A Bltikerreng er a Dios a Diak a Ulebengelel

1-2. Ngera el tekoi a bo lomelechesiu er ngii a rebetok el Kristiano?

KA EM imagine er a chert el ngar er a kereker el mesisiich a eolt er ngii. Meklou el daob obang el mong e mei e mo er bab e mo er iou. Tia el chert a sebechel loberius a lsekum ngdiak a okul. A okul a chert a mo mtebechelii e mo uchul me ngdiak loberius er a temel tia el mesisiich el eolt.

² Kau sel omchelebangel er a meringel el blekeradel e ke locha mo feel el uai tia el chert. Aike el tekoi el momelechesiu a sebechel lobekau el mong e mei. A ta er a sils e ngkmal ulterekokl a rengum el kmo a Jehovah a betik a rengul er kau e olengeseu er kau, e a bo lekuk e koumededenger el kmo ngika ngmes a tekoi el mchebangel. (Psa. 10:1; 13:1) A sechelim a locha mo dmu tekoi el kmal mengelaod e melisiich er kau me ngmo ungil a rengum el telkib el taem. (Osi. 17:17; 25:11) Engdi ke lmuut el mo oumededenger el kmo a Jehovah a olengeseu er kau. Me a lmuut kung ke locha mo melatk el kmo a Jehovah a mla give up er kau. Ngmekera sebechem el mo uai tia el chert el ngar ngii okum er a temel a ringelem? Ngmekera sebechel mo ulterekokl a rengum e mo melemolem el ulterekokl a rengum el kmo a Jehovah a betik a rengul er kau e olengeseu er kau?

3. Ngera belkul a “diak lemengodech el bltikerreng” el losaod er ngii a Psalm 31:7 me a 136:1 (NW), e ngera uchul me a Jehovah ngike el kot el ngarbab el kerebai er olecholt er tia el blekeradel? (Dirrek el momes er a siasing.)

³ A ta er a rolel e ngsebechel mo er ngii okud er a temel a ringel a lak dobes er a diak lemengodech el bltikerreng er a Jehovah. (Monguiu er a Psalm 31:7; 136:​1, NW.a) A tekoi el “diak lemengodech el bltikerreng” a luchesii er a uldesued a dmolech e diak lengemed el bltikerreng me a blakerreng el loba chad el mora ta er a chad. A Jehovah ngike el kot el ngarbab el kerebai er a bltikerreng me a blakerreng. A Biblia mesaod er ngii el kmo ng “mui er a diak lemengodech el bltikerreng.” (Exo. 34:​6, 7, NW) A Biblia dirrek el melekoi el kirel a Jehovah el kmo: “Kolecholt er a diak lemengodech el bltikerreng el mo er tirke el rokui el omekedong er kau.” (Psa. 86:​5, NW) Molatk a belkul aika el bades: A Jehovah kmal diak bo longoit er a reblak a rengrir el mesiungel! Sel lak mobes el kmo a Jehovah oba blakerreng, e sel obo mchebangel er a mesisiich el ringel ngsebechem el mouak.—Psa. 23:4.

LAK MOBES EL KMO A BLTIKERRENG ER A JEHOVAH A TA ER A OSISECHAKL ER A BIBLIA

4. Mouchais a bebil er a osisechakl er a Biblia, e msodii a uchul me ngmeringel er a ta er a chad el ngodechii a uldesuem el kirel.

⁴ Sel bo mesa el kmo, a bltikerreng er a Jehovah a ta er a osisechakl er a Biblia e ngmo ngosukau el smisichii a klaumerang er kau er a bltkil a rengul el mo er kau. Ngera uldesuem sel ledu el kmo “ta er a osisechakl er a Biblia?” Ke locha mo melatk aike el klemerang er a Biblia el bla msuub. El ua tiang, ke mla suubii el kmo a Jehovah a ngklel a Dios, a Jesus a di ta el Ngelekel a Dios, a rulekoad a diak a ngera el lolechesuar, me ngii a mo er ngii a baradis er tia el chutem el bo lekiei er ngii a rechad el mo cherechar. (Psa. 83:​18, NW; Oli. 9:5; Jn. 3:16; Och. 21:​3, 4) Sera obo moumerang aika el tekoi, e ngmeringel er a ta er a chad a ngodechii a uldesuem el kirel. E ngerang? E le ke mlo mtebengii el kmo aikang a mengai a uchetemel er a klemerang el tekoi. Ka me dosaod er a rolel e sel mesa el kmo a bltikerreng er a Jehovah a ta er a osisechakl er a Biblia, e ngsebechel ngosukau el mo diak moumededenger el kmo a Jehovah omekerreu a tekoi el duubech el mo er kau e mes aike el omchebangel.

