Jehovah a ‘Meskid a Deurreng’

1-2. (a) Ngera te feel er ngii a rebetok el chad er chelechang? (b) Ngera kede mo mesaod er tia el suobel?

A RECHAD er a beluulechad a meruul a betok el kakerous el tekoi el melasem el losiik er a deurreng. Me nguaisei engdi deurreng er tir a diak el medechel el meketeket. A rebetok a diak el deu a rengrir e feel el kmo ngngar ngii a bechachau. A rechedal a Jehovah me te dirrek el mo feel el uaisei. Kede kiei er a “uriul sils” me kede mo chobangel a “blsechel a ringel.”—2 Ti. 3:​1, BT.

² Ngar tia el suobel e kede mo mesaod aike el sebechel mo uchul e kede oridii a deurreng er kid me a rolel e ngsebeched el lmuut el metik er ngii a lsekum kede oridii. Me nguaisei engdi a kot e kede mo mesaod el kmo ngtecha ngike el sebechel ngosukid el metik er a mera el deurreng.

NGIKE EL MESKID A MERA EL DEURRENG

3. Ngera ngosisecheklid a blebelel a Jehovah? (Dirrek el momes a siasing.)

³ A Jehovah dirkak a ta el loridii a deurreng er ngii. E soal a bo el deu a rengud. Tiakid a uchul me ngmileob a betok el tekoi el ngii a rullid el kmal mo dmeu a rengud. El ua tiang, ngdmeu a rengud lomes er a beluulechad er kid el kmal klebokel e sebeched el mes a betok el kakerous el chiro er ngii, omes a charm el kausekool, e menga betok el kakerous el kall el kmal ungil a telemtemul. A Dios a mera el betik a rengud er kid e soal a doldeu er a rengud er a klengar!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ngmekera Jehovah sebechel melemolem el dmeu a rengul alta ngomes er a rechad el chuarm? (b) Ngera sengk er a Jehovah el mei er kid? (Psalm 16:11)

⁴ A Jehovah diak el blutek a medal el kirel a ringel el lechebangel a rechad. Ngkmal mekngit a rengul lomes er a rechad el chuarm. Me nguaisei engdi a Biblia omekedong er ngii el “dmeu a rengul el Dios.” (1 Ti. 1:​11, NW) Ngera uchul me ngmelemolem el dmeu a rengul? A ta er a uchul me ngdmeu a rengul a ngii el mla oterekeklii a sils el bo lokngemed a rokui el klengiterreng me a ringel me ngmo diak el mo cherechar. Engdi chelecha el longiil er tiakid el taem e ngkmal dirk omekerreu a tekoi el dechebangel. Sel dechuarm e ngolengeseu er kid. Ngmekera lolengeseu er kid? A ta er ngii, ngmla meskid a sengk er a deurreng. (Monguiu er a Psalm 16:11.) Ka momtab er a rolel e ngmle share er tia el sengk lobengkel a Ngelekel er a Jesus.

5-6. Ngera uchul me a Jesus a dmeu a rengul?

⁵ A Jesus ngike el kot el dmeu a rengul el blebelel a Jehovah. E ngerang? Molatk a teblo el uchul. (1) Ng “okesiul a diak le moues el Dios” me ngkmal di ua Demal er a bek el rolel. (Kol. 1:15; momes er a “happy” el study note er a 1 Timothy 6:15.) (2) A almost el rokir el part er a klengar er a Jesus a obengkel a Demal, el ngike el Meskid a deurreng.

⁶ A Jesus a metik er a deurreng el meruul a ngii di el tekoi el lolengit er ngii a Demal el mo meruul er ngii. (Osi. 8:​30, 31; Jn. 8:29) Tiakid a uchul me ngkmal odeuir a rengul a Jehovah e oba kengei er ngii.—Mt. 3:17.

7. Ngmekera sebeched el metik er a mera el deurreng?

⁷ Kid me ngdirrek el sebeched el metik er a mera el deurreng sel bo dokedid er a Jehovah, el ngike el Meskid a deurreng. Sel dongoit er a taem el mesuub el kirel a Jehovah e doukerebai er ngii e ngmo dmeu a rengud. E a dongoit er a betok el taem el meruul er ngii e nglmuut el menga el mo klou a deurreng er kid. Kede dirrek el mo metik er a deurreng sel doruul aike el lolengit er kid a Jehovah el mo meruul me sel dodengei el kmo kede oba kengei er ngii.a (Psa. 33:​12, NW) Engdi ngmekerang okmo ngngar ngii aike el taem el diak a deuil a rengud me a lechub ngdi melemolem el diak el deu a rengud? Tia ngbelkul a kmo ngmla mo diak doba kengei er a Jehovah? Ngkmal diak! A Jehovah understand el kmo chelsel chelecha el beluulechad e ngngar ngii aike el taem el kmal mo mekngit a rengud, e mo melechesuar a ringel, e mo depressed. (Psa. 103:14) Chelecha e me dosaod aike el sebechel mo uchul e kede oridii a deurreng er kid me a rolel e ngsebeched el lmuut el metik er a deurreng.

