ringel e mlo mesisiich er ngii. Ngdilu er a Jehovah el kmo: “Chelechang e ak mla mo medengei el kmo ngsebechem el remuul a rokui el tekoi me a ngii di el ngerang el molatk el meruul er ngii a sebechem el kutmeklii.” (Job 42:​2, NW) A Job a mlo medengei el kmo ngdiak a ngii di el ngerang el sebechel torebengii a moktek er a Jehovah. Tia sebechel smisichid sel doutekangel a ringel. Ngsebeched lomekesiu er ngii er tiang. Ka em imagine er a redil el smecher e mechitechetong a rengul e le te betok el toktang a diak el sebechir el mekerur a secherel. Engdi ngmetik er a ungil toktang el ngii ouchais er a uchul me ngsmecher e smodii a rolel e ngmo omekungil er ngii er a secherel. Alta ngmedengei el kmo tia mo ousbech a taem engdi ngkmal lungia rengul. Chelecha ngsebechel loutekangel e le ngmedengei el kmo ngngar ngii omeltkel el kmo, ngmo ungil er a secherel. Ngdi osisiu, a klaumerang er kid er a omelatk el kirel a merekung el Baradis a ngosukid el loutekangel.

19. Ngera kede ousbech me bo lsebeched el loutekangel?

¹⁹ Ngua bla desang, a Jehovah ngosukid loutekangel a ringel lokiu a nglunguuch, Tekingel, rudam me a rudos, me a omelatk el dobang. Sel bo demui el ngmai a klungioled er aika el tekoi el bla lebeskid a Jehovah e ngmo ngosukid loutekangel a ngii di el ringel el bo dechelebangel el dimerekmo bo lak a rokui el ringel er a beluulechad er a Satan.—Fil. 4:​13, NW.