5. Mosaod er a rolel e a chad a sebechel mult a klsuul el osisechakl el delalem er a rengul.

⁵ Ngera ngilsukau er a omomuchel el mesuub er a Biblia el chemoit a klsuul el osisechakl? Ngulterekokl el ngilsukau er a om compare aike el mosuub er a klechelid er kau el mora ike el lolisechakl a Biblia. Molatk er tia el example: Okmo kau a uluumerang el kmo a Jesus a Dios el Olab a Bek el Klisiich. Sera omosuub er a Biblia e ke mlo melatk el kmo, ‘Tia el osisechakl ngklemerang?’ Uriul er omorriter aike el lolekoi a Biblia e ke mlo medengei el kmo tiang a diak el klemerang el tekoi. Me ngmlo diak moumerang er tia el tekoi e bai mlo oumerang aike el lolekoi a Biblia: A Jesus a “ulemuchel el mechell loeak uchei ra rokuil bleob” el “di tal Ngelekel a Dios.” (Kol. 1:​15, BT; Jn. 3:18) Nguaisei, a klsuul el osisechakl a sebechel kmal medalem er a rengud me ngmeringel a domult. (2 Ko. 10:​4, 5, NW) Engdi sera bo modengelii a klemerang e ngdimlak mluut el mo oumerang a klsuul el osisechakl el bla mchoit.—Fil. 3:13.

6. Ngera uchul me ngsebechel mo ulterekokl a rengum el kmo “a diak lemengodech el bltikerreng er [a Jehovah] a diak a ulebengelel”?

⁶ Ngsebechem el dirrek el meruul er a osisiu tekoi el mora ike el lolisechakl er kau a Biblia el kirel a bltikerreng er a Jehovah. Sel mchebangel a ringel e bo momuchel loumededenger er a bltkil a rengul a Jehovah el mo er kau, e di lekau el oker, ‘Ngak a kungil el omdasu?’ Em compare a klaumededenger er kau el mora tekoi el ngar er a Psalm 136:1 (NW), el bades el lemengai er ngii tia el suobel. Ngera uchul me a Jehovah melekoi er a bltikerreng er ngii el kmo ng “diak lemengodech”? Ngera uchul me tia el bliongel a 26 el taem el lolekoi el kmo “a diak lemengodech el bltikerreng er ngii a diak a ulebengelel”? Ngua bla dosaod, a diak lemengodech el bltikerreng er a Jehovah el mora rechedal a osisechakl er a Biblia el di uaike el bebil er a klemerang er a Biblia el mle beot er kau a mo oumerang. Tia el uldasu el kmo a Jehovah omes er kau el diak a ultutelem e diak el betik a rengul er kau a klsuul el osisechakl. Mchitii tia el blulak el di uai a mchiloit aike el lmuut el bebil er a klsuul el osisechakl!

7. Mouchais a bebil el bades el ngii a meketeklii el kmo a Jehovah a betik a rengul er kau.

⁷ Ngngar ngii a lmuut el betok el evidence er a Biblia el meketeklii el kmo a Jehovah a betik a rengul er kau. El ua tiang, a Jesus a dilu er a rultirakl er ngii el kmo: “Kemiu a lmuut el ngar uchei er a rengul a Dios er a betok el chesisebangiau!” (Mt. 10:31) A Jehovah di mle ngii el melekoi er a rechedal el kmo: “Ak mo rullau el mo mesisiich, e ngosukau. Ak mo orreked er kau el oba klisichel a chimak.” (Isa. 41:​10, NW) Kau mutebengii el kmo te di bleketakl el mengedecheduch. A Jesus a diak ledu el kmo, ‘Kemiu a locha lmuut el ngar uchei’ me a Jehovah diak ledu el kmo, ‘Ak locha mo ngosukau.’ Te bai dmu el kmo, “Kemiu a lmuut el ngar uchei” me a “Ak mo . . . ngosukau.” Me a lsekum ke mo chelebangel er a ringel e mo oumededenger er a bltkil a rengul a Jehovah e a chouaika el bades a diak di lerellau el mo feel el kmo a Jehovah a betik a rengul er kau, ngmo oterekeklii a rengum el kmo a Jehovah betik a rengul er kau. Aika el bades a melekoi a klemerang el tekoi. Sel moluluuch el mora Jehovah el kirel a klaumededenger er kau e molebedebek aika el bades e ngmo sebechem el melekoi aika el tekoi el ngar er a 1 Johanes 4:16 el kmo: “Kid a medengei e oumerang er a bltikerreng er a Dios el mer kid.”b

8. Ngera sebechem el meruul er ngii a lsekum ngmo er ngii aike el taem el moumededenger er a bltkil a rengul a Jehovah el mo er kau?