LAK BECHEREI A NGII DI EL NGERANG ME BO LUCHUL E KE ORIDII A DEURRENG ER KAU

8. Ngera sebechel duubech sel lebo er ngii a mondai er a klengar er kid?

⁸ Sel lebo er ngii a mondai er a klengar er kid. Kau, ke chelebangel odechelakl, telemellel a beluu, chelebuul, secher, me a lechub ngcheluodel? Aika sebechel mo uchul e ngmo diak a deuil a rengud, tokubets a lsekum ngdiak a klisiched er a situation er kid. A Biblia dmu el kmo “a klengiterreng a mengam a reng.” (Osi. 15:13) A Babis el ta er a remechuodel a mlo feel el uaisei. Ngdi mle chelsel a eua el rak e ngmad a obekul me a rechad er a blil. Ngmelekoi el kmo: “Ak mlo feel el kmo ngkmal di ngak el tang el diak a mo sebechel ngosukak. A lebebil e ngkmal di odechelakl er ngak a renguk, e le ngkmal mle betok ak chebangel me ngdimlak kungoit er a klou el taem el lobengkel a demak me a delak me a obekuk er a uchei er a lemad.” A mondai er a klengar a mera el sebechel rullid el mo diak a klisichel a bedenged me a rengud.

9. Ngera sebechel ngosukid el lmuut el metik er a deurreng? (Jeremia 29:​4-7, 10)

⁹ Ngera sebechel ngosukid el lmuut el metik er a deurreng? Ngoeak sel destob el melatk a tekoi el diak a klisiched er ngii e mo oba omereng el saul el kirel aike el dolab. A rebetok el chad omdasu el kmo ngkirel mo perfect a tekoi er a klengar er kid e seikid e kede mo metik er a deurreng. Engdi tia diak el klemerang. A Biblia olisechakl er kid el kmo ngkmal dirk sebeched el nguu a deurreng alta nglocha diak el soad a blekeradel er a klengar er kid er chelechang. El ua tiang, a Jehovah dilu er a Rechijudea el blebaol er a Babilon me bo loruul aike el sebechir el mo oldeu a rengrir er a klengar er isei. (Monguiu er a Jeremia 29:​4-7, 10.) Ngera kede suubii er tiang? Em accept er a klengar er kau e bo moba omereng el saul el kirel aike el lungil molab er a klengar er kau. E lak mobes el kmo a Jehovah diak bo lechitau; ngmo ngosukau. (Psa. 63:7; 146:​5, NW) A Effie el mle accident e chelechang paralyze el diak el sebechel merael a kmo: “A Jehovah, telungalek er ngak, me a rudam me a rudos er a ongdibel a kmal ullengeseu e melisiich er ngak. Me ak mle feel el kmo a lsekum ak give up e ngochotii el kmo ngdiak kuba omereng el saul el kirel aike el loruul me aike el bla leruul. Me ak mora tkurrebab el klisichek el mo melemolem el loba deurreng.”

10. Ngera uchul me sel dechebangel a mondai e ngsebeched el melemolem loba deurreng?

¹⁰ Mo lmuut me a lsekum ngdiak el soad a situation er a klengar er kid me a lechub ngduubech a mekngit el tekoi el mei er kid me a lechub ngtelungalek er kid, me ngdirk sebechel melemolem el dmeu a rengud.b (Psa. 126:5) E ngerang? E le deurreng er kid a diak lultuil er a blekerdelel a klengar er kid. A Maria el ta er a pioneer a kmo: “Alta kede dirk mo lmangel e mesaod a kngtil a rengud sel bo dechebangel a mondai, engdi kede melemolem loba deurreng e le kede melatk a telbilel a Jehovah el mei er kid. A Demad a mo ngosukid el mo melemolem el loba deurreng.” Lak mobes el kmo alta ngkmal sebechel mo meringel a klengar er kid er chelechang, aika el mondai er kid a di tedeb; ngdi ua ultil ochil a chad er a chelechol. Ngdi kmedung e ngmo mesuld el mo diak olengchelel.