⁸ Engdi ngera sebeched el meruul a lsekum ngmo er ngii aike el taem el doumededenger er a bltkil a rengul a Jehovah el mei er kid? Em compare a feelings er kau el mora ike el modengei. A feelings er kid a sebechel mengodech engdi klemerang a diak el sebechel, me a bltikerreng er a Dios el mei er kid a klemerang el lolisechakl er ngii a Biblia. A lsekum ngdiak moumerang el kmo a Jehovah a betik a rengul er kau e ngbelkul a kmo, a Biblia omulak sel ledu el kmo a “Dios a bltikerreng.”—1 Jn. 4:8.

MKEREKIKL EL MELEBEDEBEK EL KMO A JEHOVAH ‘A BETIK A RENGUL ER KAU’

9-10. Ngera ngmilsaod er ngii a Jesus er a ledu el ngar er a Johanes 16:​26, 27 el kmo “Ele Chedam a betik a rengul er kemiu”? (Dirrek el momes er a siasing.)

⁹ Sel dorriter aika el tekingel a Jesus el mora rultirakl er ngii e ngngosukid el mo medengei a lmuut el betok el kirel a bltikerreng er a Jehovah: “Chedam a betik a rengul er kemiu.” (Monguiu er a Johanes 16:​26, 27.) A Jesus a dimlak di lolekoi aikang el meruul a rengrir a redisaiplo er ngii el mo ungil. Sel donguiu aike el bades loeak uchei er tiang e kede mesa el kmo, a Jesus a diak losaod er a feelings er a redisaiplo er ngii ngbai mesaod er a nglunguuch.

¹⁰ A Jesus a dilu er a redisaiplo er ngii el kmo ngkirir el meluluuch lokiu ngii ngdiak loluluuch el mo er ngii. (Jn. 16:​23, 24) Ngkmal mle klou a ultutelel a bo lodengelii tia el tekoi. Uriul er a lebora eanged a Jesus e a redisaiplo er ngii a locha mle sorir el meluluuch el mo er ngii e le tirka mlo medengelii a Jesus el sechelirir. Ngmle sebechir el mo omdasu el kmo a Jesus el kmal betik a rengul er tir a uchul me ngsoal lorrenges ongterir e mo olengit er a Demal el kirir. Me nguaisei engdi a Jesus a dilu el kmo ngdiak el kirir el omdasu el uaisei. E ngerang? Ngdilu er tir el kmo: “Ele Chedam a betik a rengul er kemiu.” Tia el klemerang a osisechakl er a Biblia el kirel a nglunguuch. Molatk er a belkul tiang el kirem: Ngoeak omesubem er a Biblia e ke mla mo medengelii a Jesus e mo betik a rengum er ngii. (Jn. 14:21) Engdi ngkmal di uai tirka el disaiplo, ngsebechem el meluluuch el mora Dios lulterekokl a rengum el kmo a “Chedam a betik a rengul er [kau].” Bek el taem el moluluuch el mora Jehovah e ke ochotii el kmo koumerang aika el tekoi.—1 Jn. 5:14.

BOM UNDERSTAND ER A UCHUL ME KE MO OUMEDEDENGER

11. Ngera uchul me ngkmal mo dmeu a rengul a Satan sel bo doumededenger er a bltkil a rengul a Jehovah?

¹¹ Ngera rullid el mo oumededenger el kmo a Jehovah a betik a rengul er kid? Ke locha mo dmu el kmo, ng Satan. Nguaisei tia part er ngii. A Diabelong a “osiik er a bo lomerkakl er ngii” e kmal mo dmeu a rengul a lsekum kede mo oumededenger el kmo a Jehovah a betik a rengul er kid. (1 Pe. 5:8) A Jehovah kiltmeklii olubet e le ngkmal betik a rengul er kid engdi a Satan a soal a bo de feel el kmo kede kmal mekngit me ngdiak el sebechel olubet el oureor er kid. (Heb. 2:9) Engdi ngmo klungiolel techang sel bo doumededenger er a bltikerreng er a Jehovah? Ng Satan. E techa mo dmeu a rengul a lsekum kede give up sel bo dechebangel a ringel? Ng Satan. Tia kmal blitokl el tekoi. Kid oba bltkil a rengul a Jehovah e a Satan ngike el mla oridii a bltikerreng er a Jehovah. Me nguaisei engdi ngmeruul er kid el mo feel el kmo ngkid ngike el mla motngakl er a Jehovah me a Jehovah diak el betik a rengul er kid. Tia ta er a “ulekbat [er ngii].” (Efe. 6:​11, BT) Sel bo dodengei a urerel ngika el cherroued e ngsmisichid el “momtok er a Diabelong.”—Jak. 4:7.

12-13. Ngmekera klengit el duldiukes er ngii e sebechel rullid el mo oumededenger er a bltikerreng er a Jehovah?

¹² Ngngar ngii a lmuut el ta er a tekoi el sebechel rullid el mo oumededenger er a bltikerreng er a Jehovah. Tia ngngerang? Ngklengit el duldiukes er ngii. (Psa. 51:5; Rom 5:12) A klengit a mla tomellii a deleuill er a rechad me a Ulemeob. Ngdirrek el mla tomall a uldesued, rengud, me a bedenged.

¹³ A klengit a kmal klou el mekngit a bla lerellii er a uldesued me a rengud luchul me kede mo feel er a ukltked el di oldechelakl er kid, suebek a rengud, merur, e diak lungil a uldesued el kired. Sel derellii a klengit e ngsebeched el mo feel er a ta er aika el tekoi. Engdi ngdirrek el sebeched el mo feel el uaisei e le kede feel el kmo ngkmal diak demecherrungel. A rechad a dimlak el uaisei er a lekot el lobeob. (Rom 8:​20, 21) A mlai el mla flat a taia er ngii a diak el sebechel lungil loureor el uai sel lecherrungel el diak a telemellel. Kid a rechad a di osisiu, ngdiak el sebeched el mo cherrungel lungil loltirakl er a rolel a dekot el ulebeob e le ngdiak demecherrungel. Me ngdiak el mechas a rengud el kmo, ngngar ngii aike el taem e kede mo melatk el kmo a Jehovah ngmera el betik a rengul er kid. Sel bo deuaisei e ngkired lomeklatk er kid el kmo a Jehovah “ngike el kot el ngarbab e mengasireng el Dios . . . [el] olecholt er a diak lemengodech el bltikerreng el mo er tirke el betik a rengrir er ngii e oltirakl a llechul.”—Neh. 1:​5, NW.

14. A omelebedebeked er a olubet ngmekera sebechel ngosukid me ngdiak bo domdasu el kmo, a Jehovah diak el betik a rengul er kid? (Rom 5:8) (Dirrek el momes er a baks el “Mongkar er Kau er a ‘Chelebeldil a Klengit.’”)

¹⁴ A lebebil e kede locha feel el kmo ngdiak derredemelel a bltikerreng er a Jehovah. Me nguaisei engdi kid el diak de deserve er a bltkil a rengul a uchul me a bltikerreng er ngii a kmal ileakl. Tekoi el doruul a diak el sebechel rullii me kede mo rredemelel a bltkil a rengul. Me nguaisei engdi olubet a dokedek a kngtid, e a Jehovah kiltmeklii tiang e le ngbetik a rengul er kid. (1 Jn. 4:10) Dirrek lak mobes el kmo a Jesus a mlei el me olsobel er a rengar er a klengit ngdimlak be lolsobel er a remecherrungel el chad. (Monguiu er a Rom 5:8.) Ngdiak a ngii di el chad el sebechel mo perfect a loruul a tekoi me a Jehovah dirrek el diak longerechir tiang er kid. Sel bo dodengelii a rolel e a klengit el duldiukes er ngii a sebechel rullid el mo oumededenger er a bltkil a rengul a Jehovah e ngsebeched el mo rullii er a rengud a omtok er ngii me lak lebo er ngii a klisichel er kid.—Rom 7:​24, 25.

MNGILTII EL MO OBA BLAKERRENG

15-16. Ngera sebechel mo ulterekokl a rengud er ngii a lsekum kede melemolem loba blakerreng el mora Jehovah, e ngerang? (2 Samuel 22:​26, NW)

¹⁵ A Jehovah soal a dengiltii el mo ‘blak a rengud’ el mo er ngii. (Dut. 30:​19, 20) A doruul el uaisei e ngkmal sebechel mo ulterekokl a rengud el kmo ngmo oba blakerreng el mei er kid. (Monguiu er a 2 Samuel 22:​26, NW.c) A lsekum kede mo melemolem loba blakerreng el mora Jehovah e ngkmal sebeched el ultuil er ngii el kirel a ngii di el tekoi el duubech er a klengar er kid e le ngmo ngosukid.

¹⁶ Ngua bla dosaod, ngkmal betok a uchul me ngngar ngii okud er a chelsel a ngii di el ringel el bo dechebangel. Kede medengei el kmo a Jehovah a betik a rengul er kid e mo ngosukid. Tiakid a lolisechakl er ngii a Biblia. A lsekum kede mo oumededenger er a bltkil a rengul, e ngkmal sebeched el melatk aike el dodengei el kmo ngklemerang er a bai ike el domdasu el kmo ngmerang. Bo lolemolem el ulterekokl a rengud er a klemerang er a Biblia el kmo, a diak lemengodech el bltikerreng er a Jehovah a diak ulebengelel.