11. Ngmekera kerebil a apostol Paulus e melisiich er kau?

¹¹ E a lsekum kede mo omdasu el kmo a mondai er kid olechotel a kmo kede mla oridii a kengei er a Jehovah? Ngmo ngosukau omoltak er a reblak a rengrir el mesiungel a Jehovah el mlo chobangel a kmal meringel el blekeradel. Molatk er a apostol Paulus. A Jesus a ngileltii el mo oba klemerang el mora “e Chisentael ma re king ma re chad er a Israel.” (Rel. 9:15) Ngmera el ileakl el techall! Me nguaisei engdi a klengar er a Paulus a mle mui er a ringel. (2 Ko. 11:​23-27) Aika ngmle olechotel a kmo ngmla oridii a kengei er a Jehovah? Ngkmal diak! Ngbai ngii el mle sebechel mtekangel ochotii el kmo a Jehovah ulebengkel. (Rom 5:​3-5) Chelechang e molatk er a klengar er kau. Ke outekangel loba blakerreng alta ke chelebangel a betok el ringel. Me ngkmal dirrek el sebechel mo ulterekokl a rengum el kmo koba kengei er a Jehovah.

12. Ngera sebechel duubech sel lak el motaut a urunguled?

¹² Sel lak letaut a urunguled. (Osi. 13:12) Bltkil a rengud el mora Jehovah me a omereng el saul er kid el mo er ngii odbechid el mo meruul a turrekong el ngar er a omesiunged el mo er ngii. Me nguaisei engdi a lsekum kede remuul a turrekong el diak el chatter er a blekeradel er a klengar er kid e ngsebechel mo mechitechut a rengud. (Osi. 17:22) A Holly el ta er a pioneer a kmo: “Ngmle soak el mora Skuul el Kirir a Rumerk er a Rengedel a Dios (SKE), mo mesiou el ngar er a kuk ta er a beluu, me a lechub ak mo olengeseu er a ureor lomekedechor er a Ramapo. Engdi ngmlengodech a blekeradel er a klengar er ngak me ngmlo diak el sebechek el meruul aika el turrekong. Tia rirellak el kmal mo mekngit a renguk. Ngkmal meringel sel soad el meruul er a tekoi engdi ngdiak el sebeched el mekerang.” A rebetok a dirrek el mo feel el uaisei sel lsekum ngdiak el sebechir el kutmokl a urungulir el ngar er a omesiungir el mora Jehovah.

13. A lsekum a blekeradel er a klengar er kid a uchul me ngdiak el sebeched el kutmokl aike el soad el meruul el mora Jehovah, e ngngera el turrekong a sebeched el meruul?

¹³ Ngera sebechel ngosukid el lmuut el metik er a deurreng? Ngoeak a lak dobes el kmo a Jehovah diak longerechir a tekoi el lengelakl er aike el sebeched, me a kerresed er osengel a diak loltirakl a ildisel a tekoi el doruul el mo er ngii. A Jehovah a soal a doba tabesul el uldasu me a blakerreng. (Mik. 6:8; 1 Ko. 4:2) Nglmuut el klou a ultutelel er ngii ngike el mera el kid er a chelsel el ngaruchei er aike el doruul. Me ngdiak el kired el meruul lengelakl er sel sebeched. A lsekum a blekeradel er a klengar er kau a uchul me ngdiak el sebechem el kutmokl aike el soam el meruul el mora Jehovah, e molatk aike el sebechem el meruul. Kau, ngsebechem el olengeseu el train er a kekerei er a ongdibel me a lechub ke melisiich er a remechudelang er a ongdibel? Ngsebechem el rullii a turrekong er kau el mo smisichii a chad loeak obo modngelii, oudengua el mo er ngii, me a lechub ke message er ngii? A Jehovah kmal dmeu a rengul sel moruul aike el sebechem el kutmokl, me ngii a mo omekngeltengat er kau loeak a lengesukau el metik er a deurreng! E lak mobes el kmo ngkmal di kmedung e ngmo diak a ulebengelel a techall el dosiou er a Jehovah el ngar er a rolel el dimlak delatk! Ngua lolekoi a Holly el dulsaod er ngii er a uchei: “A lsekum ngmo kora mechitechut a renguk, e ak mo stob e melatk el kmo, ngak a mo kiei el mo cherechar. Ngoeak a ngelsuil a Jehovah e ngsebechek er a beches el blekeradel el mo kutmokl aike el soak el meruul el mo er ngii.”

14. Ngera dirrek el sebechel mo uchul e kede oridii a deurreng er kid?

¹⁴ Di meruul a tekoi el melamet er a rengud. Kede locha mo meseterir a rechad el ngar er a social media el kora kmal happy le tir el meruul aike el tekoi el kmal sorir. Me kede locha mo start el omdasu el kmo, a lsekum kede meruul aike el soad el tekoi e omechar aike el soad e mesarech a kakerous el beluu e ngmera el mo dmeu a rengud. Ngdiak a kngtil aika el tekoi. A Jehovah soal a doldeu er a rengud er aika el klebokel el tekoi el lebileob el kired. Me nguaisei, engdi a rebetok a mla metik el kmo aike el tekoi el lulemdasu el kmo ngmo uchul a deuil a rengrir a bai mlo uchul te mo diak el happy. A Eva el ta er a pioneer a melekoi el kmo: “A lsekum ngklengar er kau el di meruul a tekoi el melamet er a rengum, e a rokui el tekoi a mo blechoel el di ngesonges er a rengum.” A lsekum kede blechoel el di melamet er a rengud e ngmo diak el deu a rengud e feel el bechachau.

15. Ngera kede suubii er a King Salomon?

¹⁵ A King Salomon a millasem a betok el tekoi el mo mesa kmo ngsebechel msang a deurreng. El ua tiang, ngmilengang a bek el bedengel a kmal ungil el kall, ulerrenges a klebokel el ongngak, e ulemechar a betok el meringel el chad el klalo. Engdi aika dimlak bo luchul a deuil a rengul. Ngdilu el kmo: “A mad a omes e di diak bo le turk osengel ma ding orrenges e di diak bo le mui er orenges.” (Oli. 1:8; 2:​1-11) A rebebil er a rechad omdasu el kmo ngmo dmeu a rengrir sel lebo er ngii a ududir e di loruul aike el sorir. Engdi tia blulak. Aika diak el sebechel meskid a mera el deurreng.

16. Ngmekera dorous el mora rebebil e ngosukid el lmuut el metik er a deurreng? (Dirrek el momes a siasing.)

¹⁶ Ngera sebechel ngosukid el lmuut el metik er a deurreng? A Jesus olisechakl er kid el kmo, “ng bai klou el deurreng a dorous er a dolai.” (Rel. 20:35) A Alekos el ta er a remechuodel a kmo: “Ak melasem el meruul a mekekerei el tekoi el kirir a rebebil. Sel kulengeseu er tir e ngmo diak kulatk aike el soak, e tia rullak el mo happy.” Ngngera sebechem el meruul el kirir a rebebil? A lsekum ke mesa chad el kora mekngit a rengul, e mongedecheduch er ngii. Nglocha diak el sebechem el sumechokl a mondai er ngii engdi ngsebechem el melisiich er ngii loeak omkerekikl lorrenges er ngii e molasem el mo understand a feelings er ngii. Ngsebechem el omeklatk er ngii me le bsa berredel er a Jehovah e le ngkerekikl lomekerreu er ngii. (Psa. 55:22; 68:19) Ngdirrek el sebechem el lolterekokl er a rengul el kmo a Jehovah dirkak el chitii. (Psa. 37:​28, NW; Isa. 59:1) Nglocha dirrek el sebechem el offer el meruul a tekoi el ngii a mo ngosuir, el ua meruul a kelel me a lechub ke kuk di walk lobengkel. Em invite er ngii el mo oldingel lobengkem; a berkel a klumech a blechoel el meskid a deurreng. Becherei a Jehovah me lousbech er kau el mo melisiich er a rebebil. Sel bo de focus er a rebebil e diak el di lekired e ngmeskid a bliochel el deurreng!—Osi. 11:​25, NW.

17. Ngera kired el meruul er ngii a lsekum ngsoad el metik er a mera el deurreng? (Psalm 43:4)

¹⁷ Ngkmal sebeched el metik er a mera el deurreng a dolemolem el olekeed er kid er a Demad el ngar er a eanged. A Biblia olterekokl er a rengud el kmo a Jehovah a mo ‘meskid a deurreng.’ (Monguiu er a Psalm 43:4.) Me a ngii di el tekoi el bo debechelii er a klengar er kid e ngkmal sebeched el mo feel el selebechakl. A lsekum a Jehovah mo best friend er kid e ngkmal sebechel mo ngosukid el mo dmeu a rengud el mo cherechar!—Psa. 144:​15, NW.